PJJ GBKP Tgl. 23 - 29 Oktober 2016

PJJ GBKP TGL. 23 - 29 OKTOBER 2016

Pdt. Larena br. Sinuhadji (Nd. Rey Tarigan)

Tema : GEREJA RAS DIAKONIA (Matius 25:31-46)

Penjelasen Bahan Ogen & Renungen

Judul ogenta sendah i bas Pustaka si Badia e me “Ukumen i bas wari pendungi” termasuk i bas kumpulen khotbah Yesus kerna pendungi jaman (bindu 24-25). I bas judul ndai enggo jelas maka isi ogenta sendah e me gambaren kerna kai si bakal terjadi i bas wari pendungi entah pe akhir jaman. Lit dua terpuk si enggo ibagi Dibata. Terpuk si pemena e me si lit i bas kemuhen Dibata, ndatken pasu-pasu i bas Dibata nari, ndatken ingan i bas Kinirajan Dibata, ras ndatken kegeluhen si tuhu-tuhu si la erkeri-kerin. Si e kerina idatken kalak si enggo ilakokenna si jadi peraten Dibata, e me mediate (peduli) ras nampati kerina kalak si musil si membutuhken penampat. Terpuk si peduaken ndatken ukumen si rasa lalap erkiteken la mediate ras la nggit nampati kalak si musilna si lit isekelewetna si membutuhken penampat. Arah gambaren kerna kai si bakal terjadi i bas wari pendungi enda teridah maka sura-sura Dibata nandangi kalak si tek man baNa e me ngelakoken kerina si jadi peratenNa termasuk salah sadana mediate, ngelai ras nampati kalak si musilna si membutuhken penampat.

Pendahin si ilakoken Yesus paksa IA nggeluh denga i doni enda labo erkhotbah ngenca, tapi pe er-diakonia. Kata “diakonia” ibuat i bas kata Yunani nari “diakoneo” ertina, ngelai sesekalak si ganjangen kedudukenna. Kenca kerehen Yesus, erti diakonia enda ipelimbarui jadi ngelai sesekalak si keduduken sosialna lit i teruh, entah pe kalak si musil (bdk. Mat. 20:26; Luk. 22:26,27). Diakonia erpalasken si enggo ilakoken Yesus e me : “Semua bentuk pelayanan yang berorientasi pada tindakan Allah di dalam Yesus Kristus yang membela, membebaskan, dan berpihak kepada orang-orang yang lemah dalam rangka menghadirkan tanda-tanda Kerajaan Allah”. Kerina bentuk pelayanen e bersifat holistik : multi dimensional (tubuh, jiwa dan roh), multi sektoral (ekonomi, politik, sosial ras budaya), ras lintas SARA (suku, ras, agama, dan antar golongan). I bas perkembangen selanjutna, i Gereja lit jabaten khusus diakonos (dilaki) ras diakonissa (diberu) e me sekalak serayan si selalu siap sedia hadir pada saat dibutuhkan dan proaktif melihat kebutuhan orang-orang yang dilayani.

Tema si seh man banta i bas PJJ sendah e me “Gereja ras Diakonia”. Lit sekalak teolog J.C. Sikkel si ngatakenca The church can live without buildings. Without diakonia the church dies (Gereja dapat hidup tanpa gedung. Tetapi tanpa diakonia, gereja mati). Ertina diakonia e me nafas kegeluhen gereja. Gereja banci ikatakan gereja si tuhu-tuhu adi lit diakoniana. Ngataken bujur kita man Dibata erkiteken enggo melala karya diakonia si enggo ilakoken GBKP i tengah-tengah masyarkat Karo. Si fenomenal baru-baru enda e me i bas tanggap bencana deleng Sinabung. GBKP iakui masyarakat Indonesia sebage lembaga religius si tuhu-tuhu mediate ras nampati korban bencana deleng Sinabung. Si enda tentuna perlu sipertahanken ras sitingkatken kualitas ras kuantitasna i bas kerina tingkaten : Runggun, Klasis, Moderamen, erpalasken sifat diakonia si holistik ndai. Gelah gelar Dibata termulia arah kerehen GBKP i tengah-tengah masyarakat sekelewetna.

Gereja e me kita, kerina kalak si tek si enggo ndatken keselamaten i bas Yesus Kristus. Erpalasken si e tentuna tugas diakonia e me tugasta kerina pribadi lepas pribadi labo hanya secara kelembagaan. Si jadi penungkunen uga kepedulianta nandangi teman-temanta si membutuhken penampatta? Enggo kin kepedulianta e mabai kita nehken penampatta man teman-temanta si membutuhken? Akap kami tentuna kerina kita enggo mediate ras erpala-pala nampati kalak si membutuhken penampatta. Saja ngenca mungkin perlu sitingkatken kuantitas ras kualitasna i bas bentuk-bentuk diakonia si deban si banci ilakoken kita.

Lit 3 bentuk diakonia e me : karitatif, reformatif, ras transformatif. Umumna si iteh kita e me bentuk karitatif, contohna bagi nehken sumbangen alu bentuk bantuan sembako, sen ras material si deban, beasiswa, rsd. Bentuk reformatif e me erbahan pusat-pusat kesehaten, pendidiken, ras pengembangen ekonomi (CU/CUM). Adi kita sekalak dokter umpamana, banci iban kita pengobaten alu erga si i bawah standar (entah pe gratis) secara berkala (sebulan sekali umpamana) man masyarakat sekelewetta. Adi kita sekalak guru, banci iban kita perpustakaan gratis man anak-anak terlantar i sekelewetta. Adi kita sekalak ekonom, kita banci jadi pemrakarsa pembentuken CU/CUM i tengah-tengah masyarakatta. Bentuk transformatif e me pembaharuan perukuren nandangi persoalen-persoalen si terjadi i bas masyarakatta, umpamana penyadaren kerna kelestarian lingkungan si nandangi ceda alu erbahan pupuk organik. Penyadaren kerna hak-hak buruh, hak-hak hukum ras politik man sekelewetta alu erbahan penyuluhan, rsd. Kerina bentuk diakonia enda akap kami perlu sicubaken ilakoken kita, baik secara pribadi bage pe secara kelembagaan Gereja.

I bas terpuk si apai si ateta idatken kita sanga wari pendungi kari? Tentuna la lit kita si nggit lit i bas terpuk si ndatken ukumen. E maka pindolah gegeh i bas Dibata nari gelah ipengasupNa kita ngelakoken kerina si jadi peratenNa. Dibata si mpegegehi kita.