PA Kategorial GBKP Tgl. 24 - 30 Juli 2016

PA MAMRE GBKP TGL. 24 - 30 JULI 2016

Pdt. Larena br. Sinuhadji (Nd. Rey Tarigan)

Ogen : 1 Raja-raja 3:9-14

Tema : KEPENTAREN MEREKEN KINIULIN

Tujun : Mamre Ngasup :

1) Nuriken maka keputusen Salomo mindo kepentaren man Tuhan maba kiniulin man bana bage pe man si deban

2) Nuratken piga-piga kepentaren si lit i bas ia

Metode : Nandai Diri

Penjelasen Bahan Ogen & Aplikasi

Ogenta sendah nuriken kerna pemindon raja Salomo man Dibata kenca enggo isungkun Dibata i bas ay. 5, “Kai atendu Kubereken man bandu?” Pemindon raja Salomo man Dibata e me ay. 9 nina : 1) Kepentaren ngerajai bangsaNdu alu kebujuren, i bas Alkitab Bahasa Indonesia Sehari-hari (BIS) nina, “Kebijaksanaan yang kuperlukan untuk memerintah umat-Mu ini dengan adil”, i bas Alkitab Terjemahan Baru (TB-LAI) nina, “Hati yang faham menimbang perkara untuk menghakimi umat-Mu”; 2) Kebeluhen mbedaken si bujur ras si jahat, i bas Alkitab BIS nina, “Dan untuk dapat membedakan mana yang baik dan mana yang jahat, i bas Alkitab TB-LAI nina, “Dapat membedakan antara yang baik dan yang jahat”. Kepentaren entah pe hikmat merupaken kiniulin si meganjangna i bas tradisi kalak Yahudi, janah kepentaren entah pe hikmat si nimaksudken i jenda e me kepentaren i bas Dibata nari. E maka kepentaren e ipindoken Salomo arah Dibata nari.

Secara filosofis kepentaren e me pengertin, pemahamen si mbages berkaiten ras kai pe si terjadi i bas kegeluhen enda. Pengertin ras pemahamen si mbages e mpengasup sesekalak menilai, erbahan keputusen ras erbahan tindaken si benar ras si tepat. I bas definisi filosofis e kepentaren arus meliputi kecerdasen intelektual, kecerdasen emosional, ras kecerdasen spiritual si seimbang. I bas pengertin kerna kepentaren enda ndai pemindon raja Salomo kerna kebeluhen mbedaken si bujur ras si jahat pe situhuna enggo termasuk i bas kepentaren entah pe hikmat. E maka labo hal si berlebihen adi kalak Yahudi meyakini kepentaren entah hikmat e rehna i bas Dibata nari, janah kalak si rembak ras Dibata nge si biasana igelari kalak berhikmat entah pe kalak si pentar. I bas ay. 14 ikataken Dibata secara tersirat bahwasana kalak berhikmat e me kalak si iikutkenna Kata Dibata, ipakena Undang-undang ras pedah Dibata i bas kegeluhenna.

I bas ogenta sendah, iteh raja Salomo apai hal si pentingna i bas geluhna, e me kepentaren i bas Dibata nari, labo erta ras kebayaken. Erkiteken si pentingna kel si ipindona i bas Dibata nari, e maka ibereken Dibata lebihen asangken si ipindo raja Salomo, e me kepentaren ras pengertin si lebih (ay.12), kebayaken ras kemulian (ay. 13), ras umur si gedang (ay. 14).

Tema PA-nta sendah e me “Kepentaren mereken kiniulin” alu tujun gelah Mamre ngasup nuriken maka keputusen Salomo mindo kepentaren man Tuhan maba kiniulin man bana bage pe man si deban ras nuratken piga-piga kepentaren si lit i bas ia alu metode nandai diri. I bas tema, tujun, ras metode PA-nta sendah, iajuk kita gelah ngusih raja Salomo si mindo hal si pentingna kel i bas geluh enda, e me kepentaren arah Dibata nari. Kepentaren e banci idatken kita arah : 1) Pemindonta i bas pertotonta man Dibata alu tutus. 2) Erlajar kerna Kata Dibata la erngadi-ngadi. 3) Ngelakoken kerina Kata Dibata e i bas geluhta si tep-tep wari.

