SUPLEMEN PJJ GBKP TGL. 2 - 8 MARET 2025

Pdt. Larena Sinuhadji (Nd. ReyRapha Tarigan)

NGELAKOKEN PURPURSAGE - 1 Samuel 25:9-35

(Sasaran Pelayanan GBKP 2025 Poin 2: Setiap Pelayan Menjadi Jurudamai Dalam Konflik Bukan Sumber Konflik)

Versi Audio silahkan klik : https://youtu.be/uK7fJomivHU

Penaruh

Adi ngerana kerna konflik, lit erbage-bage jenis konflik. Rikutken informasi i bas AI nari nina, lit konflik pribadi, konflik agama, konflik rasial, konflik politik, ras melala denga si deban. Ertina konflik e lalap lit i bas kegeluhenta janah la banci sihindari. Mungkin sada dua kali banci sihindari, tapi konflik la banci lalap sihindari. Erkiteken si e tading uga caranta mengelola konflik alu mehuli seh makana banci berdampak positif ras membangun man kerina pihak. I bas kesempaten enda radu ras kita erlajar kerna pengelolaan konflik erpalasken ogenta bage pe tema PJJ-ta sendah.  

Mpebagesi Ogen

Lit telu subjek (tokoh) sentral i bas ogenta sendah, si pemena e me Nabal, si peduaken Abigail ndehara Nabal, ras si peteluken Daud. Menarik akap kami adi sicermati karakter masing-masing tokoh ndai. Si pemena lebe, ituriken maka Nabal sekalak si tuhu-tuhu bayak, lit usaha peternakenna i Karmel, janah luar biasa melala asuh-asuhenna. Tapi amin pe ia terpuk Kalep nari, karakterna labo seri ras Kalep. Kalep i jenda maksudna teman Josua (banci sioge Bil. 13 - 14). Kalep banci ikataken kalak si erkemalangen man Dibata (Bil. 14:30), sedangken Nabal enda sekalak si mediker, macik lagu langkahna (ay. 2). I bas terj. Bhs. Ind., nina “bertabiat kasar dan berkelakuan buruk.” Tapi labo terjeng je saja, ituriken maka Nabal enda sekalak si megombang (ay. 14), jahat perukurenna ras la nggit megiken cakap ise pe (ay. 17). I bas terj. Bhs. Ind., nina, “mencaci maki, keras kepala dan tak dapat diajak bicara.”

Si peduaken Abigail ndehara Nabal. I bas ay. 2 ituriken maka Abigail enda sekalak diberu si mejile janah cerdik. I bas terj. Bhs. Ind., nina, “cantik, cerdas, bijak.” Karakter bijak teridah arah nggit ia megiken cakap suruh-suruhen Nabal (ay. 14-17). Arah informasi si ibegikenna, Abigail labo mbiar ras panik, tapi secara sukarela nggit ia jadi jurudame perbulangenna alu nikapken kerina keperlun guna njumpai Daud, janah si luar biasa, pang ia mersan kesalahen si la ilakokenna (ay. 1-24). Karakter cerdas teridah arah kerina si ibelaskenna i lebe-lebe Daud (ay. 25-31). Arah kai si ibelaskenna man Daud, teridah maka Abigail enda sekalak ndehara si erkemalangen man Dibata, janah ia pe tuhu-tuhu hormat man perbulangenna amin pe karakter perbulangenna la mehuli (ay. 36).

Si peteluken, Daud. I bas turi-turin enda, Daud ras pasukenna lit i bas kondisi iayak-ayak raja Saul. Amin pe Daud enggo itangkuhken jadi raja, tapi jabaten raja e lenga ialokenna secara utuh sebab Saul jadi raja denga atena. I bas kondisi si bagenda rupana, Daud pe harus ngukurken keperlun pasukenna. Emaka ipindona penampat arah Nabal nari sebab iteh Daud maka Nabal e sekalak bayak si ngasup mereken penampat. Selain si e, iakap Daud pantas ia ras pasukenna ndatken “balas jasa,” sebab sedekah e enggo ikawalina ras ijagana kel kerina suruh-suruhen bage pe asuh-asuhen Nabal. Mungkin erkiteken ngudah denga, Daud pa lenga beluh menjaga emosina, seh makana murah ia tersinggung janah lit rencanana guna nerang ras munuh Nabal. Tapi i bas sisi si deban, nggit Daud megiken cakap sekalak diberu, nggit ia rukur mulihi alu mbages seh makana nggit ia surut. Ibatalkenna rencana guna nerang ras munuh Nabal (ay. 32-35).

Selain telu tokoh utama ndai, lit sada nari akap kami si jadi tokoh penting i bas turi-turin enda, e me suruh-suruhen Nabal si la tersinget gelarna. Adi la lit informasi bage pe pemindon arah suruh-suruhen Nabal ndai, enggo pasti terjadi pertumpahan dareh antara Daud ras Nabal. Arah turin-turin i bas ay. 14-17, teridah maka suruh-suruhen Nabal enda sekalak si tuhu-tuhu mehuli. Ikatakenna i bas ay. 17a nina, “Ngarap aku gelah iukurkenndu kerna si enda janah putuskenlah kai si man bahanen. Enda banci maba cilaka man tuan kami ras kerina keluargana.” Suruh-suruhen Nabal enda tuhu-tuhu sekalak si mediate, la egois, sempat denga iukurkenna keselamaten tuanna bage pe keluarga tuanna.

