SUPLEMEN PJJ GBKP TGL. 23 PEB. - 1 MAR. 2025

Pdt. Larena Sinuhadji (Nd. ReyRapha Tarigan)

NGASUP NGIDAH RAS NGALOKEN SI MEHULI - Lukas 10:38-42

(Sasaran Pelayanan GBKP 2025 poin 1: Tidak Alergi Terhadap Perbedaan)

Penaruh

Ngaloken si mehuli akap kami labo hal si murah. Adi ngidah apai si mehuli ras si la mehuli i bas kalak si deban mungkin kerina kita ngasup. Tapi sebalikna, adi kalak si deban ngidah si la mehuli i bas dirinta janah isingetkenna si benar guna kiniulinta, mungkin la kerina kita ngasup ngalokenca. Emaka sekalak ekonom si tergelar Kwik Kian Gie pernah ngatakenca bagenda, “Umumnya orang tidak suka mendengar kebenaran. Karena kebenaran itu seringkali menyakitkan.” I bas kesempaten enda radu ras kita erlajar kerna ngasup ngidah ras ngaloken si mehuli erpalasken Kata Dibata si jadi ogenta sendah.

Mpebagesi Ogen

Ogenta sendah e me turi-turin kerna Yesus si ndahi Marta ras Maria. Maria i jenda labo Maria Magdalena, entah pe Maria nande Yakobus, tapi Maria senina Marta ras turang Lasarus i Betania nari (Joh. 11). Maria senina Marta enda si murihi nahe Yesus alu minak i bas Joh. 12:3. I bas ogenta ituriken sanga ngalo-alo Yesus ras ajar-ajarNa bas rumahna, Marta kuskas nikapken pangan ras mungkin kerina keperlun Yesus ras ajar-ajarNa, sementara Maria kundul saja i deher nahe Tuhan Yesus megiken pengajarenNa. E maka murkas Marta ideherina Yesus janah nina, “O Tuhan, la iperdiatekenNdu ipeturut seninangku aku sisada ndahiken kerina dahin e? Suruh min ia nampati aku!” Erjabap Yesus nina, “O Marta, Marta! Suhsah dingen gulut ukurndu sabap melala atendu ibahanndu, tapi sada ngenca si la banci lang. Enggo ipilih si Maria si mehuli e janah lanai banci ibuat i bas ia nari.”

Situhuna la lit si salah si ilakoken Marta, mehuli kai si ibahanna. Sementara kai si ilakoken Maria rikutken kebiasaan entah pe adat kalak Yahudi labo semal. Tapi teridah bagi isalahken Yesus kai si ilakoken Marta sementara ipediat Yesus kai si ilakoken Maria. Situhuna labo isalahken Yesus Marta, tapi isingetken Yesus si mehulina man Marta. Ay. 41, i bas bhs. Ind. bagenda nina, “Engkau khawatir dan sibuk memikirkan ini dan itu,” i bas bahasa Karo nina, “Suhsah dingen gulut ukurndu sebab melala atendu ibahanndu.” Situhuna kai si enggo isikapken Marta enggo bias, adi enggo bias ma situhuna enggo la nai lit persoalen. Tapi Marta suhsah dingen gulut ukur sabab kai si enggo isikapkenna kurang denga iakapna. Nina Yesus “tapi sada ngenca si la banci lang,” i bas bhs. Ind., nina, “padahal yang penting hanya satu.” Kai e? Megiken pengajaren alu tutus janah ngelakoken kai si jadi peraten Dibata (bdk. Luk. 6:47; 8:21; 11:28). Kai si ikataken Yesus e me si mehulina si harus ilakoken i bas pelayanen e me megiken Kata Dibata dingen ngelakoken kerina si jadi peraten Dibata.

Versi Audio silahkan klik : https://youtu.be/X5GTlaKRWEo

Sekali nari mungkin lit si nungkun, apakah si ilakoken Marta salah? Labo salah, saja ngenca enggo bene bas Marta orientasi entah pe tujun i bas pelayanenna si erbahanca suhsah ras gulut ukurna bahkan cenderung ndarami kesalahen Maria. Melala pe ate Marta si ibahanna situhuna labo masalah saja ngenca ula sempat bene palas si tuhu-tuhu i bas pelayanen e me megiken alu tutus pengajaren Kata Dibata janah Kata Dibata e tuhu-tuhu nggeluh i bas pusuh perukuren ras teridah i bas perbahanen. Ertina dahin-dahin pelayanen labo merupaken beban entah pe kebiasaan si la lit maknana si erbahanca kita terbeban ngelakokenca piah dungna turah cian, jungut-jungut, cikurak, rsd. Padahal labo e nge si niarapken Dibata i bas pelayanenta. Latih pe kita, tapi tetap lit meriah ukur (sukacita) ras dame i bas pusuh perukurenta sebab palasna Kata Dibata labo sura-sura ukur manusia.

