Khotbah GBKP Minggu Tgl. 7 Agustus 2016

KHOTBAH GBKP MINGGU TGL. 7 AGUSTUS 2016

Minggu XI Kenca Trinitatis (Minggu HAM)

Pdt. Larena br. Sinuhadji (Nd. Reynard Tarigan)

Invocatio : “Mbiarlah man Tuhan janah metengetlah ndahiken dahinndu sabab Tuhan Dibatanta la ateNa kalak nipu ntah pe kalak si erbahan keputusen rayo-ayo ntah pe si ngaloken sogok” (2 Kronika 19:7)

Ogen : Ulangen 10:12-22 (Responsoria)

Khotbah : Galatia 3:15-29 (Tunggal)

Tema : LA ERDOBAHEN I LEBE DIBATA

Penjelasen Bahan Pustaka Si Badia

Invocationta ngerana kerna pembaharuan si ilakoken Josafat si jadi raja i Juda. Ia jadi raja i bas umurna 35 tahun ras memerentah selama 25 tahun. Aminna ia ngelakoken kai si payo iakap Tuhan tapi lenga bo bulat kel ukurna ernalem man Tuhan, sabab lenga bo isontarkenna ingan ersembah man berhala, si erbahanca bangsa Israel enda lenga ersembah alu bulat ukur man Dibata. Janah si jadi soroten teksnta, i je Josafat mereken persinget man Hakim-hakim gelah tetap metenget erbahan keputusen, “Mbiarlah man Tuhah janah metengetlah ndahiken dahinndu, sabab Tuhan Dibatanta la ateNa kalak nipu ntah pe kalak si erbahan keputusen rayo-ayo ntah pe ngaloken sogok”.

I bas bahan ogenta si pemena, Tuhan mereken persinget man bangsa Israel arah Musa gelah bangsa enda erkemalangen man Tuhan alu bulat ukur, ula nai mekeng. Dibatanta, Dibata si mbelin ganjangen asa kerina dibata-dibata si deban ras gegehen asa kerina kuasa-kuasa si deban. IA Dibata si mbelin dingen mbisa. Dibata si la erayo-ayo dingen la ngaloken sogok. Dibata jine setia ngelakoken man bangsaNa jine terlebih man anak melumang ras diberu mbalu-mbalu, bage pe kalak tandang-tandang. Jelas, Dibata pe mindo gelah bangsa enda tuhu-tuhu engkelengi Tuhan ras ngkelengi kalak si deban. Sada si arus iinget bangsa enda, maka marenda pe bangsa enda tandang i Mesir. Kai si ilakoken bangsa enda alu setia man Tuhan rikutken nehken kekelengen man manusia alu la erdobahen situhuna tujunna guna bangsa e jine, gelah kesangapen ras kejuah-juahen tetap jadi sikerajangenna (ay. 14).

Arah bahan khotbahta sekali nari rasul Paulus mpersingetisa kerna fungsi undang-undang sebage pengantar naruhken kita kempak Gurunta e me Kristus si erbahanca kita terkelin. Manusia iperdameken ras Dibata labo alu matuhi undang-undang tapi alu kinitekenna man Kristus.

Ituriken rasul Paulus, maka Dibata enggo erpadan man Abraham (bdk. Kej. 12:2; 13:14; 15:1,5,18; 17:2), janah perpadanen Dibata ras Abraham enda la ise pe banci mbatalkenca termasuk undang-undang Taurat si rehna 430 tahun kemudian (bdk. Kel. 12:40). Dibata nehken pasu-pasuNa erkiteken perpadanenNa man Abharam (ras kesusurenna e me Kristus, nen Matius 1:1, ras kita anak-anak Kristus), labo erkiteken kepatuhen manusia nandangi hukum Taurat. Penungkunen retoris si iban Paulus ras jawabna jine, Kai tujun undang-undang? Undang-undang ilitken guna ieteh manusia maka ia kalak perdosa, enggo mbue ilanggarna perentah Tuhan (sebage cermin, apakah hidup manusia sudah sesuai dengan kehendak Allah atau belum?). Labo undang-undang e si nelamatken tapi Kristus Yesus i bas pengorbanenNa i kayu persilang. Undang-undang e iperluken (erguna) seh reh sekalak i bas kesusuren Abraham. Janah Kristus enggo reh, undang-undang la nari iperluken. Ay. 24, undang-undang e desken pengawas si tugasna naruhken kita kempak Gurunta, e me Kristus, gelah kita iperembaken ras Dibata erkiteken kinitekenta. Arah kiniteken e me maka kerina kita jadi anak-anak Dibata i bas persadan ras Kristus, si enggo ipersada arah lakon peridin seh maka lit biak-biak Kristus i bas kita. Ertina, ope Kristus reh, terjadi pengkotak-kotaken, Jahudi non-Jahudi, kalak bersih ras meluat, dilaki ras diberu. Tapi kehadiren Kristus ras pengorbanen Kristus merubuhken tembok-tembok pemisah. Dage lanai bo erndobah kalak Jahudi entah kalak Junani, budak entah kalak bebas, dilaki ras diberu. Sabap kerina nge kam sada i bas Kristus Yesus.

