PA Kategorial GBKP Tgl. 23 - 29 Oktober 2016

PA MAMRE GBKP TGL. 23 - 29 OKTOBER 2016

Nrs. Pdt. Larena br. Sinuhadji (Bp. Rey Tarigan)

Ogen : Ende-enden Salomo 4:1-4

Tema : GUNA ISE KINIJILEN NDEHARA?

Tujun : Gelah Mamre

1) Nuriken kuga Salomo ngidah kinijilen ndeharana

2) Ndaftarken (menginventarisasi) kinijilen ndehara

Penjelasen Bahan Ogen

Bahan ogenta termasuk si jarang iogeken entah pe ijadiken bahan-bahan PA entah pe PJJ, mungkin i bas sada tahun enda, sekali enda ngenca iogeken sada bagin i bas kitab Ende-enden Salomo nari (Kidung Agung entah pe i bas terjemahen si deban “Kidung yang terindah”). Alkitab Edisi Studi ngatakenca kitab Ende-enden Salomo enda banci masuk ku bas Pustaka si Badia erkiteken ngelambangken keleng ate Tuhan nandangi bangsa Israel. Banci jadi perbandingen Hos. 1-3 ras Jer. 2:20-3:5 si nggambarkenca hubungen antara Dibata ras Israel bagi perbulangen ras ndeharana. Lit ka penafsiren si ngatakenca kitab enda ngelambangken hubungen si harmonis antara Yesus Kristus (mempelai dilaki) ras Gereja (mempelai diberu).

Ogenta sendah i bas Pustaka si Badia masuk ku bas perikop si ibere judul “Ende-enden si peteluken” i bas Alkitab TB-LAI nina “Mempelai laki-laki memuji mempelai perempuan”. Ogenta ncidahkenca ekspresi kekagumen Salomo nandangi ndeharana si luar biasa jilenna. Ekspresi kekagumen enda ibahasaken alu bahasa si romantis erpalasken keleng ate Salomo nandangi ndeharana. Akap kami ogenta sendah si payona ioge secara lengkap ay. 1-16. Gelah teridah maka kinijilen sekalak ndehara labo terjeng tampak luar saja secara fisik (eksotis), tapi pe teridah kinijilen arah bas nari. Kinijilen ndehara arah bas nari banci inanami Salomo arah : keleng atena si tuhu-tuhu (ay. 10), pengeranana si mehuli (ay. 11), kai pe si ilakokenna mpeturah kemalemen ate ras pasu-pasu (ay. 12-15).     

Aplikasi

Tema si seh man banta e me sada penungkunen “Guna ise kinijilen ndehara?” Jawabenna, si pemena lebe tentuna guna kemulian gelar Dibata, si peduaken guna perbulangen, anak-anak, keluarga si deban, bage pe si peteluken guna sekelewetna. Kinijilen i jenda tentuna ula iertiken secara fisik eksotis ngenca, sebab adi e si jadi ukuren melala ndehara si la masuk i bas kriteria fisik si eksotis ndai. Kinijilen i jenda si utamana perlu iertiken kinijilen i bas cara rukur, pengerana, bage pe kinijilen i bas tingkah laku. Intina arah kinijilen si lit i bas ndeharanta tuhu-tuhu banci mabai kemalemen ate ras pasu-pasu man banta bage pe sekelewetta. Penungkunenna, uga carana maka kinijilen ndeharanta e tuhu-tuhu banci ikembangken alu mehuli arah kehadirenta sebage perbulangen gelah kinijilen e banci maba kiniulin ras pasu-pasu? Peranta i jenda tentuna mendukung kai pe si mehuli si lit i bas ndeharanta gelah kerina si mehuli si lit i bas kepribadian ndeharanta banci berkembang guna kemulian gelar Dibata bage pe banci jadi pasu-pasu man sekelewettna, terutama man banta sebage perbulangen ras anak-anak.    

Tujun i bas PA-nta sendah, gelah Mamre nuriken kuga Salomo ngidah kinijilen ndeharana, ras ndaftarken (menginventarisasi) kinijilen ndehara. Selain dukungen man ndeharanta, keleng ate (cinta kasih) man ndehara pe perlu iekspresiken bagi Salomo nandangi ndeharana. Enda merupaken salah sada kelemahen Mamre secara umum. Ekspresi keleng ate si romantis biasana ngasup icidahken kita sanga mbaru denga erjabu. Kenca enggo puluhen tahun erjabu, ekspresi si romantis e enggo la nai lit. Si e tentuna perlu siperobahi gelah reh harmonisna hubungenta ras ndeharanta. E maka sada aksi si banci silakoken kita i bas PA-nta sendah e me mendaftarken kinijilen ndeharanta i bas sada tulisen si banci isehken kita man ndeharanta.

