PA Kategorial GBKP Tgl. 9 - 15 Oktober 2016

PA MAMRE GBKP TGL. 9 - 15 OKTOBER 2016

Nrs. Pdt. Larena br. Sinuhadji (Bp. Rey Tarigan)

Bencana Sosial (Narkoba, HIV/AIDS, Judi, Begal)

Teks : 1 Raja-raja 21:7-14

Tema : ULA BABAI KALAK SI DEBAN ERDOSA

Tujun : Mamre ngasup :

1) Ndaftarken perbahanen si mpeturah kecedan i tengah masyarakat

2) Nuriken cara nilahken perbahanen si mpeturah kecedan masyarakat

Metode : Diskusi Gambar (Kliping Koran, Video Youtube)

Penjelasen Bahan Ogen

Ogenta sendah lit i teruh judul “Peken anggur Nabot”, si nuriken kerna sura-sura raja Ahap si atena nukur peken anggur sikerajangen Nabot si letakna deher istana raja. Tapi la seh sura-sura raja Ahap erkiteken Nabot si mpuna peken e la nggit mpelepas taneh pusaka nini-ninina (ay. 3). Ndele ras nembeh kel ate raja Ahap erkiteken la seh sura-surana. Iturikenna kai si enggo ialamina e man ndeharana ratu Isebel. Seh i jenda situhuna banci ipepalemna pusuh raja Ahap, tapi kebalikenna, ipemelasna pusuh Ahap ras ibahanna rencana jahat nandangi Nabot. Singkat cerita, kenca enggo ibahan ratu Isebel surat si isina fitnah man Nabot, mate Nabot erkiteken ibenteri batu, kenca bage irampasna peken anggur Nabot jadi sikerajangen raja Ahap. Kai si ilakoken raja Ahap ras ratu Isebel tuhu-tuhu jahat i lebe-lebe Dibata. I bas ay. 25 ikataken, “La pernah lit seri kalak bagi Ahap tutusna ngelakoken si jahat i bas adep-adepen TUHAN. Kerina kejahaten e ilakokenna bekas penjemba-jemba ndeharana Isebel”. Merawa Dibata nandangi raja Ahap, isuruh Dibata nabi Elia guna mpeseh berita ukumen man raja Ahap ras ndeharana ratu Isebel. Amin pe raja Ahap erkadiola i bas kejahaten si enggo ilakokenna, ukumen Dibata tetap jadi man bana ras kesusurenna.

Aplikasi

Arah bahan ogenta sendah erlajar kita kerna kejahaten si ilakoken erkiteken pengaruh lingkungen si la mehuli. I bas ogenta pe banci sinen pihak-pihak si murah ipengaruhi guna erbahan jahat, bagi peminpin-peminpin ras kalak si iergaken kalak Jesreel. Tapi banci sinen, kai pe kejahaten si ilakoken sekalak jelma, kedungenna enggo pasti ukumen. Tema i bas PA-nta sendah “Ula Babai Kalak Si Deban Erdosa” alu tujun gelah Mamre ngasup ndaftarken perbahanen si mpeturah kecedan i tengah masyarakat ras nuriken cara nilahken perbahanen si mpeturah kecedan masyarakat. I bas rangka Bencana Sosial (Narkoba, HIV/AIDS, Judi, Begal). Bentuk-bentuk kejahaten i bas paksa gundari enda enggo melala. I bas si e tentuna ula kita terpengaruh, sebab kejahaten bagi narkoba, HIV/AIDS si terjadi erkiteken mengkonsumsi narkoba, bage pe judi, lalan terjadi erkiteken pengaruh lingkungen si la mehuli. Dalan si mehulina si banci ilakoken kita e me ertoto man Dibata gelah ijagaiNa kita i bas pengaruh-pengaruh si banci ncedai kita, keluarganta, ras masyarakat sekelewetta. Pilihlah pergaulen si positif ras membangun. Janah proaktif kita membendung bencana sosial alu kepedulianta man generasi muda ras lingkungenta.

