SUPLEMEN PA MAMRE GBKP TGL. 16 - 22 PEBRUARI 2025

Pdt. Larena Sinuhadji (Nd. ReyRapha Tarigan)

Teks : Kejadin 13:1-12

Tema : DAME, ERSADA MUAT SI MEHULI

Tujun : Gelah Mamre :

- Ngasup ngidah kuga mehergana (mahalnya) perdamen

- Nggit dingen ngasup jadi jurudame i bas jabu, gereja, ras masyarakat

Penaruh

Lit sada lagu si mungkin biasa sibegiken kita, apai ka ndeher bulan ramadan, bagenda nina, “Perdamaian, perdamaian, perdamaian, perdamaian. Banyak yang cinta damai, tapi perang makin ramai. Bingung-bingung kumemikirnya.” Lagu kasidah enda iciptaken Alm. KH. Bukhori Masruri sekitar tahun 80-an. Amin pe lagu enda arah jiranta nari, tapi akap kami muaten teologisna mbages. Sebab memang tuhu, melala kel tantangen ras hambaten i bas kita mewujudken perdamen i japa pe kita ringan.

I bas kesempaten enda radu ras kita erlajar kerna erdame, ersada muat si mehuli erpalasken teks ogenta sendah.  

Mpebagesi Teks

Teks ogenta sendah lit i teruh judul perikop, “Abram sirang ras Lut.” I bas terj. Bhs. Ind., nina “Abram dan Lot berpisah.” Teks ogenta sendah nuriken kerna tokoh Abram entah pe Abraham, sekalak si tuhu-tuhu erkiniteken man Dibata, seh makana banci ikataken Abram sekalak si pentar (bijaksana) i bas keputusenna. Ituriken maka kenca enggo seh Abram ras rombongenna, kelang-kelang Betel ras Ai, i je me tading ia, keluargana, ras kerina rombongenna. Lut ras keluargana rikut ras kerina rombongenna pe tading i je. Kenca dua keluarga enda radu ras tading i bas ingan e piga-piga ndekah, terjadi konflik, erkiteken memang lanai cukup mbalmbal perban buena asuh-asuhen Abram bage pe Lut. Rubati permakan Abram ras permakan Lut.

Tapi si menarik i jenda, cara Abram mengelola konflik. Si pemena lebe, teridah maka Abram enda sekalak si meteruk ukur dingen sabar. Amin pe tuan ia asangken Lut, tapi proaktif Abram guna menyelesaikan konflik. Sope terjadi konflik si lebih mbelin mis idahina Lut janah itawarkenna sada solusi. Si peduaken, teridah maka lit i bas Abram kepentaren, i ja iakapna hubungen keluarga lebih penting asangken erta kebayaken. Emaka i bas ay. 8 ikataken Abram man Lut, “Setangke denga kap kita, la mehuli adi rubati.” Ula min erkiteken erta terjadi la siangkan i tengah-tengah keluarga. Si peteluken, teridah maka Abram enda kalak si perkeleng, ipelebekenna Lut guna milih, amin pe situhuna selaku ia bapa tuana, wajar adi Abram si mutuskenca, tapi la ibahanna. Emaka i bas ay. 9 kataken Abram man Lut, “Mbal-mbal si arah apai kin atendu,” nina Abram. “Adi kam kempak kawes, aku kempak kemuhen, bage pe sebalikna.” Kenca bage, keluarga enda pe banci nggeluh alu dame.

Versi Audio silahkan klik : https://youtu.be/dUGfZjEQbn8

Pengkenaina

Konflik e me hal si biasa terjadi i bas kegeluhenta si tep-tep wari. E maka kebeluhen guna mengelola konflik alu mehuli harus sipelajari. Teks si jadi ogenta sendah encidahkenca uga Abram banci mengelola konflik alu mehuli seh makana persoalen si terjadi i tengah-tengah keluargana erkedungen alu mehuli ras maba kedamen. Erlajar kita arah Abram, maka guna kita ngasup mengelola konflik bage pe jadi jurudame, harus lit i bas dirinta: kiniteruken ukur, kesabaren, kepentaren entah pe bijaksana, kininggiten guna menyelesaikan konflik, rukur si positif guna erbahan solusi-solusi, janah harus lit keleng ate i bas dirinta.

Erbahan perdamen, i japa pe kita ringan, tentu labo hal si murah. Sebab i bas doni si dem denga alu dosa enda, melala manusia si egona ngenca si iutamakenna, la ngasup rukur guna kalak si deban. Labo hal si murah sebab perdamen e la banci iwujudken sekalak ngenca, kerinana harus ikut muat bagin i bas mewujudken perdamen. Seri bagi proses rekonsiliasi, adi sekalak ngenca si nggit erdame sedangken pihak si deban la nggit erdame, perdamen e la banci iwujudken. Tapi amin bage gia, kinata kegeluhen si bage rupana, ula erbahanca kita surut guna erbahan perdamen i japa pe, i bas jabu, gereja, ras masyarakat. Emaka kai si harus ilakoken kita?

Si pemena lebe, marilah sigejapken keleng ate Dibata i bas Yesus Kristus si erbahanca lit damai sejahtera i bas dirinta. I bas si e ipengasup Dibata kita guna berdamai dengan diri sendiri. Ngasup kita ngaloken keberadaan kita apa adanya, janah ngasup kita ngataken bujur man Dibata i bas si kugana pe keadaan dirinta. Si peduaken, marilah kita erlajar arah Abram nari i bas erbahan perdamen. Tentu i bas Pustaka Si Badia, melala denga ajaren-ajaren kerna perdamen. Emaka marilah sipelajari, gelah reh tambahna pemetehta kerna pengelolaan konflik alu mehuli rikutken Kata Dibata. Si peteluken, marilah sipindo gegeh i bas Dibata nari gelah ipengasupNa kita jadi jurudame. Sebab adi siandalken gegeh beluhta, la kita ngasup ngaloken kinata kegeluhen i doni enda si dem denga alu dosa. Dibata si mpegegehi kam kerina Mamre.