PJJ GBKP Tgl. 31 Juli - 6 Agustus 2016

PJJ GBKP TGL. 31 JULI - 6 AGUSTUS 2016

Pdt. Larena br. Sinuhadji (Nd. Rey Tarigan)

Tema : NJAGA KEBADIAN PERKAKAS RUMAH PERTOTON (Bilangen 3:5-10)

Penjelasen Bahan Ogen & Perenungen

Kalak Lewi entah pe suku Lewi e me suku si ndatken tugas khusus guna erdahin i bas Kemah Perjumpan (ingan pertoton, Kemah Suci), baik sebage imam entah pe dahin-dahin si deban si lit i bas Kemah Perjumpan e (bdk. Bil. 3:1-4:49; 1 Kron. 6, 23:1-26:32; rsd.). Secara khusus ogenta sendah nuriken kerna kewajiben-kewajiben si arus ilakoken kalak Lewi i bas Kemah Perjumpan, e me nampati Harun i bas tugas-tugas keimamenna, bage pe ngurusi entah pe ngerawat kerina alat-alat si lit i bas Kemah Perjumpan e.

Peralaten kai saja si lit i bas Kemah Perjumpan e? I bas kitab Keluaren benaken bindu 25 seh 30 je lit erbage-bage alat si igunaken i bas Kemah Perjumpan e, umpamana (i bas bhs. Indonesia) : Tabut Perjanjian berisi loh batu sepuluh perintah Tuhan, meja untuk roti sajian, kandil (menorah), kain penutup, mezbah korban bakaran, pelataran, minyak untuk lampu, pakaian imam, bejana pembasuhan, gulungan-gulungan kitab rsd. I bas kitab Keluaren benaken bindu 35 seh 40, teridah maka kerina alat-alat e itempah alu petunjuk khusus i bas Dibata nari. Ertina kerina alat-alat e labo ibahan bage-bage saja rikutken kebeluhen kalak Israel, tapi lit petunjuk guna erbahanca i bas Dibata nari.

Engkai makana kerina peralaten e perlu irawat? Si pemena lebe tentuna erkiteken kerina alat-alat e ipakeken guna ersembah man Dibata, ertina kerina alat-alat e arus kin badia, i bas pengertin, si terbaik sicidahken i lebe-lebe Dibata, labo merupaken alat-alat keramat si isembah. Janah kerina alat-alat e arus siap sedia katawari paksa pe ipakeken guna ersembah man Dibata. Si peduaken, erpalasken ogenta sendah tentuna erkiteken Dibata sendiri si nuruhsa.

I bas PJJ-nta sendah mulihi iajuk kita guna peduli nandangi Rumah Pertotonta, labo peduli i bas majekkenca saja tapi pe peduli kita guna ngerawatsa. Perawaten enda tentuna membutuhken dana si labo sitik ras pe perhatian si khusus bagi bahan ogenta sendah. Tapi si pentingna kel, tanggung jawab guna ngerawatsa labo hanya tugas sesekalak tertentu entah pe Koster Gereja, tapi kerina perpulungen ertanggung jawab guna ngerawatsa. Mari radu ras sirawat Rumah Pertotonta ras kerina peralaten si lit, gelah e kerina banci jadi pendukungta guna kita tutus ersembah man Dibata.