PA MORIA GBKP TGL. 24 - 30 JULI 2016

Pdt. Larena br. Sinuhadji (Nd. Rey Tarigan)

Ogen : Pilipi 1:18-25

Tema : NGGELUH GUNA KRISTUS

Tujun : Gelah Moria :

1) Erlajar arah cikepen nggeluh (falsafah) Rasul Paulus

2) Nuriken Pengalamen i bas mpertahanken cikepen nggeluh

Metode PA : Sharing

Penjelasen Bahan Ogen & Aplikasi

Perikop enda ibere judul “Nggeluh e me guna Kristus” sedangken i bas Alkitab TB-LAI “Kesaksian Paulus dalam Penjara”. Arah judul Alkitab bahasa Indonesia jelas ituriken man banta kerna situasi Paulus si i bas penjara nari janah je nari me ia ngirimken suratna man perpulungen Pilipi. Meriah ukurna amin sekali ia ipenjaraken sabab arah si e me reh mbarna Berita si Meriah iberitaken. Piga-piga hal si banci siidah arah suratna enda :

1. La atena kai si enggo idalankenna sia-sia, e maka tetap ergiah-giah ukurna amin lit tantangen, kiniseran sialamina. La pernah ia mbiar i bas ndalani geluh enda. Sura-surana i bas kerina percibalna, subuk nggeluh entah mate gia tama pujin man Kristus.
2. Man bana nggeluh e me Kristus dingen mate reh untungna. Duana ngerintak Paulus, dingen jujur la nari ietehna milihsa. Mesikel ia enggo nadingken kegeluhen enda gelah banci ras Kristus. Tapi adi banci geluhna enda erguna, ernanam man perpulungen Pilipi, man kalak si deban ulin akapna ia tetap nggeluh.

Nggeluh i doni enda sada anugerah si luar biasa pemere Dibata, dingen la sieteh asa kai dekahna kita nggeluh bas doni enda. Si paling penting rikutken cikepen nggeluh Rasul Paulus, maka la atena nia-niaken geluh enda. Ketedehen atena, i bas kerina kecibalna, subuk nggeluh entah mate gia Tuhan imuliaken. Lit deba kita nggeluh ras permatenta pe ncurnaken gelar Tuhan. Banci jadi tupung ia nggeluh mbue perbahanen si la mehuli idalankenna si ncurnaken gelar Tuhan, erbahan sakit ka kalak si deban. Bage pe muatna mate pe, erkiteken sakit-pinakit si ialamina, maka banci jadi curnakenna gelar Tuhan arah ia ertambar ku dukun.

Man banta Moria, cikepen nggeluhta banci jadi berbeda ras Paulus, tapi rikutken tema-nta maka kita nggeluh guna Kristus. Nggeluh si enggo ibereken Tuhan banta arah pengorbanenNa i kayu persilang ula sisia-siaken, asa gegeh ukurta lit mari tetap kita mpermuliaken gelar Kristus. Walau sekali mbue tantangen ras kiniseran ula min sempat tercurna gelar Tuhan. Lit deba kalak erkiteken susahna i bas geluhna enggo ka nipui dahinna, nangko, korupsi, jadi pengedar narkorba. Lit ka deba labo erkiteken musilna, labo kurang duitna, tapi enggo menjadi kebiasan (nagih) korupsi, pengedar narkoba, nungkuni guru si baso gelah tambah-tambah kinibayakenna, rsd. Adi enggo jelas cikepen geluhta, maka nggeluh man banta guna Kristus la nari erbera-bera ukurta asum reh perbeben e nderpa. Kristus tetap simuliaken.