Khotbah GBKP Minggu Tgl. 31 Juli 2016

KHOTBAH GBKP MINGGU TGL. 31 JULI 2016

Minggu Perawaten Inventaris Gereja

Pdt. Larena br. Sinuhadji (Nd. Reynard Tarigan)

Invocatio : “Madin sada wari i bas RumahNdu asangken seribu wari i bas ingan si deban. Madin tedis i bas gerbang Rumah Dibatangku asangken ringan i bas rumah kalak jahat” (Masmur 84:11)

Ogen : Nehemia 7:70-73 (Tunggal)

Khotbah : Johanes 2:13-17 (Tunggal)

Tema : ERGAKEN RAS PEBADIAKEN RUMAH PERTOTON

Penjelasen Bahan Pustaka Si Badia

Peristiwa Tuhan Yesus merawa i Rumah Pertoton sabab enggo ialihfungsiken tercatat i bas kerina Injil, subuk Injil Sinoptik ras Injil Johanes. Tapi jelas lit perbedaanna. I bas teluna Injil Sinoptik Yesus mengutip Yes. 56:7 ras Yer. 7:11, sedangken Injil Johanes la lit kutipen je nari. I bas injil Sinoptik la lit lembu, biri-biri, cambuk. Ras si paling menonjol, i bas Injil Sinoptik kegiaten enda ilakoken i bas tahap akhir pelayanen Yesus sedangken i bas Injil Johanes ilakoken awal pelayanen Yesus.

Tradisi bangsa Israel nehken persembahen i bas erbage-bage peristiwa entah pe tupung ia erbahan dosa man Tuhan, maka imanfaatken para imam guna makeken kesempaten e lako erbisnis. Sabab persyaraten rubia-rubia si arus ipersembahken man Tuhan arus si mehuli, la lit cacatna, maka imam bekerja sama ras pengusaha rubia-rubia si banci ipersembahken i bas Rumah Pertoton. Umumna bas pengusaha si tertentu ndai maka kurban persembahen enggo layak, la lit cacatna. Lit kalak si nukari duit (money changer). Usaha-usaha si ialoken e enggo pasti lit pajakna ku Rumah Pertoton (Imam-imam). Bage me kira-kira situasi i bas Rumah Pertoton asum Yesus reh ku Jerusalem ope wari raya Paskah. Idapeti Yesus i bas Rumah Pertoton e kalak si erbinaga lembu, biri-biri ras nderepati. Lit pe kalak si nukari duit. Reh Yesus alu merawa, cambuk si enggo idandanna alu tinali ndai ipakena guna ngeligasi asuh-asuhen gelah ndarat i bas Rumah Pertoton e nari janah itunggalikenNa meja-meja kalak si nukari duit, seh maka merap duitna kerina.

Alu tegas Yesus merawa man kalak si erbinaga nderapati gelah ngangkat kerina barang binagana, ula bahan Rumah Tuhan (Rumah Bapangku) jadi ingan erbinaga. Kai si ikataken Yesus ngigetken ajar-ajarNa kerna kai si enggo isuratken i bas Pustaka si Badia, maka Pemasmur ngatakenca, “O Dibata keleng ateku nandangi RumahNdu, ngukut desken api”.

Kai si ibahan Tuhan Yesus enggo pasti erbahan la senang pemimpin-pemimpin agama si enggo pasti berkurang sen masukna. E maka nina, “Tanda sengget kai banci ibahanNdu guna nuduhken man kami maka lit hakNdu erbahan si enda kerina?” E maka nina Yesus, “Runtuhken Rumah Dibata enda, maka i bas telu wari enggo banci kupajeken mulihi”. Kai si ikataken Yesus situhununa rikutken tulisen Johanes maka i je Yesus ngerana kerna kematen ras kekekenNa i bas wari peteluken. Enggo pasti la mungkin iakap pemimpin-pemimpin agama e sabab lenga bo tandaina kel Yesus bahkan ibandingkenna ras proses pembangunen Rumah Pertoton e si memakan waktu 46 tahun. Kenca enggo Yesus mate ras keke mulihi, menjadi legitimasi maka ajar-ajar reh tekna nandangi kai si enggo ikataken Yesus bage pe si isuratken bas Pustaka si Badia nari.

I bas pengogen si pemena icidahken man banta i bas pekena Rumah Pertoton si enggo ihancurken kalak Babel, maka bangsa Israel mereken penampatna guna nggalari ongkos pekena Rumah Pertoton Tuhan, subuk gubernur, kepala-kepala terpuk, bage pe bas umat e nari. Tanggung jawab guna pekena Rumah Pertoton Tuhan isedari menjadi tanggung jawab ras-ras.

Aplikasi

Tema si seh man banta, “Ergaken ras pebadiaken Rumah Pertoton”, tole mpersingeti kita uga kita arus ncidahken sikap hormat nandangi Rumah Pertoton. Piga-piga hal si banci silakoken :

• Mengfungsiken Rumah Pertoton e bagi arusna e me ingan ersembah man Tuhan, ingan mpermuliaken Tuhan. Walaupe labo hanya i bas Rumah Pertoton kita ersembah man Tuhan. Tapi secara khusus i bas Rumah Pertototon inganta jumpa ras Tuhan bage pe teman-teman sada kiniteken guna ersembah man Tuhan.
• Pedauh sikap bagi si ilakoken pemimpin-pemimpin agama ras kalak si erbinaga, berbisnis, mencari keuntungen dengan dalih guna kemulian Tuhan. Melala gundari si terjadi adi la kita kritis, alu dalih melayani Tuhan alu erbahan pelayanan doa, penyembuhen tapi di balik si e imanfaatkenna guna ajang berbisnis alu menawarken produk-produk tertentu guna mpebayak sesekalak jelma (pemimpin agama). I bas hal si deban umpamana, melala peristiwa i ja i bas persidangen, la nari lit sikap pebadiaken Rumah Tuhan. Rubati, merawa-merawa i bas persidangen Gereja si ilakoken Pelayan-pelayan Tuhan. Bage pe memanfaatken Gereja guna keuntungen pribadi alu merhaten menduduki jabaten tertentu, rsd. Si e kerina perlu menjadi bahan perenungen man banta guna semakin memurnikan dahin-dahin pelayanen i bas Gerejanta.
• Kerina bertanggung jawab guna menjaga kebersihan, mpekena-kena Rumah Pertoton termasuk menjaga inventaris Gerejanta. Labo hanya tugas Koster ras BPMR tapi tugas kerina jemaat Tuhan.

I bas Minggu Perawaten Inventaris Gereja enda mulihi kita ipersingeti kerna kebadian Rumah Pertotonta, mari radu ras kita mpekena-kena Rumah Pertotonta ras merawat inventarisna ibenaken i bas dirinta sekalak-sekalak.