PA MORIA GBKP TGL. 9 - 16 OKTOBER 2016

Pdt. Larena br. Sinuhadji (Nd. Rey Tarigan)

Memaksimalkan Potensi Hidup (Jasmani)

Ogen : Pengerana 12:1-8, Johanes 9:4

Tema : KULA GUNA NGELAI TUHAN

Tujun : Gelah Moria :

1) Nuriken pengangkanna kerna erti ras guna kulana

2) Erbahan tekad ergiah-giah makeken kula guna ngelai tupung lit denga kesempaten

Metode : Mengevaluasi seh i ja ia enggo makeken kulana

Penjelasen Bahan Ogen & Aplikasi

Geluh enda erpaksa-paksa (Pengerana 3), lit paksana sehat lit ka paksana kita sakit, lit paksana nguda dingen megegeh lit ka paksana enggo metua ras kote la ngasup erkai pe. I je me pentingna bijaksana dingen beluh kita makeken waktu ras kesempaten si ibereken Tuhan man banta asum sehat ras megegeh denga kita, alu memaksimalkan potensi (talenta, kemampuan, gegeh, rsd.) si lit bas kita.

Pengerana mpersingeti, tupung paksa nguda ingetlah Tuhan si nepa manusia. Semboyan hidup “Nikmatilah hidup selagi masih muda” mabai enterem anak muda si menyia-nyiaken masa mudana alu erbahan si la ngena ate Tuhan : pergaulan bebas, seks bebas, mengkomsumsi narkoba, rsd. Kenca enggo metua, turah penyesalen la lit nari gunana, sabab waktu la nari banci iputar. Seh me kari paksana daging kula enggo metua, dingen enggo terbatas kengasupenta guna berkarya. Pengerana ncidahken kondisi enggo metua, si erbahanca bagin kula manusia terbatas fungsina : mata enggo seleng enggo magem pengidahna, tan dingen nahena kote la nari ergegeh, ipen enggo naktaken la nari ngasup cingatngat, pemegi enggo urak, la nari entabeh pertunduh (la nari badeh pertunduh e), mbiar ketinggian, enggo lit uban, nahe isaren-saren tupung erdalan, dingen kerina kerincuhen la nai lit. Perlawesta kempak pengandi-ngadin si rasa lalap.

Barang-barang pe lit masana seh makana ceda la nari erpungsi, subuk si meherga, bage pe si megegeh : rante pirak, lampu emas, tinali si enteguhna. Badanta mulihken jadi abu sabab taneh nge ndube asalta, ras kesah mulihken ku Dibata sabab Tuhan si ngembusken kesah makana manusia banci nggeluh (bdk. Kej. 2:7).

Nggeluh si singkat i bas doni enda arus ipergunaken semaksimal mungkin guna banci kita berkarya, jadi pasu-pasu (berkat) man enterem kalak ras memuliaken Tuhan. Melala contoh banci siidah, kalak si secara fisik disabilitas (berkebutuhan khusus) tapi banci alu maksimal geluhna erguna man kalak si deban, sebage contoh : Nick Vujicic si tubuh tanpa lengan ras nahe, tapi genduari banci jadi pembicara internasional guna  jadi motivator man enterem kalak. Enggo berkeliling 24 negara, 4 benua. Lena Maria si la lit tanna, janah nahena sebelah kiri lebih kitik. Umur 18 tahun denga enggo juara renang nasional Swedia ras gundari penyanyi mancanegara, rsd.

Mari simaksimalken potensi i bas dirinta guna banci kita berkarya, melayani tupung sehat ras megegeh denga. Ula sisia-siaken geluh si enggo ibereken Tuhan man banta. “Kita arus ndahiken dahin si nuruh Aku sanga terang denga wari; sabap reh me gelap janah paksa si e ise pe la ngasup erdahin. Pemasmur pe ngatakenca, “Dage ajari kami ngertiken uga gendekna umur geluh kami, gelah kami jadi kalak pentar.” Melala pernanden si membuang waktu alu hal-hal si kurang berguna : ngerumpi, jalan-jalan ku Mall, dekahen aktif bas dunia maya piah dungna kurang berbuat i dunia nyata, rsd. Moria GBKP arus mampu memaksimalkan potensi geluhna asum lit denga waktu ras kesempaten ibereken Tuhan guna berkarya, melayani keluarga ras sesama.