Khotbah GBKP Minggu Tgl. 23 Oktober 2016

KHOTBAH GBKP MINGGU TGL. 23 OKTOBER 2016

Pdt. Larena br. Sinuhadji (Nd. Reynard Tarigan)

MINGGU REFORMASI GEREJA

Invocatio : “Enda me sababna maka la kami erleja-leja dingen la lesek ate kami. Aminna pe kula kami enda reh burukna reh dekahna, tapi ukur kami tep-tep wari ipelimbarui” (2 Kor. 4:16)

Ogen : Epesus 4:23-31 (Responsoria)

Khotbah : Jeremia 1:10-19 (Tunggal)

Tema : MBUNGKAR RAS PEKENA PERBAHANEN SI LA PAYO

Penjelasen Bahan Pustaka Si Badia & Aplikasi

Bahan Invocationta merupaken kata motivasi i bas Paulus entah penjemba subuk man dirina jine bage pe man enterem per-Berita si Meriah si mengalami erbage-bage kiniseran (bdk. 2 Kor. 4:7-12 : itindih, iripuk, bingung, iayak-ayak musuh, idampesken kalak, rsd., tapi tetap tegar).  Jasmaninta (daging kula) secara otomatis reh metuana, reh rontokna adi reh meganjangna umur, apai ka adi ikenai erbage-bage pinakit ras kiniseran. Secara otomatis daging kula lemah. Tapi labo secara otomatis banci ngkenai kegeluhen pertendinta. Adi tetap penalementa man Tuhan, maka ipengasupNa kita megenggeng ras tetap ermeriah ukur i bas ndalani kegeluhenta. Ras e me si ialami Paulus.

I bas bahan khotbahta, Jeremia ibereken Tuhan kuasa sebage nabi si enggo ipilih Tuhan minpin bangsa Israel guna mbungkar dingen ngeruntuhken, ngkernepken, ngeradasken ras menteki dingen nuan mulihken. Enggo pasti sebage nabi si nguda denga ras mbaru tentu sada kebiaren man Jeremia sabab ia sendiri metehsa uga karakter bangsa Israel, i ja orang tuana sedekah enda erdahin sebage imam. Lit dua pengenehen Jeremia, si pemena kerna sada ciken kayu ketapang. I ja nina Tuhan mejehe ateNa ngenehen kataNa idalanken. Si peduaken, idahna kudin taneh luam isina, rehna i utara nari. Si ertina, i utara nari reh me ukumen lako ngukum kerina kalak Jerusalem si enggo erdosa man Tuhan, i ja itundalkenna Tuhan, isembahna dibata-dibata si deban. Ibahanna gana-gana je nari nembah man bana. Tugas Jeremia arus ngelumbaken kebenaren, kai si enggo ikataken Tuhan gelah terjadi pertobaten, refomasi perukuren i bas kegeluhen bangsa Israel. Tuhan sendiri enggo ngatakenca maka benaken raja-raja bangsa Israel terus ku pegawai, imam ras pendudukna la banci lang keke guna ngelawan Jeremia. Sabab la senang ipersingeti ras itegur guna bertobat. Janah Tuhan mulihi mpetetap Jeremia. Ola Jeremia mbiar, sabab padan Tuhan maka Tuhan tetap ras Jeremia dingen si mulahisa (ay. 8,19). Janah ibereken Tuhan gegeh lako ngelawan ia kerina. La banci Jeremia tertaluken, sabab ibahan Tuhan Jeremia bali ras kuta si erbenteng, desken binangun besi dingen bagi tembok tembaga.

Bahan ogenta bagin si pemena ngerana kerna kegeluhen si mbaru i bas Kristus. Paulus tegas ngatakenca, maka pusuh ras perukuren perpulungen arus ipelimbarui. Hidup baru i bas Tuhan teridah i bas perobahen sikap hidup. Adi sedekah enda erbual, gundari arus nuriken si tuhu-tuhu. I bas merawa kita, terkuasai kita banta, janah ola simpan rawanta seh ben wari (lit pengendalian diri, sabab adi ndekah banci kesempaten man Iblis guna menggoda kita). Kalak si biasa nangko, enda la nari ia nangko tapi erdahin alu tutus ras banci ka geluhna jadi pasu-pasu man kalak si deban. I bas pengerananta adi biasa cakap si la mehuli ibelasken (la membangun), enda kata-kata si berguna, si banci nampati kalak si deban rikut perluna. Tadingken ACC (anceng, cian, cikurak), siisak-isaken, pernembeh, perampus, elem-elem, tapi nggeluh sikeleng-kelengen sapih-sapih kita, bagi Kristus enggo ngkelengi kita.

Minggu enda bengket kita ku bas minggu Reformasi Gereja. Usia Reformasi Gereja i bas tahun enda enggo 499 tahun (1517 - 2016). Ertina enggo nandangi 5 abad ndekahna Gereja-gereja Reformasi si ipelopori Reformator, khususna Luther ras Calvin, ipake Dibata mabai kalak si tek man Yesus Kristus ku bas ajaren si benar erpalasken Kata Dibata. Labo seh je saja, Gerakan Reformasi Gereja enggo mabai perobahen si mehuli man peradaban manusia i bas doni enda. Amin pe tentu saja lit kelemahenna, erkiteken la lit ise pe si sempurna i bas doni enda. Minggu Reformasi Gereja enda mabai kita ku bas refleksi kerna kegeluhenta sebage kalak si tek man Yesus Kristus. Khususna erkawiten ras tema sendah, “Mbungkar Ras Pekena Perbahanen Si La Payo”. Esensi kalak Kristen e me perobahen ku si mehuli sue ras peraten Dibata i bas Yesus Kristus. Perobahen enda terjadi i bas proses terus-menerus menuju pada kesempurnaan Kristus. Tentuna enda labo proses si murah. Mbukar ras pekena perbahanen si la payo e me perjuangen si mberat. Tapi bagi pengalamen Jeremia ras rasul Paulus, tek kita maka Dibata si mpegegehi ras mpengasup kita mperobahi si la payo i bas dirinta ras sekelewetta.