PJJ GBKP Tgl. 16 - 22 Pebruari 2020

PJJ GBKP TGL. 16 - 22 PEBRUARI 2020

Nrs. Pdt. L. br. Sinuhadji (Bp. Rey Rapha Tarigan)

Tema : TURIKEN ALU TANGKAS (Lukas 1:1-4)

Dasar Teologi Teknologi Informasi (TI)

Lukas e me labo kalak Yahudi, kemungkinen kalak Antiokhia si tubuh mbelin i bas budaya Yunani. Erkiteken ketertarikenna erlajar budaya Yahudi maka je nari itandaina Yesus Kristus si akhirna jadi Tuhan ras Juruselamatna. Lukas e me sekalak si cukup meganjang pendidikenna, hal enda teridah i bas tata bahasa si igunakenna i bas Injil Lukas. Rasul Paulus nyebutken Lukas e me sekalak dokter entah pe tabib i bas Kol. 4:14. Maka itandai Paulus Lukas erkiteken Lukas e me salah sada teman pendahin Paulus i bas ia meritaken Berita Si Meriah (Pilemon 1:24), janah i bas 2 Tim. 4:11 ituriken Paulus maka Lukas ngenca si tading nemani ia sanga bas penjara.

I antara kerina Injil (Matius, Markus, ras Yohanes), Lukas ngenca si nuriken kerna uga (proses) Kitab Injil Lukas e itulisken. Ikataken Lukas i bas ay. 3 nina, ipepayo lebe alu megermet kerina kejadin i bas mula-mula nari. Kejadin i bas mula-mula nari i jenda maksudna, ipelajari Lukas alu tutus kerina nubuaten-nubuaten i bas kitab-kitab kalak Yahudi nari kerna Yesus Kristus, seh ku kesaksin rasul-rasul (ajar-ajar Yesus) kerna ketubuhen Yesus, kerina pelayanenNa seh ku kekeken Yesus. Kenca ipepayona alu megermet maka selanjutna isuratkenna kejadin e alu ratur. Ratur i jenda maksudna nuriken alu sistematis kerna sejarah keselamaten i bas Yesus Kristus.

Sistematika kerna sejarah keselamaten i bas Yesus Kristus mungkin banci ijelasken secara ringkas bagenda: Yesus Kristus e me penggenapen nubuaten kerna juruselamat i bas jaman nabi-nabi nari (bdk. Luk. 4:21); berita kerna keselamaten e labo ngadi kenca Yesus keke, tapi ilanjutken ku Kesah Si Badia si ibereken Yesus man ajar-ajarNa (bdk. Perb. Rasul 2:1-4,33); berita kerna keselamaten e terus berlanjut alu terbentukna gereja-gereja sebage hasil nyata penyebaren Berita Si Meriah ku kerina bangsa seh asa gundari. Sejarah terbentukna gereja banci sioge i bas kitab Perb. Rasul. Enggo radu ras siteh maka Lukas enda nge si nulisken kitab Perb. Rasul. Lukas termasuk i bas generasi si peteluken kalak Kristen kenca jaman rasul-rasul. Ertina labo ndauh jarakna ras jaman Yesus Kristus geluh denga i doni.

Nyuratken alu ratur ndai lit hubungenna ras ay. 4, i ja ikataken Lukas nina, “Kubahan e gelah tangkas man bandu, maka tuhu-tuhu nge kerina si enggo iajarken man bandu e”. Si nimaksudken “man bandu” i jenda e me Teopilus (ay. 1). Teopilus (Theo-philos) i bas bhs. Yunani nari ertina “sahabat Allah”, entah pe “pencinta Allah”. Lit si ngatakenca Teopilus enda sekalak pejabat Romawi si jadi sahabat Lukas. Lit si ngatakenca Teopilus enda donatur si membiayai kerina proses penulisen kitab Injil Lukas ras kitab Perb. Rasul. Lit ka si ngatakenca Teopilus enda e me kata kiasan si itujuken man kerina kalak si engkelengi Dibata. “Tangkas” i bas ay. 4, adi sinen i bas Kamus Bahasa Karo ertina: terang, jelas, dapat dilihat, terbuka. Ertina kerina si isuratken Lukas alu ratur i bas kitab Injil Lukas e ndai tujunna gelah pemahamen kiniteken man Yesus Kristus semakin terang dan jelas kebenarannya, janah mabai ise pe si ngogesa reh teguhna kinitekenna man Yesus Kristus.

Tema si seh man banta e me “Turiken alu tangkas” si niarapken banci jadi palas teologis i bas kita makeken Teknologi Informasi (isingkat TI). TI si berkembang pesat genduari enda akap kami sifatna netral. Ertina bergantung man ise si makekenca. TI banci sipakeken guna maksud jahat, umpamana guna nyebarken kebencian i bas politik identitas (cina, kristen, kafir, haram, rsd.). I bas dampar si deban banci ka TI enda sipakeken guna maksud mehuli, umpamana guna nampati kalak si membutuhken alu mem-viral-ken i bas media sosial gelah melala kalak banci nampati. Ras melala contoh-contoh si deban si ncidahkenca penggunaan TI guna si mehuli entah pe guna si jahat.

Situhuna melala nge palas teologis guna kita makeken TI alu payo sue ras peraten Dibata. Umpamana Kuankuanen 4:23-24; Mat. 5:37; 18:6-7 par.; Perb. Rasul 5:1-11; rsd. Tapi palas kinitekenta i bas kita makeken TI adi rikutken ogenta sendah, si pemena lebe, nggit kita erlajar mpergunaken TI guna tujun si mehuli. Lukas termasuk kalak si nggit erlajar mpergunaken teknologi si berkembang paksa si e guna tujun si mehuli, e me guna mewarisken Berita Si Meriah ku generasi berikutna. Teknologi si berkembang paksa si e, e me penyimpanan memori i bas bentuk tulisen si itulisken alu tinta i bas gulungan kulit entah pe kertas. Si peduaken, lit min proses kritis i bas kita menyerap ras menyebarken informasi. Proses kritis enda maksudna labo murah kita tek i bas informasi tertentu si ialoken kita. Tapi bagi Lukas, lit min i bas dirinta proses mpepayo alu megermet (mengolah) informasi si ialoken kita. Kenca enggo yakin kinipayon (kebenaran) informasi si ialoken kita, beritakenlah informasi e alu bahasa si ratur (sistematis) si tujunna gelah ise pe si ngogesa semakin ipetangkas kerna kebenaren informasi si isehken kita, janah si paling penting informasi ndai banci mabai ise pe si ngogesa semakin ipeteguhi kinitekenna.

Ertoto kita gelah Dibata si mpengasup kita makeken TI alu benar i bas kegeluhenta si tep-tep wari. Gelah tuhu-tuhu kita jadi penyebar berita-berita si positif, memotivasi ku si mehuli ras membangun kinitekenta bage pe kalak si deban. Pang kita nulaksa adi lit kalak nuruh kita nyebarkan berita si la benar i bas media sosialta alu imbalen puluhan bahkan ratusan juta rupiah. Sebab jaman genduari enda enggo melala pihak si mpergunaken TI guna nyebarken berita tertentu si tujunna guna menggiring opini publik ku bas tujun politik tertentu si labo kerinana payo bagi politik SARA ras politik identitas.