Pdt. Larena Sinuhadji (Nd. ReyRapha Tarigan)
KUBEREKEN SEPERSEPULUH ASA SI IBEREKEN TUHAN
[Kejadin 28:16-22]
Penaruh
Minggu si lepas enggo radu ras kita membahas kerna transparansi keuangan, entah pe pengelolaan keuangan gereja si mehuli guna kiniulin perdalanen pelayanen, bage pe si pentingna guna kemulian gelar Dibata. Pengelolaan keuangan si mehuli tentu harus siimbangi alu persembahen si mehulina arah perpulungen nari. Bagi si enggo radu ras siteh maka salah sada sumber keuangan gerejanta e me arah persembahen persepuluhen nari. I bas kesempaten enda mulihi kita erlajar kerna persembahen persepuluhen. Mbera PJJ-ta sendah semakin mpegegehi kinitekenta i bas kita nehken persembahen si mehulina man Dibata, khususna man banta si seh asa gundari lenga tergerak guna ikut muat bagin i bas nehken persembahen persepuluhen.
Mpebagesi Ogen
Ogenta sendah nuriken kerna sekalak tokoh Alkitab si akap kami enggo semal e me Jakup. Ia sekalak tokoh si penting i bas sejarah Israel, sebab i bas Jakup nari tubuh 12 suku Israel. Erkiteken si e Jakup, Ishak, ras Abraham igelari “Bapa Leluhur Israel.”
I bas turi-turin sope si jadi ogenta sendah, ituriken maka Jakup e me anak Ishak ras Ribka. Lit senina kembarna si tergelar Esau. Terjadi konflik antara Jakup ras Esau erkiteken ibuat Jakup hak Esau selaku anak sintua. Mungkin gelah ula sempat terjadi konflik si lebih mbelin antara Jakup ras Esau (bindu 27:42-44), emaka isuruh Ishak Jakup lawes ku Mesopotami, guna tading i bas ingan Laban mamana untuk sementara waktu. Perikop si jadi ogenta sendah alu judul “Nipi Jakup i Betel” e me kelanjuten turi-turin ndai. Ituriken maka patuh Jakup nandangi perentah Nande Bapana, berkat ia nadingken Berseba janah berkat ia ku Haran. I bas perdalanen, sanga ia medem erkiteken enggo berngi, ernipi Jakup. I bas nipina e, Dibata encidahken diriNa man Jakup, janah isehken Dibata pasu-pasuNa man Jakup e me: ibereken Dibata taneh man Jakup; ibahan Dibata enterem kesusuren Jakup; arah Jakup ras kesusurenna Dibata nehken pasu-pasuNa man kerina bangsa i doni; janah tetap ikawali Dibata Jakup segedang-gedang geluhna.
Kenca enggo medak Jakup, isedarina maka ingan si ijadiken ingan medemna e me pintun rumah Dibata (surga). Kenca enggo isedarina maka ingan e badia, mis ibuatna batu si ibantalkenna ndai, ipajekkenna jadi sada tanda peringet-ingeten. Iamburkenna minak saitun ku batu e tandana enggo ipersembahkenna man Dibata. Ibahanna gelar ingan e Betel (rumah Dibata). Kenca bage ersumpah Jakup, i bas kerina janji ras pasu-pasu Dibata si ialokenna e, nina, TUHAN me jadi Dibatana, batu peringet-ingeten si enggo ipajekkenna pagi jadi ingan ersembah, janah iberekenna sepersepuluh i bas kasa kai si ibereken. Dibata man bana. I bas turi-turin enda banci siantusi maka, pengalamenna jumpa ras Dibata erbahanca reh paguhna kiniteken Jakup. Kiniteken si paguh e iwujudnyataken alu majekken ingan ersembah man Dibata, janah isehkenna persembahen persepuluhenna man Dibata.
