Khotbah GBKP Minggu Tgl. 30 Oktober 2016

KHOTBAH GBKP MINGGU TGL. 30 OKTOBER 2016

Nrs. Pdt. Larena br. Sinuhadji (Bp. Rey Tarigan)

Minggu PAK Gelora Kasih, PPOS, ras YKPC Alpha Omega GBKP

Invocatio : “Tapi adi atendu erbahan kerja man-man, undanglah kalak musil, kalak cempang-cempang, kalak pangpangen ras kalak pentang” (Lukas 14:13)

Ogen : Jakup 1:23-27 (Tunggal)

Khotbah : Ulangen 24:17-22 (Tunggal)

Tema : ERDIAKONIA ALU PAYO

Penjelasen Bahan Pustaka Si Badia

Bahan khotbahta termasuk i bas kumpulen undang-undang si rinci i bas bidang : ibadah si tuhu-tuhu, peran peminpin, hukum-hukum sipil, hukum-hukum kekudusan, ras janji-janji Dibata, i bas bindu 12 nari seh 26. Khususna bahan khotbahta sendah masuk i bas perikop alu judul “Undang-undang si deban”, i bas Alkitab TB-LAI nina “Tentang melindungi sesama manusia”. Judul i bas bhs. Ind. lebih jelas nggambarkenca kerna isi bahan khotbahta sendah, si isina ngajuk bangsa Israel gelah mediate ras nampati kalak pertandang, anak-anak melumang, ras diberu balu-balu. Palasna jelas i bas ay. 18 & 22, “Inget maka budak kap kam nai i Mesir, janah TUHAN Dibatandu si mbebasken kam; e me sabapna maka kubereken man bandu perentah enda”.

I bas ogenta, kiniteken si nggeluh e me kiniteken si teridah i bas perbahanen alu pekena-kena anak-anak melumang ras kalak si enggo mbalu si lit i bas kiniseran, tapi i bas ay. 27 ikataken “njaga diri gelah ola icedaken doni enda”, ertina motivasi si jadi palas i bas nampati e me guna kemulian gelar Dibata labo guna pamer entah pe gelah iidah kalak si deban, si e me agama (ibadah) si tuhu-tuhu.

Invocationta ngerana kerna pedah-pedah Tuhan Yesus man ajar-ajarNa, niNa, sampatilah kalak si la ngasup ersimulih man bandu, erkiteken perbahanen si e nge si ngena ate Dibata ras Dibata si ersimulih man bandu (ay. 14).

Aplikasi

I bas kerina bahan Pustaka si Badianta sendah, engkai maka mediate ras nampati anak melumang, kalak pertandang, diberu balu-balu, ras kerina kalak si lit i bas kiniseran, jadi stressing point entah pe penekanen? Jawabenna, si pemena lebe erkiteken lenga turah kesadaren i bas mediate ras nampati kalak si membutuhken maka ibahan Dibata undang-undang si rinci i bas mediate ras nampati kalak si membutuhken. Ate Dibata i bas nampati e ula erkiteken isuruh lebe maka silakoken, entah pe ula erkiteken lit ukumen makana silakoken, tapi tuhu-tuhu lit kesadaren si proaktif i bas mediate ras nampati kalak si membutuhken penampat. Si peduaken, motivasi i bas nampati perlu sipelimbarui, e me la ngarapken balasen i bas kalak si isampati ras tuhu-tuhu guna kemulian gelar Dibata.

Tema si seh man banta e me “Erdiakonia alu payo”. Lit kin diakonia si la payo? Entah pe i bas penungkunen si deban, diakonia si uga si payo? Erpalasken kerina bahan ogenta sendah lit diakonia si la payo, e me diakonia si ilakoken labo erkiteken lit kesadaren bage pe diakonia si ilakoken guna kepentingen diri sendiri. Diakonia si payo e me diakonia si proaktif ras si motivasina tuhu-tuhu guna kemulian gelar Dibata. Diakonia si proaktif e me diakonia si la berpuas diri i bas kegiaten-kegiaten si sifatna karitatif saja tapi terus-menerus meningkat ku bas pionir pembaharuan (perobahen ku si mehuli) i tengah-tengah masyarakat erpalasken keleng ate Dibata guna kemulian gelarNa.

Ngataken bujur kita man Dibata erkiteken GBKP enggo jadi perpanjangan tan Dibata i bas mediate ras nampati kalak si lit i bas kiniseran. PAK Gelora Kasih, PPOS, YKPC Alpha Omega GBKP ras karya-karya diakonia si deban e me bukti nyata diakonia si enggo ilakoken GBKP secara kelembagaan. Si e kerina tentuna perlu terus sidukung alu keterlibatenta si proaktif gelah reh meningkatna kuantitas bage pe kualitasna. Secara pribadi pe, kita iutus guna er-diakonia man sekelewetta si membutuhken penampat, emaka keterlibatenta i tengah-tengah masyarakat perlu sitingkatken, gelah kehadirenta i tengah-tengah masyarakat sekelewetta lit nanamna ras gelar Dibata termulia i bas kehadirenta i tengah-tengah masyarakat sekelewetta. Mari radu ras kita ertoto gelah ipengasupNa kita er-diakonia alu payo. Dibata si mpegegehi kita.