Khotbah GBKP Minggu Tgl. 16 Oktober 2016

KHOTBAH GBKP MINGGU TGL. 16 OKTOBER 2016

Pdt. Larena br. Sinuhadji (Nd. Reynard Tarigan)

MINGGU ZENDING GBKP

Invocatio : “O Tuhan, i bas perpulungen bangsaNdu kumomoken, berita si mehuli kerna keselamaten si iberekenNdu. IetehNdu kap e Tuhan, maka la pernah aku ngadi ngerana kerna si e” (Masmur 40:10)

Ogen : Masmur 34:1-15 (Responsoria)

Khotbah : Roma 15:15-21 (Tunggal)

Tema : TETAPLAH ERBERITA

Penjelasen Bahan Pustaka Si Badia

I bas bahan ogen si pemena, icidahken Pemasmur e me Daud puji-pujinna man Tuhan asum ia lompat i bas Saul nari si atena mbunuh ia. Isampati Abimelek Daud ras anak buahna i bas ncukupi kebutuhen jasmani paksa si e. Janah i bas situasi si e ka, ipekulah-kulah Daud maka ia la demsa entah pe bagi kalak mehado asum ia berhadapen ras Akis, raja Gat, erkiteken mbiar ras gentarna Daud (bdk. 1 Sam. 21:1-15). Tuhan mereken keselamaten man Daud.

I bas perikop enda icidahken Daud pengataken bujurna rikut ras puji-pujin si meganjangna man Tuhan erkiteken pertolongen Tuhan (ay. 2, “lalap aku ngataken bujur man Tuhan; kupuji IA la erngadi-ngadi”, ay. 3, “kupuji IA”). Jelas arah perikop enda Pemasmur tuhu-tuhu ernalem ras erpengendes man Tuhan i bas kiniseran si ialamina ras isampati Tuhan (ay. 5,7, “i bas kebiaren, kiniseran, ertoto dingen erlebuh man Tuhan, ibegiken Tuhan pertotonna”). Kalak si itindih si erbahanca aru ate, erkiteken pengarapenna tetap man Tuhan, isampati Tuhan ras meriah ukurna, la nari aru atena. Bahkan ikirimken Tuhan malekatNa guna ngkawali  dingen mulahisa i bas sura-sura kalak jahat nari man kalak si tetap erpengerapen man Tuhan.

I bas bahan khotbah, si ibere judul “Sura-sura Paulus si mbelinna e me meritaken Berita si Meriah”, teridah kemegahenna erkiteken ipake Tuhan ia guna banci nehken Berita si Meriah secara khusus man kalak si labo Yahudi. Lias ate Dibata si enggo mengangkat Paulus jadi pejabat Kristus Yesus (Bhs. Ind. : “pelayan Kristus Yesus”), khususna man kalak si labo Yahudi. Sabab sedekah enda, bangsa-bangsa i luar Yahudi kurang ipeduliken bahkan iangap rendah. Tapi Berita si Meriah terbuka man ise pe alu la erdobahen, dingen Firman Tuhan e mengubah kegeluhenta seh makana sidalanken si ngena ateNa, maka kegeluhenta desken sada persembahen si nggeluh man Dibata.

Berita si Meriah silumbaken Paulus man kalak si labo Yahudi imaksuduken gelah geluhna erkemalangen man Dibata. Banci kalak si labo Yahudi enda erkemalangen man Dibata arah erbage-bage dalan si itempuh Paulus, antara lain :

• Arah Kata/Firman Tuhan si ipesehken ras arah perbahanen
• Arah gegeh tanda-tanda sengget si mbelin
• Arah gegeh Kesah si Badia

Janah ketedehen ate Paulus si mbelinna kel e me meritaken Berita si Meriah ku ingan i ja lenga pernah ibegi kalak kerna gelar Kristus. Labo hanya dalam rangka menjaga gelah ula terjadi persaingen entah pe tumpang tindih (“ula tempa-tempa aku majekken rumah i babo palas si enggo ipajekken kalak si deban”), tapi gelah banci serser berita kerna keselamaten i bas Yesus Kristus. Janah sejarah mencatat melala daerah i ja enggo pajek perpulungen kalak Kristen erkiteken pelayen Paulus : Korinti, Epesus, Pilipi, Galati, Tesalonika, ras memberdayaken kalak si enggo tek guna banci er-PI ka : Timotius, Titus, Pilemon, Onesimus ras melala denga pemimpin-pemimpin jemaat lokal si berdayakenna.

Aplikasi

Lit lagu KAKR mpersingeti kita guna terus erberita, ersaksi kerna kuasa ras keleng ate Tuhan, nina, “Bersaksi t’rus sampai Tuhan datang”. Seh kerehen Tuhan si peduakaliken tugasta bersaksi, erberita. Labo bersaksi kerna kehebatenta, kiniulinta, tapi perbahanen Tuhan si luar biasa si enggo sialami segedeng-gedang geluhta, bersaksi kerna keselamaten si enggo ibahan Tuhan nandangi kita manusia, bersaksi kerna kuasa Tuhan Yesus si la ersibar. Bagi Pemasmur i bas Invocationta ngatakenca, “I bas perpulungen bangsaNdu kumomoken berita si mehuli kerna keselamaten si enggo iberekenNdu, janah la ateku ngadi ngerana kerna si e”.

Dahin meritaken Berita si Meriah la banci ngadi idahiken kalak si tek asa gedang geluhna, ras e tugasta, labo hanya Serayan Tuhan. Meritaken Kata Dibata labo hanya terjeng bas Gereja tapi i bas kerina dampar geluhta, kai pe profesinta ras erbage-bage bentuk. Umpamana, melalui nde-enden, lukisen, tarian, buku, keteladanan, perbahanen si mehuli, rsd. Labo hanya bersifat verbal tapi pe non-verbal, bahkan si enda banci lebih menyentuh asangken hanya melalui kata-kata tapi lenga bo tentu silakoken. Umpamana, kejujuren sesekalak i bas lingkungen si korup merupaken sada kesaksin si luar biasa asangken khotbah muluk kerna kejujuren padahal si ngkhotbahkenca pe lenga bo tentu jujur. Arah gaya hidupta pe kita enggo banci naksiken kerna kuasa ras keleng ate Yesus (sabar, meteruk ukur, empati, meriah ukur, bertanggung jawab, rajin, rsd.). I bas media sosial, i bas ingan erdahin, i tiga, i sekolah-sekolah i je pe kita erberita si meriah. Kehadirenta mabai perobahen ku si mehuli.

Minggu Zending enda mpersingeti kita, maka meritaken Firman Tuhan (er-Marturia-eta Erberita Si Meriah), tetap arus silakoken selaku kalak si tek, sabab e perentah Tuhan Yesus man banta. Eta er-berita si meriah seh ngayak Tuhan reh peduakaliken. Alu kata ras perbahanenta sipembarken Kata Dibata. Aminna mbue tantangen si man alanken ula sempat bene ukurta. Daerah PI-nta arus siperluas, ula hanya antar Klasis tapi daerah-daerah si deban siteh kita lenga seh Berita si Meriah ku je. Erberita kita arah toto, dana, tenaga, talenta, ide-ide si membangun rsd.