Pengkenaina

Lit dua teladan si banci siusih kita arah ogenta sendah. Si pemena erlajar kita arah Yesus si mediate nandangi Marta seh makana nggit Yesus ngingetkan si mehulina i bas pelayanen man Marta. I bas si e, tentu labo murah, sebab rikutken ogenta, sanga ercakap Yesus ras Marta, pulung je Maria ras ajar-ajar Yesus. Tentu terbegi kerina kalak si pulung je kai si ikataken Marta bage pe Yesus. Ertina, Yesus menegur Marta di depan umum. Banci saja Marta tersinggung ras merawa. Tapi enggo iukurken Yesus kai si ibelaskenNa gelah ula sempat menyinggung perasaan Marta. I bas si e kita pe tentu harus mediate ras nggit ngingetkenca adi lit si la mehuli i sekelewetta. Rikutken budaya Karo alu filosofi, “Kataken kata tengteng, ula kata tuhu,” enda tentu menjadi sada hal si labo murah. Tapi gundari filosofi e enggo berobah jadi “Kataken kata tuhu alu cara si tengteng.” Tapi bagi kuan-kuan i bas penaruh i datas, selembut apapun kebenaran diucapkan, tetap terasa menyakitkan. Enda tentu harus isedari resikona.

Si peduaken, erlajar kita arah Marta si nggit ia ngaloken persinget si mehuli i bas Yesus nari. I bas ogenta labo ituriken kelanjuten percakapen Yesus ras Marta, tapi banci siantusi maka ialoken Marta teguren Yesus. Kai si erbahanca maka ngasup Marta ngaloken si mehuli? Ituriken i bas ogenta, eggo ipilih si Maria si mehuli, tapi labo terjeng Maria saja, Marta pe ngasup ia ngaloken si mehuli erkiteken kedewasaan kinitekenna, seh makana nggit ia megiken persinget i bas Yesus nari. Tema i bas PJJ-ta sendah, “Ngasup ngidah ras ngaloken si mehuli,” enda akap kami bergantung ku bas kedewasaan kinitekenta. Adi enggo dewasa kinitekenta, uga pe suina kata tuhu e, pasti ngasup kita ngalokenca, apai ka Kata Dibata, enggo pasti ipengasup Kesah Si Badia kita guna ngalokenca. Rasul Paulus i bas 2 Tim. 3:16 ngatakenca “Segala tulisan yang diilhamkan Allah  memang bermanfaat untuk mengajar, untuk menyatakan kesalahan, untuk memperbaiki kelakuan dan untuk mendidik orang dalam kebenaran.” Ertina, kata tuhu si palasna Kata Dibata tujunna labo guna mempermalukan entah pe menjatuhkan, tapi guna membangun, guna si mehuli, entah pe guna kiniulin kegeluhenta. Uga carana maka reh dewasana kita i bas erkiniteken? Teruslah erlajar janah ertotolah man Dibata, gelah ipegegehiNa kita ngelakoken si ngena ateNa.

PJJ-ta sendah i bas rangka sosialisasi sasaran pelayanan GBKP tahun 2025, “Dewasa menerima perbedaan.” Salah sada poinna nina, “Tidak alergi terhadap perbedaan.” Perbedaan i jenda tentuna labo perbedaan antara yang baik dan yang buruk. Adi si la mehuli erpalasken Kata Dibata, kerina kalak si tek harus alergi. Ertina, kebenaran tetaplah kebenaran, dan dosa tetaplah dosa, la banci dosa ditutup-tutupi supaya terlihat benar. Umpamana, kita ras temanta sada dahin berbeda sifat, ia rusur nangko (korupsi) sedangken kita lang. I bas si e tentu kita harus tetap alergi. Emaka perbedaan i jenda maksudna perbedaan suku, ras, gender, antar golongan, status sosial, tingkat ekonomi, rsd.-na. Khususna perbedaan-perbedaan si iciptaken Dibata. Ngasup kita ngaloken maka perbedaan-perbedaan si lit e tujunna guna saling melengkapi sada ras si debann. Guna saling sisampat-sampaten. Guna saling sikeleng-kelengen sada ras si debanna. Dibata si mpengasup kita guna ngelakokenca.