PJJ GBKP Tgl. 9 - 15 Oktober 2016

PJJ GBKP TGL. 9 - 15 OKTOBER 2016

Pdt. Larena br. Sinuhadji (Nd. Rey Tarigan)

Tema : ERBINTUAS MAKEKEN WARI-WARI (Kuan-kuanen 28:19-22)

Penjelasen Bahan Ogen & Renungen

Bahan ogenta termasuk i bas kumpulen Amsal Salomo si i bas Alkitab LAI Edisi Studi ikataken berbentuk “kesejajaran yang bertentangan”. Maksudna lit dua kalimat pengajaren si berlawanen sada ras si debanna tapi la lit je kesimpulen si nuduhkenca kalimat entah pe pengajaren si pemena entah si peduaken si mehulina. Hanya merupaken gambaren kinata si terjadi i bas kegeluhen, si maksudna gelah si ngoge rukur ras ertimbang, si apai si atena ipilihna. Ay. 19, kalak si erbintuas berlawanen ras kalak si la make wari-wari, bage pe asilna, bias kap nakanna berlawanen ras musil. Ay. 20, kalak bujur berlawanen ras kalak si meter atena bayak, bage pe asilna, kemalemen ate (Alkitab BIS : “diberkati Tuhan”) berlawanen ras datken ukumen. Ay. 21, rayo-ayo i bas Alkitab TB-LAI iterjemahken “memandang bulu”. I bas Alkitab BIS : “membeda-bedakan”. I bas Alkitab Contemporary Englis Version : “unfair” entah pe “tidak adil”. Rayo-ayo banci iertiken “tidak adil”. E maka bertindak adil berlawanen ras ngkapiti si salah (Alkitab TB-LAI : “membuat pelanggaran”. Alkitab BIS : “berlaku curang”). Ay. 22 banci ikataken merupaken pengulangen ras penegasen ay. 20, kalak si merangap pedas atena bayak, la lit kesadaren bas dirina kerna bencana si nandangi reh nindih ia.

Si apai si ateta ipilih kita? Enggo banci sipastiken, tentuna kerina kita milih erbintuas makeken wari-wari janah ndatken asil si bias guna kebutuhen geluhta. Kerina kita milih jadi kalak si bujur si datken kemalemen ate (diberkati Tuhan). Milih jadi kalak si la rayo-ayo (adil) janah ngelakoken si benar sue ras peraten Dibata. Adi siperdiateken ogenta sendah, lit kaiten antara erbintuas makeken wari-wari ras kebujuren, la rayo-ayo (adil), ras ngelakoken si benar. Adil i jenda banci iertiken kepedulianta nandangi kalak si membutuhken penampatta. Jadi i bas erbintuas makeken wari-wari, janah sinikmati asil pendahinta si idatken kita i bas kebujuren ras kebenaren, lit tanggung jawabta guna nampati kalak si membutuhken penampatta. Tek kita e me situhuna si ate Dibata ipilih kita selaku kalak si enggo datken keselamaten i bas Yesus Kristus.

Tema i bas PJJ-nta sendah “Erbintuas Makeken Wari-wari” ngingetken kita kerna etos kerja Calvinis. Lit semboyan laborare est orare (bekerja adalah berdoa) pengertinna kurang lebih, kai pe si idahiken kita (dahin si positif) seri nilaina ras pertotonta entah pe ibadahta man Dibata. E me sada semboyan si muncul mulihi i bas sekitar abad 17-19 erkiteken etos kerja Calvinis erpalasken pemahamen Soli Deo Gloria, kerinana guna kemulian gelar Dibata. Memang i bas teologia Calvin, Soli Deo Gloria e me si pentingna, sebab kerina si enggo ibereken Dibata i bas kegeluhenta arus ipertanggunjawabken guna kemulian gelar Dibata. Jadi i bas kita erdahin e seri ras kita erbakti entah pe eribadah man Dibata. Adi si bage si ilakoken kita enggo pasti erbintuas kita i bas pendahin kai pe si enggo ipercayaken Dibata man banta, alu tujun si utamana labo guna kinibayakenta tapi guna kemulian gelar Dibata. Adi bayak kita erkiteken erbintuas e me bonus si ipercayaken Dibata man banta guna sibagiken man kalak si deban si membutuhken penampatta. Si e pe guna kemulian gelar Dibata, sebab kerinana si lit bas kita e me anugerah (pemere) Dibata labo erkiteken kebeluhen entah pe gegehta.

Adi kita kalak Karo umumna la palah nari siajari kerna erbintuas, tapi ula ka ndabuh ku bas pemahamen terus-menerus bekerja keras guna ndarami kebutuhen geluh piah dungna la nari sempat menikmati geluh enda : la lit waktu istirahat, pulung ras keluarga, la nari sempat pulung ibadah Minggu ras kegiaten-kegiaten si deban si enggo iaturken Gerejanta. E maka mari radu ras kita ertoto, mindo pergegeh i bas Dibata nari gelah ipengasupNa kita terbagesen menata kelola kerina si enggo ipercayaken Dibata man banta termasuk pendahinta, kai pe pendahinta (i bas pengertin pendahin si positif). Erbintuas kita makeken wari-wari alu tetap kita menatalayanken waktu si enggo ibereken Dibata man banta alu mehuli seh maka lit denga waktu guna pulung ras keluarga, rekreasi, ngikuti kegiaten-kegiaten Gereja, rsd. Ula sempat tarum ngayak-ngayak si man tadingenken, tading si man ayaken, e me kinitekenta. Sebab melala pengaruh si negatif i bas jaman gundari enda si rusur menggoda kita guna ndatken kinibayaken alu cara-cara si instan, janah orientasi geluhta ibabana guna ngayaki kinibayaken ngenca. Dibata si mpegegehi kita.