SUPLEMEN PJJ GBKP TGL. 16 - 22 PEBRUARI 2025

Pdt. Larena Sinuhadji (Nd. ReyRapha Tarigan)

KEPKEP ALU MEHULI - 1 Timotius 6:20-21

(Pengurus PJJ “Pemilihen Kalak Si Jadi Pengurus”)

Penaruh

Rikutken informasi i bas AI nari, regenerasi ertina, “Kemampuan untuk memperbaiki diri, seperti mengganti atau memulihkan sel, jaringan, organ, bahkan seluruh bagian tubuh yang rusak atau hilang. Regenerasi merupakan bagian dari pemeliharaan alami jaringan dan organ pada semua organisme hidup.” Istilah regenerasi enda rusur ka igunaken i bas organisasi, si encidahken proses estafet kepengurusan antara pemimpin yang lama dengan yang baru. 

Tahun si lepas enggo silaksanaken proses pemilihan serayan, pertua ras diaken. I bas pemilihen e melala serayan si enggo emeritus, janah enterem ka si mbaru denga terpilih jadi serayan. Ertina enggo terjadi proses regenerasi. Proses regenerasi enda pe enggo semal i bas kepengurusen kategorial bage pe kepengurusen PJJ. I bas kesempaten enda radu ras kita erlajar kerna proses regenerasi kepemimpinan si mehuli erpalasken ogenta sendah.   

Mpebagesi Ogen

Timotius (Yun. Τιμόθεος ertina “memuliakan Tuhan” - Wikipedia) e me sekalak ajar-ajar rasul Paulus si ipercaya Paulus (1 Kor. 4:17; 16:10; 2 Kor. 1:19). I bas piga-piga surat rasul Paulus gelar Timotius rusur isebutken (2 Kor. 1:1; 1 Tes. 1:1; Pilemon 1). Timotius enggo ianggap Paulus bagi anakna sendiri (1 Tim. 2:1). Gelar Timotius masuk jadi salah sada gelar kitab i bas Pustaka Si Badianta, ertina Timotius datken pengakun i bas Gereja-gereja Perdana nari sebage tokoh si layak iteladani. I bas tradisi kalak Katolik ras Ortodoks, ituriken maka Timotius enda itangkuhken rasul Paulus jadi pemimpin Gereja i Epesus i bas tahun 65, ngelai perpulungen Epesus 15 tahun dekahna, janah mate i bas tahun 97 i Epesus i bas usiana 80 tahun. I bas tradisi e ituriken kerna kematen Timotius si tragis, ibenteri kalak seh mate erkiteken ilarangna perpulungen ngikuti prosesi penembahen berhala. Adi payo turi-turin enda, banci ikataken Timotius enda tuhu-tuhu sekalak pemimpin si erkemalangen man Tuhan.

Versi Audio silahkan klik : https://youtu.be/7u95IUUG-DI

Si jadi fokus i bas PJJ-ta sendah e me pedah-pedah pendungi i bas surat rasul Paulus si pemena man Timotius, anak rohanina. I bas ay. 20a, ikataken Paulus, “Kepkeplah alu mehuli kai si enggo iendesken jadi tanggung jawabndu.” Kepkeplah alu mehuli i bas terj. bhs. Ind., nina, “peliharalah” entah pe “jagalah itu baik-baik.” Kai si enggo iendesken i bas bhs. Ind., nina “Apa yang telah dipercayakan kepada Timotius.” Rikutken Pedoman Penafsiran Alkitab Lembaga Alkitab Indonesia nari, kai si enggo iendesken man Timotius e lit empat antusenna: 1) Banci iantusi tugas Timotius sebagai pelayan Injil. 2) Banci iantusi sebage anugerah rohani yang memampukan Timotius melakukan tugasnya sebagai pelayan Injil. 3) Banci iantusi sebage ajaran yang harus diajarkan dan diberitakan oleh Timotius. 4) Banci iantusi sebage Injil atau Kabar Baik (berita keselamatan di dalam Yesus Kristus). I bas si e banci siidah maka kai si enggo iendesken man Timotius e seh kel pentingna ras meherga. Emaka iajuk Paulus Timotius gelah tuhu-tuhu ipeliharana, ijagana, entah pe ikepkepna alu mehuli.

