PA Kategorial GBKP Tgl. 7 - 13 Agustus 2016

PA MAMRE GBKP TGL. 7 - 13 AGUSTUS 2016

Pdt. Larena br. Sinuhadji (Nd. Rey Tarigan)

Kurangna Dukungan Mamre Nandangi Ndehara

Ogen : Kejadin 12:10-20

Tema : NGERGAKEN RAS NGKAWALI NDEHARA

Tujun : Mamre ngasup :

1) Nuriken tanggung jawab perbulangen i bas ngergaken ras ngkawali ndehara

2) Nuriken kai-kai saja si arus ilakoken guna ngergaken ras ngkawali ndehara

Penjelasen Bahan Ogen

Abram entah pe Abraham umumna igelari “bapa kalak si tek”, amin pe la lit gelar “bapa kalak si tek” i bas Pustaka si Badia. Mungkin gelar e erpalasken surat Galati bindu 3 entah pe surat Roma bindu 4. Tapi terlepas i bas si e, gelar “bapa kalak si tek” enggo semal ibelasken janah memang payo bahwasana Abraham banci jadi usihen i bas kinitekenna man Dibata (bdk. Heber 11:8). Tapi sebage bapa kalak si erkiniteken tentuna Abram enda labo kalak si sempurna, lit sada-sada paksa si nuduhkenca bahwasana Abram la erkiniteken man Dibata, bagi bahan ogenta sendah. Mbaru denga Abram idilo Tuhan guna nadingken kutana berkat ku Kanaan. Kenca enggo seh Kanaan kepeken lit kelihen si mesangat, e maka berkat ia kentisik ku Mesir. Kenca enggo seh Mesir, mbiar Abram ibunuh kalak Mesir erkiteken seh kel jilena Sarai ndeharana. E maka isuruhna Sarai ngatakenca sebage turangna labo ndeharana. Labo sekali enda saja Abram erbahan bagi si isuruhna man ndeharana Sarai, i bas bindu 20 pe ikatakenna ka Sara sebage turangna, alu alasen i bas bindu 20:11-12 nina, “Kuakap kin la lit sekalak pe i jenda kalak si mbiar man Dibata. E maka mbiar aku ibunuh kalak guna ndatken ndeharangku. Tuhu nge ia turangku. Ia anak bapangku tapi la kami sada nande, e maka kuempoi ia”. Memang payo si nikataken Abraham, tapi kai si nilakokenna e seri ras erbual erkiteken mbiar ia ibunuh ras gelah aman ia.

Tapi Dibata tetap nampati Abram i bas kinilangasupenna e, iukum Tuhan raja Mesir erkiteken ibuatna Sarai, bage pe i bas bindu 20 ndai, ipersingeti Tuhan Abimelek alu nipi erkiteken ibuatna Sara ndehara Abraham, e maka iulihkenna Sara man Abraham. Kai si nilakoken Abram e tentuna la banci jadi usihen, tapi adi sinen i bas konteks eproses denga Abram i bas kinitekenna man Dibata, maka banci ikataken turi-turin i bas bahan ogenta sendah merupaken pembelajaren man kita si ngogesa. I bas proses selanjutna Abraham tetap berusaha setia nandangi Sara ndeharana seh kematenna, bage pe i bas kinitekenna man Dibata seh Abraham ngaloken padan Dibata man bana jadi nini melala bangsa.