PA MORIA GBKP TGL. 23 - 29 OKTOBER 2016

Vic. Rinaldy Girsang

Gelah reh teremna Moria si tutus muat bagin i bas pelayanen

Si Man Ogen : Perbahanen Rasul 16:11-15

Tema : ULIH KETUTUSEN I BAS PELAYANEN

Tujun : Gelah Moria :

1) Makeken pengalamen Lidia jadi penjemba i bas encidahken ketutusen

2) Ngarihken cara gelah reh teremna Moria ikut muat bagin i bas pelayanen

Metode : Diskusi ras aksi : Iendesken man Moria guna erbagi tugas erbahan PRT (Perkunjungen Rumah Tangga)

Penjelasen Bahan Ogen & Aplikasi

Pelayanan nandangi Gereja e me bagin tanggung jawab selaku kalak si tek man Tuhanta. Saja lit pengangkan maka pelayanen nandangi Gereja entah perpulungen e tugas Pandita, Pertua bage pe Diaken entah pe tanggung jawab Serayan saja. Sehingga lit sikap seolah-olah pelayanen e siserahken saja man Serayan erkiteken ia enggo ipilih janah iangkat i tengah-itengah Gereja. Si enda erbahanca kita kurang muat bagin i bas pelayanen. Erbahanca kita la tutus bahkan kita menuntut pelayanen yang lebih nandangi Serayan Tuhan i tengah-tengah Gerejanta. Si enda tentu erbahan kita la terlibat i bas pelayanen padahal adi sinen Tuhanta reh guna ngelai labo ielai (Mat. 20:28). Jadi uga dage ninta kerna ayat enda kai dage si banci ilakoken i bas pelayanen i tengah-tengah Gerejanta gelah kerina kita banci muat bagin i bas pelayanen?

I bas Perbahanen Rasul 16:11-15 enda sekalak diberu si enggo mbalu gelarna Lidia. Lidia enda labo sekalak Yahudi ia e me sekalak Yunani dahinna e me erbinaga uis. Lidia tading i Tiatira, i Tiatira nari Lidia pindah ku Pilipi, i je me ia jumpa ras Paulus (i bas 16:14b itulisken Paulus maka italangi Tuhan ukurna e maka tutus atena megiken kai si kataken Paulus). E maka iperidiken Paulus ia (ayat 15) janah menurut cataten ia me diberu si pemena si tek nandangi Yesus arah negeri Yunani nari. Kenca iperidiken Lidia ncidahken ungkapen riah ukurna alu ndilo Paulus kesilang ku rumahna.

Perjumpan Lidia ras Paulus janah i bas kuasa Tuhan erbahanca Lidia jadi kalak si tek nandangi Tuhan janah ngaloken Berita si Meriah (Injil) janah Injil e erbuah i bas geluh Lidia. Buahna banci idah piga-piga i bas perjumpaan e, e me : Ngaloken Paulus reh ku rumah Lidia, Lidia nampati Paulus ras teman-temanna i bas nikapken ingan bage pe keperlun geluh tep-tep wari. Janah pe perjumpaan Paulus ras Lidia e jadi cataten tersendiri man Paulus seh tersurat gelar Lidia i bas Pustaka si Badia, sekali ngenca gelar Lidia tercatat i bas Padan si Mbaru.

Kisah Lidia enda banci jadi inspirasi bage pe jadi penjemba khususna man Moria guna pelayanen i tengah-tengah Gereja. Moria selaku kategorial i tengah-tengah Gerejanta ikut lebih erdiate i bas pelayanen, Moria iajuk gelah terus terlibat i bas pelayanen-pelayanen si lit i tengah-tengah Gerejanta. Labo terjeng menuntut pelayanen ngenca nandangi Serayan subuk Pertua, Diaken ras Pandita. Tapi merubah paradigma berpikir jadi sekalak pelayan maka kerina kita idilo guna ngelai alu nehken pelayanen i tengah-tengah Gerejanta. Adi banci paradigmata seh ku bas paradigma pelayanan si proaktif (labo terjeng aktif saja tapi ikut pe bergumul/ngukuri pelayanen si lit i bas tengah-tengah Gerejanta) subuk i bas PA Moria, dahin-dahin Gereja bage pe jadi perberita si nehken Berita si Meriah i tengah-tengah Gerejanta. Tentu Berita si Meriah e e me berita kerna kebaikan Tuhan labo keburuken kalak situriken.

E maka arah PA Moria enda iarapken khususna man Moria i tengah-tengah Gereja gelah nggejapken maka keterlibatan i bas pelayanen e me sada bentuk buah kiniteken man Tuhan. Bagi buah kiniteken Lidia, kai dage si banci sibahan nandangi Gerejanta sebage tanda buah kinitekenta man Tuhan. Tentu melala, alu mendukung pelayanen, terlibat i bas pelayanen, terlibat kemajuan program pelayanen Gereja. Tentu adi alu tutus ateta ngelai Tuhan i tengah-tengah gereja maka lit nge kerina upah kalak si tutus ngelai sebab kai si isuan e ka nge siperani (Gal. 6 : 7) sisuan si mehuli tentu e ka nge pagi ialoken sebab bage me arusna. Melala hal dengan si banci ilakokeken i tengah-tengah Gerejanta. Adi radu ras kerina kita nehken pelayanen tentu enda erbahanca kita ersada, adi kita ersada tentu dahin-dahin si man dahinken e menahang siakap ndahikennca erkiteken lit kiniersadaan ras kerja sama kita kerina.