I bas ay. 20b ipedahken Paulus, nina, “Tadingkenlah percakapen-percakapen si la erguna si la ngena ate Dibata. Bage pe tadingken sijabapen kerna si iakap kalak e “pemeteh” tapi si tuhuna labo.” I bas terj. Bhs. Ind., nina, “Jauhilah percakapan-percakapan yang tidak berguna dan perdebatan-perdebatan mengenai hal-hal yang secara keliru disebut “pengetahuan.” Rikutken ay. 21, pemeteh entah pe pengetahuan i jenda, banci siantusi sebage ajaren-ajaren sesat si paksa si e sangana viral, e me Gnostik. Banci ka siantusi sebage kepentaren, si menam bagi kepentaren Dibata, tapi situhuna labo. Tujunna guna menipu entah pe menjerumuskan kalak si tek ku hal-hal si la mehuli. I bas si e Paulus ngajuk Timotius gelah efisien ras efektif i bas ngerana, tetap fokus ku Kata Dibata, ula sempat teralihkan perhatianna ku hal-hal si deban si la penting.

Pengkenaina

Arah ogenta sendah, radu ras kita erlajar kerna regenerasi kepemimpinan si isehken Paulus man anak didik rohanina Timotius. Regenerasi kepemimpinan antara Paulus ras Timotius banci ilaksanaken alu mehuli erkiteken, si pemena, nggit Paulus ngajari Timoitus kerna kai pe si enggo ilakokenna i bas pelayanen i tengah-tengah perpulungen bage pe kerna er-Berita Si Mehuli. Lang situhuna banci saja tugas e iserahken man si debanna, tapi Paulus nggit secara langsung ngajari Timotius. I jenda teridah karakter kerendahan hati Paulus. Selain si e, banci saja setengah-setengah si iajarken Paulus man Timotius, tapi sebalikna, tuhu-tuhu maksimal isehkenna pengajaren si mehuli man Timotius. I jenda teridah karakter ketulusan ras kerelaan Paulus. Emaka marilah siusih Paulus i bas kiniteruken ukurna, ketulusan bage pe kerelaanna nehken pengajaren si mehuli guna kemulian gelar Dibata

Si peduaken, i bas proses regenerasi kepemimpinan antara Paulus ras Timotius, teridah ketutusen Timotius i bas erlajar. Nggit Timotius erlajar dari nol, janah nggit ka ia iajari. Arah surat-surat Paulus man Timotius, teridah maka rusur Paulus ngingetken Timotius kerna erbage-bage hal si mehuli, janah Timotius pe nggit iajari, nggit isingetken, janah nggit ia mpesikap si kurang mehuli i bas pelayanenna. Enda akap kami harus lit i bas kita kerina, mentalitas pembelajar. I bas sekalak pembelajar si mehuli, harus lit i bas dirina kiniteruken ukur guna mindo penampat, lit kininggiten guna nungkun, nggit iajari, nggit isingetken, menerima kritik dan saran, janah nggit mpesikap si kurang mehuli i bas pelayanen.

Si peteluken, sue ras tema, sub tema, bage pe ogen i bas PJJ-ta sendah, iajuk kita kerina, khususna kam kerina Pengurus PJJ si mbaru, gelah ngepkep alu mehuli anugerah keselamatan si enggo ialoken kita arah kinitekenta. Bage pe ngepkep alu mehuli Kata Dibata. Enda akap kami penting sebab e nge palas payo i bas pelayanenta. Adi Kata Dibata enggo nggeluh i bas dirinta arah Kesah Si Badia, maka kai pe si ilakoken kita i bas pelayanenta tujunna guna kemulian gelar Dibata labo guna kepentingen pribadi. Adi tuhu-tuhu fokus kita ku Kata Dibata maka ipengasup Dibata kita guna nentuken skala prioritas i bas pelayanen, apai si penting si harus jadi prioritas, ras si la penting. Dibata si mpengasup kam kerina Pengurus PJJ si mbaru guna melayani alu mehuli guna kemulian gelar Dibata.