Pengkenaina
Tema si seh man banta i bas kesempaten enda berkaiten ras persembahen persepuluhen. Kerna tema enda akap kami enggo rusur sibahas setiap tahun. Janah rikutken ogenta sendah radu ras kita erlajar arah Jakup nari maka persembahen persepuluhen si isehken kita harus jelas palasna, e me kinitekenta si paguh man Dibata. Alu bage persembahan si isehken kita pe enggo pasti si mehulina guna kemulian gelar Dibata. I bas si e, mari radu ras sievaluasi dirinta, apakah palasta nehken persepuluhen e me kinitekenta si paguh man Dibata? Entah lit palas si deban, umpamana, erkiteken terpaksa, ikut-ikuten, gelah teridah kalak, gelah dat puji-pujin, gelah ula ijunguti kalak, rsd. Adi e palasna enggo pasti si isehken kita pe labo si mehulina. Emaka i bas kesempaten enda iajuk kita gelah sirenungken ras sigejapken pasu-pasu Dibata i bas kegeluhenta. Alu bage turah kesadaren i bas dirinta guna nehkeh si mehulina man Dibata
I bas kesempaten enda iulihi kami penjelasen kerna palas teologis persembahen i bas Gerejanta si lit i bas Konfesi GBKP ras Buku Katekisasi. I bas Konfesi GBKP la lit si secara spesifik ngerana kerna persembahen persepuluhen, tapi secara tersirat lit i bas Bab X kerna Ibadah poin 2 nina, “Kami percaya bahwa ibadah merupakan panggilan untuk memuliakan Allah melalui segala sesuatu yang diberikan Allah dalam hidup orang Kristen, baik pengetahuan, bakat atau talenta, dan harta milik (1 Taw. 29:14; 1 Sam. 2:7).” I bas uraian enda lit je tersirat maka nehken persembahen persepuluhen e me panggilan untuk memuliakan Allah.
I bas Buku Katekisasi lit penjelasen kerna persembahen i bas Pertemuan 34. Tapi la lit uraian si secara spesifik ngerana kerna persembahen persepuluhan. I bas buku e hanya itulisken kerna bentuk-bentuk persembahen si lit i bas GBKP e me: persembahan dalam setiap ibadah gereja (termasuk PA & PJJ), persembahan pesta panen (kerja rani), persembahan perpuluhan, ras persembahan ucapan syukur. Kerina bentuk persembahen e ialokasiken guna biaya-biaya kegiatan si berkaiten ras: kesaksian (marturia), persekutuan (koinonia), pelayanan (diakonia), ras kerina kegiatan penunjang pelayanan. Guna melengkapi bahan pengajaren e akap kami harus sitambahi alu bahan pengajaren si khusus membahas kerna persembahen persepuluhen.
Adi la kami silap, sistem persepuluhen enggo ilaksanaken i bas Gerejanta benaken tahun 2000. Keputusen secara sinodal e akap kami labo keputusen si main-main. Tek kami maka lit proses si ndekah si melatarbelakangi litna keputusen e, arah pergumulen-pergumulen si terjadi i bas pelayanen, penelitian-penelitian si sifatna teologis, bage pe arah perbandingen-perbandingen i bas Gereja-gereja si deban nari, si menerapken sistem persepuluhen. Ertina adi enggo menjadi keputusen bersama, marilah sidukung ras silakoken. Janah adi siperdiateken keadaan Gerejanta sebelum dan sesudah diberlakukannya sistem persepuluhen enda, akap kami enggo melala manfaat si banci sinanami, amin pe tentuna lenga bo maksimal erkiteken enterem denga kita si la nehken persembahen persepuluhen, entah pe si la konsisten nehken setiap bulanna. Emaka perlu terus-menerus kita erlajar nehken persepuluhen. Ula lebe siukurken nominalna, tapi erlajar lebe kita konsisten nehken persepuluhen setiap bulanna. Umpamana, seratus ribu sisehken secara konsisten setiap bulan. Adi enggo sigejapken i bas sada tahun labo kekurangen, sitingkatken nominalna, ras seterusna. Mari radu ras sibuktiken janji Tuhan, apakah payo maler pasu-pasu Dibata man kalak si setia nehkeh persepuluhen? Dibata si mpengasup kita.
Kerna palas teologis si deban si banci nambahi referensinta kerna nehken persembahen persepuluhen banci sioge i bas link entah pe tautan i teruh enda:
Tidak ada komentar:
Posting Komentar