Khotbah GBKP Minggu Tgl. 6 November 2016

KHOTBAH GBKP MINGGU TGL. 6 NOVEMBER 2016

Nrs. Pdt. Larena br. Sinuhadji (Bp. Rey Tarigan)

Minggu Kesehaten

Invocatio : “La kin ietehndu maka kulandu e me Rumah Pertoton Kesah Si Badia, si ringan i bas kam dingen si ibereken Dibata man bandu? Dirindu e labo kam empuna. Sabap kam enggo itukur Dibata meherga kal. Dage muliakenlah Dibata arah kulandu” (1 Korinti 6:19-20)

Ogen : Jesaya 38:1-20 (Tunggal)

Khotbah : 1 Tesalonika 5:23-24 (Tunggal)

Tema : KULANDU E ME RUMAH PERTOTON KESAH SI BADIA

Penjelasen Bahan Pustaka Si Badia

Invocationta e me persinget rasul Paulus man perpulungen Korinti maka kalak si tek, kulana enggo jadi ringring Kristus, pertendinna enggo ersada ras Tuhan, janah Kesah si Badia enggo ringan bas kulana. Ertina kalak si tek enggo lanai banci rate-ate man kula ras pertendinna, apai ka ipergunaken guna erlagu la mehuli (erlua-lua, percabulan), sebab kula ras pertendinna enggo jadi sikerajangen Dibata.

Ogenta nuriken kerna raja Hiskia, raja kerajan Juda si pe-12-ken, si paksa si e sangana sakit ras nandangi mate. Kenca enggo ibegina berita kematenna i bas nabi Jesaya nari, ertoto ia man Dibata. Alu tangis ipindona gelah ipepalem Dibata pinakitna. Ialoken Dibata pemindon Hiskia, ipegedang Dibata umurna 15 tahun nari. Isi pertoton Hiskia nuduhkenca maka enggo isembahna Dibata alu tutus dingen patuh, janah tetap ngelakoken kai si ngena ate Dibata. Memang tuhu, i bas 2 Raj. 18 ituriken maka raja Hiskia enggo erbahan pembaharuan ras minpin bangsana nembah Dibata mulihken.

Bahan khotbahta e me pedah perpudi ras salam penutup surat rasul Paulus man perpulungen Tesalonika, si isina kata-kata pergegeh ras pengarapen maka Dibata si mereken kemalemen ate, erbahanca badia i bas kai pe, engkawali kesah, tendi ras kula bersih i bas kesalahen nari asum kerehen Tuhanta Yesus Kristus pagi. Janah Dibata si ndilo guna tetap setia ras si erbahanca maka si enda banci jadi.

Aplikasi

Tema si seh man banta e me “Kulandu e me rumah pertoton Kesah si Badia” i bas rangka Minggu Kesehaten. I bas invocationta enggo jelas maka kula ras pertendinta enggo jadi sikerajangen Dibata. Enda perlu isedari sebab adi enggo jadi sikerajangen Dibata maka iajuk kita guna secara bijaksana mengelola kula ras pertendinta. Kerina pola perukuren, pola konsumsi, ras perbahanen si banci mabai kita ku sakit-pinakit arus sihindari. Isilah perukurenta alu Kata Dibata ras lakokenlah Kata Dibata e i bas kegeluhenta, maka pola konsumsinta pe seimbang sebab Dibata si mereken kepentaren man banta kerna si e.

I bas ogenta tangkas man banta maka Dibata si erkuasa nandangi kesehaten ras umur manusia. Ertina, perlu sitotoken secara teratur kesehaten kula ras pertendinta. Tapi perlu ka sisedari maka Dibata si nentukenca kerinana. Tugasta e me tuhu-tuhu njagai kesehaten pertendin ras kulanta alu memanfaatken waktu si lit guna rukur si mehuli, konsumsi si seimbang, ras ngelakoken kerina si mehuli sue ras peraten Dibata.

I bas bahan khotbahta isingetken mulihi kita kerna pendilo Dibata man banta guna tetap setia i bas kinitekenta man Dibata. Sebab Dibata ngenca si ngasup mereken kemalemen ate si tuhu-tuhu, Dibata ngenca si ngasup mabai kita ku kerina si mehuli ras badia, Dibata ngenca si ngasup ngkawali kesah, tendi, ras kulanta bersih. I bas kesetianta kuasa Dibata serta i bas kegeluhenta.