SUPLEMEN PA MORIA GBKP TGL. 2 - 8 PEBRUARI 2025

Pdt. Larena Sinuhadji (Nd. ReyRapha Tarigan)

Dasar Teologi Tentang Dewasa

Ogen : 1 Korinti 2:6-16

Tema : NGASUP ERTIMBANG KERNA KAI PE

Tujun : Gelah Moria :

- Nuriken palas nggeluh si dewasa

- Ncidahken kedewasanna i bas ngerana ras ngelakoken ranan

Metode : Studi Kasus

Penaruh

Lit peribahasa si ngatakenca, “menjadi tua itu pasti, menjadi dewasa itu pilihan.” Seiring bertambahnya usia maka kita ertuana, tapi lenga bo tentu dewasa caranta rukur, terlebih dewasa kinitekenta. Sebab melala siidah, kalak si enggo dewasa, bahkan metua, tapi pola pikirna ras perbahanenna bagi anak-anak denga. Secara khusus i bas PA-nta sekali enda, kedewasaan pertendin teridah arah kita ngerana ras ngaloken ranan bas kalak nari.

Mekatep si terjadi kurang siukurken i bas kita erbelas, seh makana kalak si ngaloken rananta enggo sakit hati. Entah sebalikna, murah kel kitik ukurta i bas kita ngaloken ranan kalak si la bagi ukurta. Jadi situhuna kuncina bas kita. Kita si uga? Kita si enggo nggeluh i bas Kata Dibata. Emaka rikutken tema PA Morianta sekali enda, ibabai kita gelah ngasup ertimbang kerna kai pe.

Mpebagesi Si Man Ogen

I bas Perp. Korinti i ja Paulus nulisken suratna, maka lit dua kelompok si mbelin, e me Jahudi ras Junani. Kalak Jahudi mindo tanda-tanda sengget jadi bukti. Sedangken kalak Junani ndarami kepentaren. Kalak Junani sangat memegahken hikmat, kalak si terdidik, mbue filsuf rsd. Ras duana kelompok enda menganggap berita kerna salib (kayu persilang) sada kebodohen. Subuk kalak Jahudi si mengarapken terjadi mujizat asum Jesus isalibken. Bage pe kalak Junani, menganggap arah pengorbanen Jesus i kayu persilang, sada kebodohen. Tapi jelas Paulus ngatakenca, kalak si enggo ipilih Dibata, subuk kalak Jahudi bage pe kalak Junani, Kristus e kap gegeh Dibata ras kepentaren Dibata.

Si man ogenta sendah ngerana kerna “Kepentaren Dibata”, i bas Alkitab TB-LAI nina “Hikmat yang benar.” Rasul Paulus meritaken kerna kepentaren Dibata si erbahanca kalak Jahudi megelut ras kebodohen iakap kalak Junani (1 Kor. 1:23). Kepentaren Dibata e me Jesus Kristus, secara khusus kematen Jesus i kayu persilang si erbahanca kalak terkelin. Kepentaren Dibata si serta i bas Jesus Kristus enda enggo ialoken kalak si tek man baNa alu Kesah Dibata. Kesah Dibata si ngajarken man kalak si tek, ay. 10, biak Dibata (rencana-rencana Allah); ay. 11-12 pemeteh kerna Dibata (isi hati Allah) ras pemere-pemereNa (semua yang telah dianugerahkanNya); ay. 13-14 kebenaren pertendin (hal-hal rohani); ay. 15 kengasupen ertimbang kerna kai pe; ay. 16 perukuren Kristus. Nina Rasul Paulus i bas ay. 6, “iberitaken kami nge berita kerna kepentaren man kalak si enggo dewasa kinitekenna,” i bas ay. 13 nina, “dewasa kegeluhen pertendinna.” Antusenna, i bas sada sisi Rasul Paulus ngatakenca secara tersirat maka kepentaren Dibata mabai kalak si tek ku kedewasaan erkiniteken, i bas sisi si deban, melala denga kalak si tek si lenga dewasa geluh kinitekenna bagi piga-piga kalak i bas Perp. i Korinti. Kalak si dewasa kinitekenna tentuna lit perobahen si nyata i bas geluhna erkiteken terbuka pusuh perukurenna guna iajari Kesah Dibata.

