Khotbah GBKP Minggu Tgl. 10 Juli 2016

KHOTBAH GBKP MINGGU TGL. 10 JULI 2016

Minggu Kuasa Dibata Menang Nandangi Kuasa Kegelapen

Pdt. Larena br. Sinuhadji (Nd. Reynard Tarigan)

Invocatio : “Kalak si tek lit pagi tandana e me : ipelawesna setan-setan i bas gelarKu, ngerana ia i bas cakap si mbaru” (Markus 16:17)

Ogen : Daniel 2:24-30 (Tunggal)

Khotbah : 1 Raja-raja 18:36-46 (Tunggal)

Tema : TALUKEN KEGELAPEN I BAS GELAR TUHAN

Penjelasen Bahan Pustaka Si Badia

Bahan invocationta merupaken bagin i bas pedah Tuhan Yesus, termasuk pengutusen ope IA nangkih ku Surga. Ajar-ajarNa arus lawes niari doni enda, je nari meritaken Berita si Meriah man kerina manusia. Ras tanda kalak si tek, “ibereken Tuhan kuasa guna mpelawes setan-setan i bas gelar Yesus ras ngerana i bas cakap si mbaru”.

Bahan ogenta ngerana kerna kengasupen Daniel nuriken nipi raja ras antusenna. Raja ernipi, janah erkiteken nipi e erbahanca susah ukurna dingen la banci ia tunduh. Mesikel kel ia meteh antusenna. Maka dilona kerina guru-guru si beluh ngoge nasip, guru permangmang, guru pertendung ras guru si baso lako nuriken erti nipi e. Tapi la lit sada pe si ngasup. Ipindoken Daniel man Ariok komandan Pengawal Raja guna banci ibere kesempaten ngertiken nipi raja. Ituriken Daniel ka sura-surana man teman-temanna guna banci ikut mendukung i bas doa, sabab Dibata ngenca si mada kuasa si ngasup mpetangkas kai si terbuni si lenga terantusi manusia. Berngina, ipetangkas Dibata man Daniel kerina rahasia e arah pengenehenen. Kenca si e la lupa Daniel muji-muji Tuhan (Daniel 2:20-23). Ibaba Ariok Daniel guna njumpai raja. Nina raja, “Ngasup kam nurikenca kai nipingku e ras kai antusenna?” Nina Daniel, “O raja, labo lit guru si baso, guru permangmang, guru pertendung entah pe ahli bintang si ngasup nurikenca man bandu. Tapi lit kap Dibata i surga si mpetangkasa rahasia-rahasia”. Ituriken Daniel nipe raja ras kai antusenna. Alu peristiwa enda, Daniel enggo ncidahken man raja Nebukadnesar maka la lit terganjangen ras terbeliden seyakaten Dibata si mada kuasa.

Bahan khotbahta nuriken kerna perlawanen Nabi Elia ras 450 nabi-nabi Baal asuhen raja Ahab ras Isebel. Kenca 3,5 tahun lego erkiteken kejahaten bangsa Israel i ja tundalkenna Tuhan je nari ersembah man dibata-dibata si deban, maka ersura-sura Tuhan pesusur lau udan. Cara si iban Elia e me alu nehken persembahen bakaren alu sada jenggi lembu si enggo igeleh ras ilapahi. Tama i babo ranting tapi la banci pegara api. Bage me si bakal ilakoken nabi-nabi Baal ras Elia. Kesempaten pemena ibereken man nabi-nabi Baal. Benaken pepagi nari seh jam 3 karaben landek-landek, ndilo Baalna alu sora si megang, bahkan igarisina dagingna alu rawit, seh maleren darehna, tapi la lit kai pe si terjadi. Kesempaten berikut ibereken man Elia. Ipersiapkenna daging lembu i bas batar-batar si enggo iruntuhken ndube. Alu 12 batu si melambangken 12 suku bangsa Israel ipajeken Elia mulihi  batar-batar e. Daging icibalken i babo ranting. Ras 3 kali berturut-turut alu empat guci lau icurcuri persembahen ras ranting e alu lau. Erbahanca dem parik alu lau.

Ertoto Elia man Tuhan, la perlu murjah-murjah, alu sora si megang tapi alu tutus ate dingen mindo perkuah ate Tuhan gelah Tuhan ncidahken kuasaNa. Gelah alu bage jelas man bangsa Israel Dibata ngenca Tuhan si erkuasa, ras kedungenna banci robah bangsa Israel. “O TUHAN , Dibata Abraham, Isak, ras Jakup; cidahkenlah genduari maka Kam kap Dibata Israel, janah aku kap suruh-suruhenNdu. Pebetehkenlah maka kerina kubahan e arah perentahNdu. Aloi aku, TUHAN, aloilah, gelah ieteh bangsa enda maka Kam TUHAN Dibata kap, maka Kam nge si mabai bangsa enda mulihken man baNdu.” E maka ipesusur TUHAN api; meseng ibahanna persembahen, ras ranting ndai, bage pe kerina batu ras taneh, janah lau si lit i bas parik ndai pe kerah. Langkem kerina bangsa Israel dingen ngakukenca maka Tuhan ngenca Dibata si man sembahen. Je nari nabi Baal si 450 kalak e itangkap ras ibunuh.

Aplikasi

Kuasa kegelapen lit lalap isekelewetta subuk si teridah bage pe si la teridah. Si teridah e me rupa-rupa kejahaten, biak-biak si la mehuli, sedangken si la teridah e me okultisme (ocultisme, occult, ertina gaib, gelap, tersembunyi, tidak tampak oleh mata, misterius. Ajaran yang mempercayai adanya kekuatan gaib yang tersembunyi dalam benda-benda atau roh/arwah). Janah occult enda merupaken kekejian i mata Tuhan sabab Dibatanta e me Dibata si mecimberu (Kel. 20:2-6; Mat. 22:37).

Janah rikutken tema bage pe kerina bahan i bas minggu enda, maka kuasa kegelapen hanya banci italuken alu kuasa Tuhan (i bas gelar Tuhan Yesus Kristus). Labo maksudna mengobral gelar Tuhan bagi film-film vampir. Tapi kuasa Tuhan e siteki, dingen kuasa e pe enggo ibereken Tuhan man kerina kalak si tek si arus tetap sipakeken. I bas si e kerina perlu kita selalu metenget, waspada, erkiteken kuasa kegelapen enda la erngadi-ngadi erdahin guna ncedai kiniteken kalak si tek alu erbage-bage cara ras erbage-bage media. E maka megegehlah kita ertoto, rembak ras Kesah si Badia, rajin ngoge Kata Dibata, tutus erbakti man Dibata, gelah ipengasup Dibata kita mbedakenca kuasa Dibata ras kuasa kegelapen si lit i sekelewetta.