PJJ GBKP Tgl. 21 - 27 Mei 2017

PJJ GBKP TGL. 21 - 27 MEI 2017

Nrs. Pdt. L. br. Sinuhadji (Bp. Rey Tarigan)

Tema : TEOLOGIA PERSEMBAHAN (2 Raja-raja 12:4-5)

Penjelasen Bahan Ogen & Renungen

Bahan ogenta sendah termasuk i bas sada perikop 2 Raj. 12:1-20 si nuriken kerna kai saja si ilakoken Yoas paksa ia jadi raja i kerajan Yehuda. Turi-turin kerna raja Yoas enda banci ioge paralelna i bas 2 Kron. 24:1-27. Lit piga-piga keterangen si berbeda tapi akap kami keterangen si berbeda e banci saling melengkapi sada ras si debanna. Arah turi-turin kerna kecibal raja Yoas enda idatken kita piga-piga informasi kerna persembahen. Lit dua jenis persembahen rikutken informasi i bas ay. 4, e me persembahen wajib ras persembahen sukarela. Persembahen wajib e me persembahen guna penyelenggaraan kurban (terj. BIMK - BIS). Sura-sura raja Yoas gelah persembahen sukarela ipake alu tujun guna pehuli Rumah Pertoton. E maka isehken raja Yoas tanggung jawab man imam-imam (kalak Lewi) gelah mengelola persembahen sukarela e sue ras tujunna e me guna pehuli Rumah Pertoton. Si menarik i bas turi-turin enda adi sioge terdauhen, kepeken seh 23 tahun raja Yoas minpin kerajan Yehuda, dahin guna pehuli Rumah Pertoton e la idahiken imam-imam ras kalak Lewi. E maka dahin mengelola persembahen sukarela guna pehuli Rumah Pertoton iambil alih raja Yoas. Ibahan sada ingan khusus e me sada peti guna namaken duit persembahen. Adi enggo melala duit i bas peti e, reh pegawai raja ras Imam si Mbelin, ibeligaina duit e, jenari ipunjutna i bas gajut-gajut. Kenca isuratkenna buena duit e, e maka iendesken man mandur si ngurus dahin i bas Rumah Pertoton e. E maka dahin guna pehuliken Rumah Pertoton banci idahiken alu mehuli (ay. 6-16).

Arah informasi kerna persembahen enda rikutken bahan ogenta sendah lit dua hal si banci idatken kita e me : 1) Kalak Israel enggo semal nehken persembahen i bas Rumah Pertoton rikutken perentah Dibata si isehkenNa man Musa (Kel. 30:11-16; rsd.). Perentah Dibata enda labo guna keperlun Dibata tapi guna keperlun Kemah Perjumpan entah pe Rumah Pertoton. Ertina persembahen si isehken kalak Israel erat kaitenna ras ibadah, tanda ketutusenna i bas ersembah man Dibata. Adi sibaba ku bas kinitekenta paksa sendah, persembahen si isehken kita e me wujud nyata pengataken bujurta man Dibata erkiteken pengorbanen Yesus i kayu persilang guna keselamatenta. I bas si e asa kai pe si isehken kita i bas persembahenta la sebanding ras keselamaten si enggo ialoken kita. 2) Persembahen-persembahen si isehken man Dibata arus sikelola alu mehuli sue ras tujunna e me guna keperlun Rumah Pertoton. I bas ay. 10-12 teridah lit je sistem pengelolaan persembahen si ibahan raja Yoas paksa si e si tujunna gelah persembahen e banci sikelola alu mehuli guna keperlun Rumah Pertoton. I bas Gerejanta pe enggo lit sistem guna mengelola persembahen enda. Ertina persembahen si ipepulung kita jelas alirenna entah pe peruntukenna (labo ngadi i bas sada ingan) e me guna peningkaten kualitas ras kuantitas pelayanen i bas Gerejanta gelah gelar Dibata semakin imuliaken arah dahin-dahin pelayanenta. I bas hal enda jelas maka Gereja beda ras perusahaan. Adi perusahaan memang kin tujunna guna mpebue keuntungen. Tapi adi Gereja e me saluren Tan Tuhan guna kemuliaan GelarNa i tengah-tengah doni enda. E maka si penting i bas kita mengelola persembahen enda e me kinitekenta sebab kerina si idahiken kita i bas Gereja e me dahin Dibata. E maka situhuna la lit istilah “defisit” entah pe kekurangen. Si lit e me dahin-dahin pelayanen enggo tuhu-tuhu maksimal silaksanaken, entah pe, dahin-dahin pelayanen arus lebih sitingkatken kualitas ras kuantitasna. 