Pengkenaina

Tema i bas PA-nta sendah e me “Ngergaken Ras Ngkawali Ndehara”, alu tujun gelah Mamre ngasup nuriken tanggung jawab perbulangen i bas ngergaken ras ngkawali ndehara, bage pe ngasup nuriken kai-kai saja si arus ilakoken guna ngergaken ras ngkawali ndehara. I bas jaman genduari tentuna enggo melala Mamre si lanai bagi perbapan kalak Karo si ndekah. Enggo melala Mamre si ertanggung jawab i bas ngergaken ras ngkawali ndeharana. Apai ka enggo melala pengajaren-pengajaren iman Kristen si ialoken Mamre kerna geluh perjabun kalak Kristen. Umpamana pengajaren rasul Paulus kerna nggeluh perjabun sebage perbulangen ras ndehara i bas 1 Kor. 7:1-40, perbulangen nandangi ndeharana i bas Kol. 3:19, bage pe pengajaren rasul Petrus man perbulangen i bas 1 Pet. 3:7.

Kai si enggo terjadi i bas kegeluhen Abraham tentuna banci jadi pembelajaren man banta Mamre gelah reh ertanggung jawabna kita i bas ngergaken ras ngkawali ndeharanta. Prinsip keseimbangen i bas nggeluh perjabun banci siterapken alu saling mendukung sada ras si debanna, i bas mpebelin anak, i bas pendahin masing-masing, bage pe i bas pelayanen i Gereja. Dibata si mpengasup kita mpeteruk dirinta i lebe-lebe Dibata gelah ipengasupna kita jadi Mamre si tuhu-tuhu ertanggung jawab ngergaken ras ngkawali ndehara.

PA MORIA GBKP TGL. 7 - 13 AGUSTUS 2016

Pdt. Larena br. Sinuhadji (Nd. Rey Tarigan)

Ogen : Kejadin 39:6-23

Tema : TETAP UKUR

Tujun : Gelah Moria :

1) Ngidah ketetapen ukur Jusuf i bas ngalaken godan nandangi kinitkenna

2) Ngasup netapken ukur (konsisten) i bas ndalani kegeluhenna

Metode PA : Sharing

Penjelasen Bahan Ogen

Jusuf banci ikataken sekalak tokoh bas Pusata si Badia si tetap berintegritas amin mbue tantangen si man hadapenna. Jusuf e me salah sada i bas 13 (ikut Dina) anak Jakub i bas dua ndeharana ras dua gundikna. Jusuf merupaken anak kesayangen Jakub erkiteken ia tubuh i bas ndehara si seh kel ikelengi Jakub e me Rahel ras Jusuf tubuh kenca Jakub enggo metua (ps. 37:3). Erkiteken cian ate seninana man bana, maka Jusuf idayaken man rombongen kalak Ismael ras kedungenna idayaken ka man Potifar, sekalak pegawai istana Raja Mesir, Firaun (ps. 37:36; 39:1). Potifar e me kepala pengawal istana. Amin bas negeri kalak pe, Jusuf tetap ikawali, iarak-arak Tuhan, seh maka sangap ia i bas kerina pendahinna. La perlu ikata-kataken Jusuf man Potifar, tapi banci ieteh Potifar sendiri maka Dibata ngarak-ngarak Jusup (“Ieteh tuanna, maka Tuhan ngarak-ngarak Jusuf”; “Setelah dilihat tuannya, bahwa Yusuf disertai Tuhan”). Ertina, arah kerina pengkebet geluh Jusuf banci ieteh Potifar maka Jusup kalak si erkemalangen man Tuhan (ketutusen, kinijingkatenna, kejujurenna, rsd). Meriah ukur Potifar ngidah lagu langkah Jusuf, e maka ibahanna jadi suruh-suruhenna jine, e me ngurus rumahna ras kerina ertana, bahkan iendesken Potifar kerinana man Jusuf. Kata kunci i jenda Tuhan si ngarak-ngarak Jusuf (Tuhan menyertai Yusuf); Dibatalah kunci kesuksekan Jusuf termasuk kai pe si idahikenna.

