PJJ GBKP Tgl. 17 - 23 Juli 2016

PJJ GBKP TGL. 17 - 23 JULI 2016

Pdt. Larena br. Sinuhadji (Nd. Rey Tarigan)

Tema : TETAP ERPENGARAPEN (Masmur 126:1-6)

Penjelasen Bahan Ogen & Perenungen

Masmur enda ibere judul “Pertoton Mindo Pembebasen”, sedangken i bas Alkitab TB-LAI ibere judul “Pengharapan di tengah-tengah penderitaan”. Arah duana judul enda, teridah maka lit kiniseran si ialami bangsa Israel paksa si e. Janah memang latar belakangna bangsa Israel sangana i pembuangen Babel. Menderita subuk secara fisik, psikis, mental bahkan berpengaruh ku pertendinna, i ja lit deba-deba perpulungen e si enggo bene pengarapenna, bahkan tadingkenna Tuhan Dibata.

Pembebasan (pemulihen) kondisi dari tertaban ku kondisi bebas ras sepenuhna inisiatif Tuhan. Janah pembebasen e lenga bo terjadi, tapi ekspresi si icidahken bangsa Israel desken kalak si enggo bebas. La isangka-sangkana, desken kalak si ernipi. Ras tuhu-tuhu erbahanca meriah kel ukur bangsa Israel. Bahkan pembebasen e jadi kesaksin man bangsa-bangsa si deban, maka Dibata bangsa Israel la pernah nandingken bangsaNa. “Dibata ngelakoken perbahanen si mbelin man bana”.

Doa permohonen si itujuken man Tuhan, labo man si deban. Si la mungkin pe banci mungkin adi ras Tuhan. Desken lau udan si maler i bas baluren si enggo kerah (seperti memulihkan batang air kering di tanah Negeb. Daerah Selatan dari tanah kanaan, sebelah selatan pengunungan Yehuda, sebelah barat  Laut mati, tanah ini selalu kering dan tidak pernah ada aliran air. Tetapi dalam permohonan Pemazmur ada aliran air di tanah Negeb yang mustahil terjadi). Selain perkuah ate Tuhan i je pe banci siidah, pengarapen, ketutusen i bas bangsa Israel guna mindo perkuah ate Tuhan.

Labo hanya Dibata si erdahin janah manusia pasrah, si penting enggo siendesken man Tuhan (alasen). Pemulihen, pembebasen e me, perkuah ate Tuhan, tetapi i bas pihak manusia arus irespon. Gambaren si ipaken Pemasmur desken kalak si ku juma, nuan gandum alu kerja keras, air mata, tapi i bas waktuna rani alu dem sorak-sorai iher maba berkas-berkasna.

Pengarapen e penting, erkiteken erbage-bage perbeben sialami dingen lenga sieteh ndigan jalan keluarna. Terkadang nimai si lenga jelas erbahanca kita medu, jenuh, bersungut-sungut, ndarami jalan pintas, rsd.

I bas PJJ-nta sekali enda isingetken kerna GBKP njayo 75 tahun. Tentu pengalaman senang ras susah enggo ialami. Patut kita ngataken bujur. Teruslah perpulungen GBKP nggeluh tetap erpengarapen man Tuhan gelah semakin ipake Tuhan jadi pasu-pasu (berkat) man doni sekelewetna.