SUPLEMEN PA MAMRE GBKP TGL. 23 PEB. - 1 MAR. 2025

Pdt. Larena Sinuhadji (Nd. ReyRapha Tarigan)

Teks : Perb. Rasul 15:1-21

Tema : SADA PENGERTIN I BAS NDUNGI PERSOALEN

Tujun : Gelah Mamre :

1) Ngasup tetap ersukuten man Tuhan, rukur arah sudut pandang Tuhan i bas ndungi persoalen

2) Alu teneng, saber, mindo kepentaren man Tuhan gelah sada pengerti i bas ndungi persoalen

Penaruh

I bas situs IDN Times tanggal 28 Maret 2023, lit artikel menarik si membahas “5 Tipe Orang Saat Menghadapi Masalah.” Tipe si pemena nina, lari dari masalah. Tipe si peduaken, mengeluh sepanjang waktu. Tipe si peteluken, segera mencari solusi. Tipe si peempatken, melibatkan (membawa-bawa) orang lain. Tipe si pelimaken, bertindak gegabah tanpa pikir panjang. I bas 5 tipe enda, kita si apai? I bas kesempaten enda radu ras kita erlajar kerna pengelolaan konflik alu mehuli erpalasken teks ogenta sendah. 

Mpebagesi Teks

Ogenta sendah akap kami enggo rusur sioge, e me kerna sidang i Yerusalem. Sidang rasul-rasul i Yerusalem ibahan erkiteken lit persoalen i bas perpulungen i Antiokia i ja lit pengajaren si ngatakenca maka kalak si tek si labo kalak Yahudi arus leben isunatken bagi iaturken Undang-undang Musa maka terkelin ibahan Dibata (ay. 1-2). I bas rasul-rasul pe lit dua pendapat si berbeda, lit si mempertahanken kewajiban sunat man kalak si tek si labo kalak Yahudi, si debanna ngatakenca maka sunat e labo hal si wajib ilaksanaken. Leben Petrus ngerana mewakili kelompok si labo mewajibken sunat man kalak si tek si labo kalak Yahudi (ay. 8-11). Intina, lit i bas ay. 11, sunat e labo menentuken keterkelinen kalak si tek tapi erkiteken lias ate Tuhan Yesus.

Kenca enggo ngerana Petrus, maka sinik kerina kalak si pulung e, rukur i bas pusuh perukurenna masing-masing. I bas Pedoman Penafsiran Alkitab Lembaga Alkitab Indonesia nari ikataken, “Semua orang itu terdiam karena menyadari kebenaran kata-kata Petrus. Itu sebabnya tidak ada perbantahan lagi.” Ertina i bas proses sidang enda sipelebekenlah “menyadari kebenaran,” entah pe mengutamakan kebenaran erpalasken Kata Dibata asangken emosi sesaat entah pe kepentingen pribadi ras kelompokna. Adi kebenaren Kata Dibata si jadi pedoman, maka pusuh perukuren pe bersih. Kenca bage alu pusuh perukuren si bersih, maka banci ibegiken pendapat Barnabas ras Paulus. I bas si e tek kita maka Kesah Si Badia nge si erdahin mereken pusuh perukuren si bersih i bas sidang enda.

Versi Audio silahkan klik : https://youtu.be/GwuG0TUQE6k

Kenca Petrus, Barnabas ras Paulus ngerana, maka seh ku giliren Jakup (Yakobus) ngerana mewakili kelompok si mewajibken sunat man kalak si tek si labo kalak Yahudi bagepe aturen-aturen si deban sue ras Undang-undang Musa (ay. 13-21). Intina lit i bas ay. 19-21, teridah maka ialoken Jakup pendapat kerna sunat si labo wajib hukumna man kalak si tek si labo kalak Yahudi. Tapi lit denga aturen-aturen rikutken Undang-undang Musa si arus ilakoken kalak si tek si labo kalak Yahudi, khususna kerna pangan-pangan, gelah ula sempat jadi batu antuken man kalak si tek si deban si berlatar belakang Yahudi, amin pe si e labo merupaken syarat guna datken keterkelinen (keselamatan).