Selanjutna uga kedungen konflik antara Nabal ras Daud? La ituriken lit perjumpan antara Nabal ras Daud. I bas ay. 36-38 hanya ituriken, kenca ibegina turi-turin arah Abigail nari, rempet kumat pinakit jantungna, la ngasup kemuit, sepuluh wari kenca si e mate ia. Tapi i bas ay. 38 lit tersirat maka Nabal enda tetap keras kepala, la nggit ia ngakuken salahna, apalagi meminta maaf. Erkiteken si e ipalu Dibata Nabal jenari mate ia. Ertina banci ikataken konflik e hanya dung i bas pihak Daud ngenca, sedangken i bas pihak Nabal la dung seh ku kematenna. Tidak terjadi proses pendewasaan i bas diri Nabal. 

Pengkenaina

Arah turi-turin kerna Daud, Nabal, ras Abigail enda, kai saja pelajaren si banci jadi luahta i bas PJJ sendah? Si pemena lebe, kedewasaan karakter seseorang menentukan resolusi konflik. Arah suruh-suruhen Nabal si la tersinget gelarna, Abigail, ras Daud nari radu ras kita erlajar kerna kedewasaan erkiniteken. Kedewasaan i bas erkiniteken enggo pasti mabai kita ku karakter si dewasa. Kai enda contoh konkritna i bas resolusi konflik? Umpamana bagi suruh-suruhen Nabal, nggit ia rukur si mehuli janah pang ia mindo penampat gelah ula sempat terjadi si la mehuli. Abigail, nggit ia megiken ras ngaloken saran si mehuli, nggit ia jadi mediator entah pe jurudame, nggit ia berkorban gelah ula sempat terjadi hal-hal si la mehuli. I bas Daud nari, nggit ia surut, nggit ia mulihi rukur alu mbages, nggit ia megiken ras ngaloken saran si mehuli i bas kalak si deban nari, janah si paling penting nggit ia ngalemi salah kalak man bana. Arah Nabal nari radu ras kita erlajar, ula sempat kita bernasib seri ras ia. Iukum Dibata ia erkiteken la nggit introspeksi diri, merasa paling benar, tidak bisa menerima kritik dan saran, rsd.-na. 

Sub tema i bas PJJ sendah, ngajuk kita kerina gelah menjadi jurudamai dalam konflik bukan sumber konflik. Adi rikutken ogenta sendah, iajuk kita jadi jurudamai bagi Abigail ras suruh-suruhen Nabal si la tersinget gelarna. Enda tentuna labo hal si murah, sebab adi ateta jadi jurudamai harus lit i bas kita kedewasaan i bas erkiniteken. Kedewasaan i bas erkiniteken erbahanca lit i bas dirinta karakter rendah hati, siap dikoreksi, entah pe siap menerima kritik dan saran, apai ka Kata Dibata si ngatakenca. Janah, bagi Abigail ras suruh-suruhen Nabal, sekalak jurudamai harus mediate ras proaktif menciptakan perdamaian.

Tema PJJ-ta sendah akap kami salah sada cara resolusi konflik rikutken kearifan lokal adat budaya Karo. Purpur sage akap kami awal sejarahna nai tujunna gelah kalak Karo e dewasa mengelola konflik. Purpur sage lit guna meng-counter filosofi “tek-tek ketang” entah “sada mata wari pe ateku lang”. I bas kegiaten purpur sage si biasa ilakoken dalam rangka ndameken dua pihak si erselisih, idealna labo terjeng sebatas formal, gelah teridah saling berjabatan tan tapi la seh ku akar persoalenna, gelah kesalahen si enggo terjadi la nari terulang entah pe ianggap benar. Secara ideal i bas purpur sage e kerina pihak alu sikap si dewasa, mengaku salah ras minta maaf i bas perbahanen si enggo ilakokeken, pihak si debanna pe menyadari kesalahenna ras pe nggit mereken maaf. Si enda labo metahat silakoken terlebih kita kalak Karo si enggo ngaloken kekelengen i bas Tuhanta Yesus Kristus nari.

Rikutken informasi AI nari alu penungkunen, “Adakah konflik yang tidak terlesaikan?” Jawabenna nina, “Ya, ada konflik yang tidak terselesaikan.” Lit telu penyebab konflik tidak terselesaikan, si pemena lebe nina erkiteken lit penyangkalan. Si peduaken erkiteken keras kepala. Ras si peteluken erkiteken lit ketidaksepakatan. Bagi konflik si terjadi antara Nabal ras Daud, kemungkinen maka konflik e hanya dung man sada pihak saja e harus isedari. Ertina adi enggo kita menyadari kesalahenta ras mindo maaf enggo dung i bas dirinta amin pe kalak si deban la ngaloken pengakunta bage pe pemindon maafta. Bage pe sebalikna, adi kalak si deban la isedarina salahna, la nggit ngakuken salahna, apalagi mindo maaf, si banci ilakoken kita e me ngalemi salahna, mengampuni. Em akap kami enggo dung i bas dirinta, sebab la kita banci ngaturken kalak bagi ateta, mungkin butuh proses yang panjang, mungkin seh mate pe tetap la dung i bas ia, e labo nari jadi urusenta. E maka i bas si e pindolah gegeh i bas Dibata nari, gelah ipengasupNa kita ngakuken salah ras mindo maaf, bage pe ipengasupNa kita ngalemi salah kalak man banta.