Jusuf paguh dagingna dingen rupana pe mejile. Enggo pasti melala diberu si rate ngena, termasuk ndehara Potifar mulai leket ukurna man Jusuf. Igodana Jusuf, ipindokenna gelah ras ia medem. Peluang ras kesempaten guna ngelakoken si la mehuli lit i lebe matana, bahkan labo ia si mindosa, tapi la pakena kesempaten e. La ipake Jusuf pemikiren si dangkal, tapi gedang ia rukur, maka la atena mengkhianati tuanna si enggo mehuli man bana ras mereken kepercayaan e man bana. Perban mehulina tuanna, nina Jusuf, “Seri kuasangku ras ia i bas rumah enda, janah kerina enggo iendeskenna man bangku seyakatan kam perban kam ndeharana”. Kesetianna man tuanna (tuanku mempercayaiku) terlebih kesetianna man Tuhan erbahanca tetap paguh pendirian ras kiniteken Jusuf (“Bagaimana aku bisa melakukan kejahatan besar ini, dan berdosa terhadap Allah”). Sabab, aminna gia tep-tep wari iendik-endikna Jusuf, lalap la nggit Jusuf medem ras ia. Pencobaan si ialami Jusuf labo murah, sabab labo hanya sekali, dua kali irayuna Jusup tapi tep-tep wari iendikna Jusuf. Adi kin labo kalak si erkemalangen man Tuhan enggo pasti roboh pertahanen e.

Sada wari (banci jadi enggo isusun strategi ndehara Potifar) maka la lit sekalak pe suruh-suruhen Potifar i rumahna, Jusuf bengket ku rumah bagi semalna ndahiken dahinna, itagangi ndehara Potifar baju Jusup ras ipindokenna gelah ras ia medem. Tapi sekali nari menang Jusup i bas pencobaan e. Ipulahi Jusuf banna, kiam ia ndarat, itadingkenna bajuna bas tan diberu e. Je nari ibahan ndehara Potifar cerita palsu, maka iperkosa Jusuf atena ia man suruh-suruhenna. Cerita si seri iturikenna man perbulangenna. Situhuna, ieteh Potifar maka cerita ndeharana irekayasa. Tandaina Potifar ndeharana, bage pe ietehna maka Jusuf kalak si erkemalangen man Tuhan. Adi kin tuhu-tuhu enggo lit pelanggaran seksual “percobaan perkosaan”, la mungkin itadingken Jusuf bajuna sebage barang bukti, bahkan hukumen si bakal isehken labo hanya penjara tapi hukumen pancung (hukumen mati). Jusuf itamaken man tutupen. Mulihi Tuhan tetap ngarak-ngarak dingen masu-masu Jusuf, e maka ngena ate kepala penjaga rumah tutupen e man bana. Mulihi kepercayaan si mbelin ibereken man Jusuf, isuruhna Jusuf ngurus kerina kalak tutupen si deban, janah iendeskenna man bana kerina tanggung jawab kerna kai si ilakoken i bas rumah tutupen e. Erkiteken Tuhan si ngarak-ngarak Jusuf, kai-kai si idahikenna jore kerina.

Pengkenaina

Konsisten, tetap ukur, e me temanta i bas minggu enda. Terkadang konsisten kita asum la lit tantangen, godaan, sitandai banta kita kalak si taat, erkiniteken. Tapi konsisten e arus ka ibuktiken asum lit erbage-bage tantangen. Apakah tetap kita seorang yang berintegritas? 3(ta) umumna si erbahanca kadang kita goyah (Tahta, Harta dan Wanita/Pria). Tapi rikutken bahanta sekali enda, erlajar kita arah intergritas Jusup. E maka si arus silakoken kita gelah tetap ukurta (konsisten) e me :

• Ula sempat kita dilemahkan oleh erbage-bage situasi
• Ula kita tertipu oleh erbage-bage rayuan (godaan)
• Ula kita tergiur nandangi hasil (kesuksesan) si sekejap tapi banci mbeneken kita kedungenna
• Dibatalah tetap siban ingan penalementa, IA si ngarak-ngarak geluhta, gelah i ja pe kita sidatken kemalemen ate.