PJJ GBKP Tgl. 24 - 30 Juli 2016

PJJ GBKP TGL. 24 - 30 JULI 2016

Pdt. Larena br. Sinuhadji (Nd. Rey Tarigan)

Tema : IPERDAMEKEN I BAS KRISTUS (Kolose 1:15-23)

Penjelasen Bahan Ogen & Perenungen

Bahan ogenta sendah masuk i bas sada perikop alu judul “Kerna Kristus ras PendahinNa” i bas Alkitab Terjemahan Baru TB-LAI ibere judul “Keutamaan Kristus”. I bas diri Yesus Kristus ras pendahinNa teridah maka IA si utamana erkiteken : 1) Kristus e me rupa Dibata si teridah si enggo leben lit ope denga ijadiken kerina si nasa lit; 2) Arah Kristus Dibata njadiken kerina si nasa lit subuk i Surga bage pe i doni; 3) Kerina si nasa lit ndatken inganna si payo erkiteken persadan ras Kristus; 4) Kristus takal ras ulu kegeluhen perpulungenNa; 5) I bas Kristus lit alu serta kerina si lit i bas diri Dibata; 6) Arah kematen Kristus i kayu persilang Dibata ndameken kerina si nasa lit gelah mulihken ku IA (ay. 20 i bas  Alkitab Bahasa Indonesia Sehari-hari - BIS nina, “Dan melalui Anak itu pula Allah memutuskan untuk membuat segala sesuatu berbaik kembali dengan Dia”).

Arah 6 point i datas, rasul Paulus mpetetap ukur perpulungen Kolose gelah reh paguhna erkiniteken man Kristus amin pe melala tantangen, khususna i bas pengaruh guru-guru palsu nari (bdk. ps. 2:8) ras i bas pengaruh piga-piga kalak Kristen Yahudi nari si masih denga mengutamaken tradisi Yahudi sebage prasyarat ngaloken keselamaten i bas Kristus (bdk. ps. 2:11-16). Secara khusus i bas tema PJJ-nta sendah e maka si jadi stressing point e me perdamen i bas Kristus. I bas ay. 22 nina, “Erkiteken kematen kula AnakNa, iperdameken Dibata kam ras DiriNa, gelah kam badia, bersih dingen la erpandangen i adep-adepenNa”. I bas perdamen ras Kristus labo terjeng dame-dame saja, tapi lit je kebadiaan, bersih dingen la erpandangen i adep-adepen Dibata. I bas Alkitab BIS nina, “Keadaan yang suci, murni dan tanpa cela”. Ertina, kerina kalak si tek man Yesus Kristus enggo ipebadiaken Dibata, enggo ibersihken Dibata kula, ukur, ras tendina i bas kerina si jahat (bdk. ps. 3:1-17) dingen la erpandangen.

Secara aplikatif perdamen ras Kristus mengandung konsekuensi horizontal, e me kerina kalak si tek man Kristus arus nggit nggeluh i bas perdamen ras sapih-sapih manusia. Nggeluh i bas perdamen i jenda labo berarti pasif (umpamana, uga makana gelah dame ras kalak si deban makana kita sinik-sinik saja), tapi proaktif bagi Kristus si enggo reh ku doni enda njumpai kita manusia. Secara praktis umpamana, adi lit konflik ras temanta, kita si leben erbahan perdamen, alu meteruk ukur mindo maaf, rsd. Perdamen i jenda pe labo seri ras gelah dame-dame saja, sebab adi dame-dame saja bagi si umumna ipahami i bas lingkungenta, lit denga je dendam, elem-elem, rsd., em tandana perdamen si semu, tampak luar, ndauh i bas pemahamen suci, murni ras tanpa cela ndai. Konflik i bas pergaulenta ras sapih-sapihta manusia lalap lit ras la banci isilahken kita. E maka perdamen ras Kristus ertina iajuk kita gelah ngasup mengelola kerina konflik si lit alu ukur si badia, bersih dingen la erpandangen i adepen Dibata bage pe i adepen sapih-sapih kita manusia.

Si terakhir, kita pe iajuk gelah erbahan perdamen ras lingkungen alam i sekelewetta, sebab adi usur terjadi bencana ekologis i tengah-tengah lingkungenta, geluhta pe labo dame. E maka mari radu ras menjalin relasi si mehuli ras alam sekelewetta alu tindaken-tindaken praktis bagi membuang sampah pada tempatnya, mengurangi penggunaan listrik, BBM, menanam pohon entah pe sinuan-sinuan i kesain rumahta, rsd. Mari radu ras mindo pergegeh arah Dibata nari gelah ipengasupNa kita jadi agen perdamen i tengah-tengah lingkungenta.