Pengkenaina

Minggu enda bengket kita ku bas Minggu HAM (Hak Azasi Manusia), maka kerina manusia alu la erdobahen ngaloken hak si seri i bas Dibata nari. Hak guna nggeluh, berpasangen, datken tempat tinggal, ndatken pendahin, istirahat i bas pendahinna, hak guna beribadah, rsd. Janah hak-hak manusia e enggo isahken i bas Sidang Umum PBB i Paris 10 Des. 1948 si terdiri 30 pasal. Piga-piga contoh umpamana hak guna nggeluh (ps. 3), hak atas kebebasan berpikir, berkepercayaan, dan bernegara, beragama, rsd. Tek kita alu litna Deklarasi PBB kerna HAM enda, Dibata erdahin guna mpeturah kesadaren i bas bangsa-bangsa i doni enda guna tuhu-tuhu ngergai HAM i tengah-tengah situasi nggeluh i ja penghargaan nandangi HAM berkurang entah pe menam bene erkiteken melala perang ras penjajahen si terjadi paksa si e.

Uga sikap gereja nandangi HAM enda? Tentuna gereja enggo melala ikut muat bagin i bas penghargaan nandangi hak-hak dasar manusia ras HAM. Melala gereja enggo er-Diakonia nampati melala kalak si susah, menderita, korban-korban pelanggaran HAM, rsd. I bas wadah PGI pe, melala gereja enggo er-Oikumene, saling menghargai latar belakang sada ras si debanna, bage pe saling bekerja sama i bas dahin-dahin pelayanen baik secara internal bage pe eksternal. Amin pe melala denga si arus itingkatken i bas gereja-gereja er-Diakonia ras er-Oikumene. Dibata si la erndobahen enggo siupayaken siimani ras silakoken i bas gereja-gereja termasuk gerejanta GBKP.

Dibata si la erndobahen pe jadi evaluasi man banta kerina perpulungen. Adi sekalak pengusaha kita umpamana, enggo kin sibereken kerina si menjadi hak pegawai-pegawaita? Sebab melala denga pengusaha si la iberekenna hak guna beribadah man pegawai-pegawaina. Adi sekalak pegawai kita, enggo kin siteh kai-kai saja si menjadi hakta sebage pekerja? Sebab melala denga pekerja-pekerja si enggo pe ibereken hakna guna beribadah, tapi waktu guna beribadah e ipakena guna overtime i bas dahinna gelah ndatken sen tambahen. Sebage sekalak Bapa ras Nande i tengah jabu, enggo kin saling siergan sada ras si debanna alu saling mereken kai-kai saja si menjadi hakna, bage pe man anak-anakta. Adi melala senta, ula sitahanken guna mereken gizi si terbaik guna anak-anakta, umpamana. Sebage anak PERMATA i tengah jabu, enggo kin sibereken kai si menjadi hak-hak orang tuanta? Tuhu-tuhu mehamat kita man orang tuanta, umpamana. I bas relasinta ras sapih-sapihta pe, mari radu ras kita la erayo-ayo erpalasken status, kinibayaken, gender, rsd., erkiteken kehadirenta i doni enda guna saling ngergai, ngkelengi, melengkapi sada ras si debanna, subuk man kalak bayak entah pe mesera, erpangkat entah pe kalak biasa, dilaki entah pe diberu, rsd.

Malem kel ateta sebab Dibata si isembah kita, Dibata si seri pengidahna, Dibata si ngkelengiNa kita alu kekelengen si serta. Alu bage sebage anak-anak Tuhan mari siusih perbahanen Tuhan man banta. Kita me perpanjangen tan Tuhan guna ngergai ras ngkelengi kalak si deban.