PA Kategorial GBKP Tgl. 3 - 9 Juli 2016

PA MAMRE GBKP TGL. 3 - 9 JULI 2016

Pdt. Larena br. Sinuhadji (Nd. Rey Tarigan)

Teks : Filipi 2:3-4

Tema : Mediate Nandangi Sekelewet

Tujun : Mamre Ngasup :

1) Nuriken kecibal kegeluhen i sekelewetna (masyarakat ras lingkungen)

2) Nuratken perbahanen-perbahanen si ncidahken biak si mediate nandangi sekelewetna (masyarakat ras lingkungen)

Penjelasen Bahan Ogen & Aplikasi

Filipi pasal 2:1-11 i bas Pustaka si Badia ibere judul “Yesus Kristus Jadi Usihen”, i bas TB-LAI ibere judul “Nasihat supaya bersatu dan merendahkan diri seperti Kristus”, e me merupaken pedah-pedah rasul Paulus man perpulungen Filipi gelah perpulungen reh paguhna i bas erkiniteken man Kristus si terwujud alu sikap ras perbahanen si konkrit nandangi teman-teman sada perpulungen bage pe nandangi kerina jelma i sekelewetna. Palasna e me ay. 1, kegeluhen i bas Kristus, kerembaken ras Kesah si Badia, ras sikeleng-kelengen. Palas si utamana e me teladan Yesus Kristus i bas ay. 6-8 si nggeluh bagi sekalak juak-juak, meteruk UkurNa, ras patuh (i bas bhs. Ind., nina, “mengambil rupa seorang hamba, merendahkan diriNya, dan taat”).

Nggeluh bagi sekalak juak-juak ertina lit min i bas perpulungen e jiwa (biak, karakter) ngelai, mengutamaken kalak si deban asangken dirina. Jiwa ngelai ras mengutamaken kalak si deban e la banci terwujud adi la lit kiniteruken ukur ras patuh nandangi Dibata i bas Yesus Kristus. Erpalasken si e, rasul Paulus mereken pedah-pedah man perpulungen gelah mediate nandangi kalak si deban si merupaken bahan ogenta sendah. I  bas ay. 3, kiniteruken ukur bagi Kristus mpengasup perpulungen naluken kerangapen, ukur menganjang, ras menganggap diri ulin asangken kalak si deban (bhs. Ind., nina, “hendaklah dengan rendah hati yang seorang menganggap yang lain lebih utama dari pada dirinya sendiri”). Bage pe i bas ay. 4, kiniteruken ukur bagi Kristus mpengasup perpulungen mperdiateken keperlun kalak si deban.

Si e kerina arus ilakoken perpulungen guna tujun si pasti e me, “Gelah kerina si nggeluh i Surga, i babo doni ras i teruh doni erjimpuh nembah man baNa. Janah ngakuken maka Yesus Kristus e tuhu-tuhu Tuhan, guna kemulian Dibata Bapa” (ay. 10-11).

Tema ras tujun i bas PA-nta sendah mabai kita gelah mediate nandangi sekelewetta (masyarakat ras lingkungen). Palas mediate i bas Mamre GBKP enggo jelas i bas bahan ogenta sendah, e me kiniteruken ukur ras patuh bagi Kristus. Menjadi bahan evaluasi man banta kerina, adi lit denga biak-biak rangap, meganjang ukur, bage pe menganggap dirinta ulin asangken kalak si deban, tentuna perlu ipelimbarui gelah la ngambati kita guna mediate kita nandangi masyarakat ras lingkungen sekelewetta. Guna si e, iajuk kita gelah tetap nggeluh i bas Kristus, rembak ras Kesah si Badia, bage pe lit kekelengen Kristus i bas dirinta

Secara konkrit mediate nandangi sekelewetta (masyarakat ras lingkungen) enda banci iwujudken alu ikut muat bagin i bas kegiaten-kegiaten positif si lit i bas masyarakat entah pe lingkungenta, si mehulina, kita jadi usihen (teladan) i bas kai pe si positif ras membangun i tengah-tengah masyarakat ras lingkungen sekelewetta.