Tema i bas PJJ-nta sendah e me “Teologia Persembahan”. Adi ngerana kita kerna Teologia Persembahen, bahan ogenta sendah perlu denga silengkapi. Yohanes Calvin ngatakenca, persembahen si ibereken kita man Tuhan e me wujud nyata pengataken bujurta man Tuhan erkiteken keselamaten, penemani, ras pasu-pasu Tuhan si la terbeligai si enggo sialoken kita. Labo i bas rangka gelah mbue ka sialoken kita i bas IA nari (ajaren Teologia Sukses), entah pe sogok man Tuhan. Bage pe labo i bas rangka mereken sumbangen man Tuhan, sebab Tuhan nge si empuna doni enda ras kerina isina (bdk. Mas. 24:1).

Tuhan Yesus nehken persembahen i bas Rumah Pertoton (Mat. 17:27), janah si pentingna kel Yesus Kristus enggo mpersembahken diriNa guna nyelamatken manusia perdosa (Joh. 3:16). Piga-piga hal si deban si banci nambahi kinitekenta i bas kita er-Teologia Persembahen rikutken Pustaka si Badia e me :

1) Berekenlah sue pasu-pasu si enggo ibereken Tuhan man banta. Ula mbiar kita mere (melumbar) asum pasu-pasu (berkat) Tuhan pe melimpah i bas geluhta (bdk. Ul. 16:10).

2) Berekenlah si lit i bas kita. Ertina, ola pelit-lit adina memang paksana la lit, akhirna si terjadi terpaksa entah pe ikut-ikuten (bdk. 2 Kor. 8:12).

3) Mere alu ukur meriah labo erkiteken terpaksa entah pe jungut-jungut (bdk. 2 Kor. 9:7).

4) Erlajar arah sekalak diberu si enggo mbalu ras musil, si ipujiken Tuhan Yesus i bas Luk. 21:2-3, aminna pe mata uang si iberekenna kitik (2 peser e me mata uang terkecil), tapi ia mere i bas kekurangenna, iberekenna kerina si lit bas ia. Banci jadi turah penungkunen i bas kita, apakah kerina ertangku e kupersembahken man Tuhan? Tentu labo bage maksudna. Erkiteken kekelengen ras kinitekenta man Tuhan la kita mbiar mpersembahken si terbaik man Tuhan. Mereken si terbaik pe berkaiten ras caranta nehkenca man Tuhan.

5) Kerna persembahen persepuluhen. Rikutken Bil. 28:14 lit je ukuren : setengah, sepertiga, ras seperempat si arus ipersembahken. I bas Im. 27:30-31 lit je ukuren : sepersepuluh ras seperlima si arus ipersembahken. Ertina persepuluhen i bas konteksta sendah e me ukuren si kitikna (bdk. Mal. 3:10). Janah i bas Gerejanta enggo lit aturen ras tujun si jelas kerna persepuluhen enda (si megegeh rutang nampati si lenga megegeh). Memang lit denga perdebaten soal persepuluhen enda i bas Gerejanta. Umumna bersifat teknis, umpamana, apakah sepersepuluh e enggo termasuk je persembahen-persembahen si deban entah murni sepersepuluh? Sementara i bas Gereja si deban, bagi GKI-lah umpamana, enggo la nai lit istilah “persepuluhan” tapi “Persembahan Bulanan” erkiteken istilah “persepuluhan” e enggo membatasi jemaatna nehken tergalangen asangken sepersepuluh. Bicara la sepersepuluh pe si isehken kita ma la ise pe si meteh? Hanya kita secara pribadi ras Dibata si metehsa. Ertina, marilah kita nehken persembahen erpalasken kinitekenta si tuhu-tuhu nandangi Dibata si enggo mereken kegeluhen si tuhu-tuhu (keselamaten gratis si holistik) man banta, labo erpalasken asa kai si ibereken kalak si deban (bagi les bas jambur) entah pe erpalasken logikanta.

6) Labo saja secara materi sibere man Tuhan, tapi kulanta, perukuren si positif, pengerana si membangun, perbahanen si terpuji, waktunta, tenaga, bage pe talenta sipersembahken guna kemulian Tuhan (bdk. Rom. 12:1; Ibr. 13:15; Mas. 28:7; Ef. 5:19-20; Mat. 25:31-46, Yak. 1:27b; rsd.).

Enggo lit sada brosur kerna Persembahen Persepuluhan si ibahan Moderamenta. Akap kami brosur e perlu denga siedarken janah ibahan brosur si deban secara periodik gelah semakin mpebagesi kinitekenta kerna persembahen enda. Persembahen e me soal kinitekenta secara pribadi man Dibata. Tading kinipangenta mbuktikenca, apakah kerina si ikataken Dibata i bas Pustaka si Badia kerna persembahen e payo entah lang? Soli Deo Gloria.