PA Kategorial GBKP Tgl. 17 - 23 Juli 2016

PA MAMRE GBKP TGL. 17 - 23 JULI 2016

Pdt. Larena br. Sinuhadji (Nd. Rey Tarigan)

Ola Erduaken Tuan (Dibata Ras Erta Doni)

Ogen : Matius 19:16-26

Tema : BIAK RUKUR SI METERIALISTIS

Tujun : Mamre ngasup :

1) Nggejapken maka geluh enda labo kita madasa tapi pemere Dibata guna ibagiken

2) Ncidahken maka Dibata ngenca man sembahen janah arah erta kebayakenta si mpermuliaken Dibata.

Penjelasen Bahan Ogen & Aplikasi

Bahan ogen nuriken kerna dialog Tuhan Yesus ras sekalak dilaki anak perana si bayak kel. Nungkun anak perana ndai kerna kuga arus ibahanna gelah ia dat kegeluhen si tuhu-tuhu si la erkeri-kerin? Ngaloi Tuhan Yesus nina, ikutken kerina pedah Dibata alu merujuk ku 10 Pedah Dibata. Nina anak perana e, kerina e enggo idalankenna, kai nari si kurang? Erjabap Yesus nina, “Adi atendu gelah kam serta, laweslah, dayaken kerina erta-ertandu, jenari bereken duitna man kalak musil, alu bage ialokenndu me erta Surga; jenari reh kam ngikutken Aku”.

Jawapen Tuhan Yesus enda situhuna labo gelah sekalak anak perana enda ndai jadi kalak musil, tapi Tuhan Yesus ngerana kerna prioritas i bas ndatken kegeluhen si tuhu-tuhu, e me labo saja njadiken Dibata sebage si utamana i bas kegeluhen tapi kerna sikap si payo i bas erta kebayaken. Erta kebayaken labo hal si negatif, tapi banci mabai kita ku bas dosa adi erta kebayaken e sijadiken prioritas si utamana i bas kegeluhen enda. E maka sikap si positif nandangi erta kebayaken e me sedar bahwasana kerinana e pemere Dibata labo erkiteken kebeluhenta, labo erkiteken pemetehta, ras labo erkiteken gegehta, tapi si utamana pemere Dibata si arus sipergunaken alu hikmat arah Dibata nari.

Gulut ukur sekalak anak perana si bayak i bas ogenta sendah nuduhkenca bahwasana melala kalak seh asa genduari si terikat i bas erta kebayakenna seh makana erta kebayakenna e jadi dibatana, jadi si utamana, piah dungna enggo la nai lit waktu guna ersembah man Dibata ras la nai lit waktu guna engkelengi sesamana alu erta kebayakenna. E maka arah PA-nta sendah, mari radu ras kita nggejapken maka geluh enda labo kita madasa tapi pemere Dibata guna ibagiken, bage pe cidahkenlah maka Dibata ngenca man sembahen janah arah erta kebayakenta simpermuliaken Dibata.

PA MORIA GBKP TGL. 17 - 23 JULI 2016

Pdt. Larena br. Sinuhadji (Nd. Rey Tarigan)

Ogen : 1 Samuel 24:1-7a

Tema : PIRAH NI KEGELUHEN (JATI DIRI)

Tujun : Gelah Moria :

1) Erlajar arah pirah/biak ni  kegeluhen Daud

2) Naksaken pirah/biak ni kegeluhen selaku pernanden Kristen

Metode PA : Nandai Diri

Penjelasen Bahan Ogen

I bas bahan ogenta sendah, banci kataken Daud mampu mengendaliken sura-sura kedangingenna, mampu menguasai diri, erkiteken Kesah Tuhan si tetap erdahin i bas diri Daud (Bdk. Gal. 5:16-18).

Kenca Daud menang naluken Goliat (1 Sam. 17:41- ), mulai je nari maka lebih populer Daud ibandingken raja Saul, janah arah si e erbahanca iri Saul ras terus-menerus berusaha munuh Daud (1 Sam. 19-).

Secara manusia asum lit kesempaten guna membalas perbahanen Saul pasti la ateta membuang kesempaten, tapi i bas perikop enda, Daud lebih memilih ndalanken si ngena ate Tuhan. Saul ras Rombongenna 3.000 tentera si mbisana i Israel istirahat bas gua i ja bas gua ndai Daud ras rombongenna pe sangana cebuni. Saul la tehsa sabab agak cukup ndauh ku bas ingan Daud ras rombongenna. Teman-teman Daud ngajuk ia, mpengaruhi ia guna banci ibunuhna Saul. Jangan membuang-buang kesempatan. Bahkan lit perkataan guna membenarken perbahanen si la mehuli dengan membungkusa alu kata “Tuhan” (“Enggo ikataken Tuhan maka itamaken musuhndu i bas kuasandu janah banci ibahanndu man bana bagi atendu”).

Nggarang Daud ku ingan Saul labo guna munuhsa tapi ngkeret sada bagin jubah Saul alu la ietehna. Alu sitik jubah ndai nge maka Daud ncidahken man Saul la lit sura-surana munuhsa walaupe lit kesempaten e, sabab keleng kel atena Saul (nehen ay. 15). Daud la terpancing pengendik-endik teman-temanna. Daud la reaktif tapi proaktif la membalas kejahaten alu kejahaten tapi alu kiniulin sabab pembalasen hak Tuhan. Janah igejapina kel kuasa Tuhan nge si ngolangi ia la ndalanken si jahat man Saul, “Sitik pe la banci ia kusakiti sabab ia me raja si ipilih Tuhan”. E me pirah (biak) kegeluhen Daud.

Aplikasi

Tujun si peduaken, ipindoken maka Moria banci naksiken pirah (biak) ni kegeluhen selaku pernanden Kristen. Ertina, pernanden saja ras pernanden Kristen enggo arus lit bedana, sabab pernanden Kristen geluhna idemi kuasa Kesah si Badia.

Sope jadi Moria si tutus banci jadi karakterta ACC, perampus, perpusuh, perbenceng, perbual, rsd. Tapi kenca enggo tutus ngikutken Tuhan Yesus, tutus sebage Moria si erkemalangen man Tuhan, ambah warina reh ulihna. Enggo ngasup ngampar bana, mengendaliken diri, la terpengaruh ajakan (bujuken) si la mehuli i bas kalak si deban nari. Kemalangenta man Tuhan sicidahken arah pengkebet geluhta si tep-tep wari, termasuk i bas ngkelengi teman. Perbuatan baikta la itentuken arah perbahanen kalak man banta. Kalak mehuli banta kita mehuli man bana, kalak la mehuli man banta kita tetap erbahan si mehuli.