Khotbah GBKP Minggu Tgl. 24 Juli 2016

KHOTBAH GBKP MINGGU TGL. 24 JULI 2016

Minggu Tri Tugas Gereja

Pdt. Larena br. Sinuhadji (Nd. Reynard Tarigan)

Invocatio : “Ngena ateKu man kalak si tutus, Ku bere ia tading i bas rumahKu. Kalak si geluhna la erpandangen Ku bere ia ngelai Aku” (Masmur 101:6)

Ogen : Perbahanen Rasul 1:6-11 (Responsoria)

Khotbah : Lukas 4:38-41 (Tunggal)

Tema : GEREJA SI NDAHIKEN DAHIN-NA

Penjelasen Bahan Pustaka Si Badia

Bahan khotbahta ibere judul “Nterem jelma ipepalem Yesus”, sedangken i bas Alkitab Terjemahan Baru (TB-LAI) ibere judul “Yesus menyembuhkan ibu mertua Simon Petrus dan orang-orang lain”. Yesus e denga ndarat i bas Rumah Pertoton i Kapernaum nari i ja i je pe Tuhan Yesus ncidahken kuasaNa alu mengajar ras mpelawes kalak si setanen. Berita kerna Yesus mbar ku belang-belang daerah e. E maka berkat IA ku rumah Simon Petrus kenca ipindoken kade-kadena man Yesus gelah ipepalemNa mami Petrus  si sangana sakit mekelek. Banci siidah i jenda kerna kepedulian Simon Petrus termasuk kade-kadena nandangi mamina enda. Mulihi alu kuasaNa ipepalem Yesus pinakit mami Simon Petrus enda. Kesembuhen si enggo ialokenna la isia-siakenna, minter ia kuskas nikapken pangan dingen ngelai Yesus ras rombongenNa kerina.

Bage pe kenca matawari sundut, mulihi Yesus ncidahken kuasaNa alu mpepalem kalak si sakit ras kesetanen. Tetap siidah kekelengen sada ras si debanna, i ja kerina kalak maba kade-kadena si erbage-bage pinakitna guna ipepalem Tuhan Yesus. Ipepalem Yesus kerina alu namaken tanNa ku babo kalak si pinakiten. Bage pe kalak si setanen alu kuasaNa ipelawes Yesus. La ibere Yesus kesempaten man setan-setan e ngerana, sabab tandaina Yesus (bdk. kata-kata “Kam kap Anak Dibata”) ras ieteh setan-setan e pe maka Yesus kap Kristus, si engkelini si ipadanken Dibata.

Ogenta ngerana kerna kenangkihen Yesus ku surga. Ope Yesus nangkih, lebe ibereNa kata persinget ras perentah man ajar-ajarNa termasuk kalak si tek, maka ialokenna gegeh asum Kesah si Badia seh man bana kerina, alu bage banci naksiken Yesus man kalak si deban benaken Jerusalem nari, daerah Judea, Samaria seh ku belang-belang doni.

Aplikasi

Minggu enda igelari Minggu Tri Tugas Gereja e me bersekutu, bersaksi ras ngelai. Tugas enda lebe enggo ilakoken Yesus asum IA nggeluh i tengah-tengah doni enda. Pulung i Rumah Pertoton, bersekutu ras kalak si deban, mengajar Kata Dibata alu dem kuasa, bage pe melayani. Yesus erdiate alu reh dingen mpepalem mami Simon Petrus bage pe kalak si deban si sakit bage pe kesetanen. Ertina, kehadiren Jesus i tengah-tengah doni enda tuhu-tuhu alu maksimal ipergunakenNa gelah geluhNa jadi pasu-pasu (berkat) man enterem kalak. Padahal Yesus 33 tahun ngenca geluh i doni enda ras kurang lebih 3 tahun masa pelayanenNa (Lukas 3:23)

Kalak si tek man Tuhan termasuk anggota GBKP si enggo njayo 75 tahun arus terus-menerus geluhna ernanam man kalak si deban. Ola hanya terjeng pulung (Kebaktin Minggu, PJJ, PA, rsd.), tapi terkadang mbuen denga kita rukur guna dirinta. Mami Simon Petrus kenca enggo sehat i bas pinakitna nari la tergengkenna sinik. Minter ia kuskas ras ipakena dirina erguna man kalak si deban. Terkadang kita, asum sakit e mbue kel janji-janjinta alu pengharapen gelah banci min ipepalem Yesus. Tapi kenca enggo sehat lupa kita ngataken bujur man Tuhan. Bersaksi bas biber ngenca luar biasa, maka Tuhan enggo mpepalem pinakitna, tapi la konsisten naksiken kuasa ras keleng ate Tuhan e i bas geluhna.

Kuasa Kesah si Badia enggo ibereken Tuhan Yesus man banta, arah si e me lit gegeh guna kita banci naksiken kerna kekelengen ras kuasaNa seh ku ujung doni enda, tapi benaken bas Jerusalemta nari, benaken jabunta nari.