Terlebih kalak si dewasa kinitekenna rikutken pengogenta maka ngasup ia ertimbang kerna kai pe. Kengasupen enda lit bas ia erkiteken piga-piga hal. Sada lebe kepentaren Dibata lit bas ia. Kepentaren (hikmat) bas konteks Jahudi e me kap pemere Dibata. Manusia labo banci berhikmat tanpa pertolongan Dibata. Maka gelah banci kita ngenen alu payo ras memutusken alu benar pindolah hikmat bas Dibata. Si peduaken, e me kap tunduk bas kendali Kesah Si Badia. Roh Kudus sebagai pengendali kegeluhenta. Zaman genduari macam-macam si mengendaliken manusia. Lit deba kerangapen, lit keegoisen ras si debanna. Adi bage kerina enggo banci sibayangken uga ngalahna nggeluh bas doni si bage rupa. Maka kalak si dewasa geluh pertendinna, Kesah Si Badia si mbabai geluhna seh maka tujun dingen arah geluhna pe ibabai ku bas kemalemen ate. Ras si peteluken cara berpikir Kristus. Kristus, la diriNa ngenca iukuriNa, tapi nggit IA mate berkorban nelamatken manusia. Maka kalak si dewasa, carana rukur bali ras cara Kristus rukur e me dem kekelengen dingen lit pengorbanen i bas dirina. Si nggit ngukuri si enterem la terjeng ngukuri dirina sendiri.

Versi Audio silahkan klik : https://youtu.be/tDMsTUOkFDw

Pengkenaina

Lit dua tujun arah bahan PA-nta sekali enda. Si pemena, nuriken palas nggeluh si dewasa. Arah penjelasen i datas, akap kami enggo jelas. Maka palas nggeluh si dewasa e me tetap ernalem man Tuhan. Alu bage, Kesah Si Badia si tetap negu-negu kegeluhenna. Ras tujun si peduaken, encidahken kedewasaanna arah ngerana ras ngaloken ranan. Uga sedekah enda, apakah kepentaren Dibata si lit bas kita nampati kita i bas ngerana, i bas erbahan keputusen, i bas ngaloken ranan kalak? Kita tidak bisa mengubah dan mengatur cara kalak ngerana tapi kita banci mengubah ras mengatur dirinta (pusuhta) seh makana la kita gampang sakit asum la bagi ukurta kalak ngerana. Palas pertimbangenta seh makana la murah sakit hati, megelut, e me perukuren Kristus si teridah arah kesabaren, kekelengen, kiniteruken ukur ras buah-buah Roh Kudus si deban. Selaku kalak si enggo dewasa kinitekenna, perlu kita ertimbang kerna ranan si ibelasken kita. Enggo me cakapta maba kemalemen ate, memotivasi, pebergeh pusuh teman si sangana melas ukurna? Entah kebalikenna? Bage pe, kalak si enggo idemi Kesah Si Badia, si idemi kepentaren Dibata ngasup ia ertimbang i bas ngaloken ranan si seh man bana. Seh makana la pedas sakit hati sekali pe, la bagi ukurta kai si ibelasken kalak banta.

Arah bahan PA-ta sekali enda, mulihi sipekana dirinta, sievaluasi dirinta gelah reh ulina ka ku bas wari-wari ku lebe, reh ngasupna kita encibalken ranan alu payo. Bage pe ngasup tetap ermeriah ukur ngaloken ranan sekali pe la bagi ukurta si ibelasken kalak banta. Tuhan Yesus nampati kita.