Selain sidang i Yerusalem, si jadi teks ogenta sendah, situhuna erbahan sidang guna ndungi persoalen, bage pe muat keputusen bersama, enggo semal ilakoken rasul-rasul. Umpamana i bas Perb. Rasul 1:23-26, iputusken maka Matias si gantiken Yudas. I bas Perb. Rasul 6:1-6, ibahan keputusen 7 kalak ipilih guna ngelaken pangan si tep-tep wari. I bas Perb. 13:1-3, ibahan keputusen maka Barnabas ras Paulus iutus guna ndahiken dahin si enggo itetapken Dibata man bana. I bas si e kerina, rasul-rasul situhuna enggo encidahken dirina selaku pemimpin si tetap ersukuten man Tuhan, rukur arah sudut pandang Tuhan i bas ndungi persoalen. Janah alu teneng, saber, mindo kepentaren man Tuhan gelah sada pengerti i bas ndungi persoalen.

Pengkenaina

Mulihken kita ku penungkunen i bas bagin penaruh i datas, tipe si apai kita i bas menghadapi masalah? I bas kegeluhenta si tep-tep wari tentu melala masalah si man hadapen, em tandana kita nggeluh denga i doni enda. Tading gundari uga caranta ndungi masalah entah pe persoalen si lit? Secara khusus i bas PA-ta, radu ras kita membahas kerna pengelolaan konflik i bas lingkup pelayanen Gereja. Rasul-rasul enggo mereken teladan man banta i bas ndungi persoalen. Si pemena lebe, kenca lit persoalen i bas pelayanen, mis ibahan sidang, perjumpan, entah pe runggu guna ndungi persoalen. Ertina adi lit persoalen, ula sempat pedekah-dekah, mis sidarami solusina alu komunikasi si mehuli. I bas pelayanen enggo pasti lit konflik erkiteken perbedaan cara rukur, perbedaan karakter, rsd.-na. Ertina ula kita alergi terhadap konflik, piah dungna sinik saja kita, la kita pang ngerana, sebab mbiar kita. Si mehulina, uga caranta mengelola konflik alu mehuli seh makana reh paguhna kiniersadanta.

Si peduaken ersukuten man Dibata arah KataNa. Kai pe si ilakoken kita i bas i bas lingkup Gereja, seharusna si jadi palas e me Kata Dibata, labo gegeh beluhta, kepentingenta, entah pe egonta. Ertina adi enggo isingetken Kata Dibata, mislah sedar, jangan keraskan hati. Adi la nggit kita ngaloken Kata Dibata, siikut-ikut lalap egonta, harga diri, rsd.-na, piah dungna, melala pe ibahan pe perjumpan-perjumpan, lalap la erkedungen persoalen e, sebab i bas rekonsiliasi, kerina pihak harus nggit mengalah. Adi sada pihak ngenca si nggit erdame, seh asa digan pe la lit rekonsiliasi entah pe perdamen e. Teks ogenta sendah mereken teladan man banta i ja kerina pihak nggit ngaloken kebenaran secara objektif. Nggit naluken egona ras kepentingen kelompokna i teruh kebenaran Kata Dibata. I bas si e tentu dibutuhkan kedewasaan i bas erkiniteken. Emaka sue ras tujun i bas PA-ta sendah, marilah sipindo kepentaren i bas Dibata nari gelah ipengasup Dibata kita, khususna kam kerina Mamre GBKP, semakin saber, teneng, pentar, rukur aras sudut pandang Dibata, bage pe ngasup tetap ersukuten man Tuhan i bas ndungi persoalen. Dibata si mpengasup kita kerina guna ngelakokenca.