PA MORIA GBKP TGL. 3 - 9 JULI 2016

Pdt. Larena br. Sinuhadji (Nd. Rey Tarigan)

Si Man Ogen : Daniel 6:1-10

Tema : Terpenalem I Bas Pendahin

Tujun : Gelah Moria :

1) Nuriken kiniteken Daniel si mabai pendahinna lebih asangken kalak si deban

2) Percaya diri nandangi keahlin ras kualitas (kompetensi) si lit i bas ia sabab Kesah Tuhan e erkuasa i bas dirina

Metode : Bible Sharing

Penjelasen Bahan Ogen & Aplikasi

Daniel e me sekalak Israel si banci ikataken berhasil i bas kegeluhenna sebage tabanen i Babel. I bas pemerentahen Nebukadnesar nari seh ku Darius i bas bahan ogenta sendah, Daniel usur jadi kepercayaan raja-raja entah pe penguasa-penguasa i tanah Babel. Secara khusus i bas bahan ogenta sendah, Daniel ipercayaken Darius, si paksa si e jadi penguasa i Babel, jadi wakil raja si tugasna ngawasi gubernur-gubernur i bas wilayah kekuasaan Darius. I bas ay. 3 ikataken, minter teridah pendahin Daniel ndauh ulin asangken wakil-wakil raja si debanna bage pe asangken kerina gubernur-gubernur e. Erkiteken si e, ersura-sura raja ngangkat ia jadi wakilna ngaturken kerina kerajan. I bas Alkitab TB-LAI teridah bahwa lit kuasa Kesah Dibata si lit i bas Daniel (“karena ia mempunyai roh yang luar biasa”). I bas ay. 4 ituriken bahwasana Daniel enda terteki i bas pendahinna janah la lit sitik pe ibahanna si salah ras si la bujur. Labo terjeng je saja, Daniel pe sekalak si tutus erkiniteken man Dibata, i bas ay. 10 (entah pe ay. 11 i bas Alkitab TB-LAI) ituriken enggo semal ilakokenna ertoto, muji ras nembah Dibata 3 kali sada wari. Amin pe enggo ibahan melala cara si jahat si ilakoken imbang-imbangna, Daniel tetap itemani Dibata seh makana i bas ay. 28, senang iakap Daniel nggeluh kidekah pemerentahen Darius, i bas Alkitab TB-LAI nina, “Daniel ini mempunyai kedudukan tinggi pada zaman pemerintahan Darius”.

I bas bahan ogenta sendah, teridah lit keseimbangen i bas kebeluhen si lit i bas Daniel. Ia labo saja kalak si beluh secara pengetahuan, keahlian i bas memimpin, pendahin si berkualitas, rsd., tapi ia pe sekalak si tutus erkiniteken man Dibata, seh makana ia terteki i bas pendahinna ras la lit sitik pe ibahanna si salah ras si la bujur. Banci ikataken Daniel enda sekalak si cerdas secara intelektual, emosional, ras spiritual.

Tema ras tujun PA-nta sendah mabai kita Moria gelah percaya diri i bas kompetensi si lit i bas kita, bage pe tutus erkiniteken bagi Daniel seh makana terpenalem i bas kai pe si idahiken kita. Si e kerina banci tercapai adi lit semangat ras ketutusen i bas kita erlajar bage pe erkiniteken man Dibata. Erbage-bage profesi (pendahin) si enggo ipercayaken Dibata man banta, tentuna si pemenana lebe perlu kita ngataken bujur man Dibata i bas kerina pendahin entah profesi si lit i bas kita. Si peduaken kai pe pendahin entah pe profesinta, perlu terus-menerus sikembangken. Arah metode PA-nta sendah, iajuk kita guna memotivasi dirinta gelah reh semangatna kita erkiniteken man Dibata bage pe ngembangken kerina si lit i bas kita.