SUPLEMEN PA MORIA GBKP TGL. 16 - 22 PEBRUARI 2025

Pdt. Larena Sinuhadji (Nd. ReyRapha Tarigan)

Dewasa Menerima Perbedaan

Si Man Ogen : Lukas 10:25-37

Tema : KAM TEMANKU

Tujun : Gelah Moria :

- Nuriken nilai kemanusiaan si lit i bas diri kalak Samaria

- Nehken kekelengen alu la erayo-ayo ras erkedungen

Metode : Erbahan sada slogan kerna nilai kemanusiaan

Penaruh

Kemanusiaan e me salah sada palas i bas nggeluh i tengah-tengah perbedaan. Negara Indonesia si idemi alu erbage-bage Suku, Ras, Agama, dan Antar Golongan (SARA), enggo ndekah erpala-pala mengelola perbedaan enda gelah banci ersada alu mehuli. Pancasila e me salah sada alat guna mpersadaken perbedaan. Rikutken informasi i bas AI nari, sila peduaken i bas Pancasila, “Kemanusiaan yang adil dan beradab” mengandung nilai-nilai: 1) Menghormati hak-hak dan kewajiban asasi manusia. 2) Tidak membeda-bedakan suku, ras, bangsa, dan agama. 3) Mengembangkan sikap peduli dan tolong-menolong terhadap setiap orang. 4) Menjunjung tinggi harkat dan martabat manusia. 5) Menghargai atas kesamaan hak dan derajat. 6) Mengembangkan sikap saling mencintai sesama manusia. 7) Tenggang rasa, tidak semena-mena sesama manusia.

Nilai-nilai kemanusiaan enda akap kami penting i bas rangka dewasa menerima perbedaan. Emaka i bas kesempaten enda radu ras kita erlajar kerna nilai kemanusiaan bage pe nilai keleng ate Kristus sebage palas kedewasaan menerima perbedaan. 

Mpebagesi Si Man Ogen

Si man ogenta sendah lit i teruh judul perikop “Perumpamaan kerna kalak Samaria si erkuah ate” (terj. Alkitab TB II, “Orang Samaria yang murah hati”). Ituriken reh sekalak Guru Agama Yahudi (terj. Alkitab TB 2, “Seorang Ahli Taurat”) guna ncubai Yesus, alu sada penungkunen, “O Guru kai arus kubahan gelah kualoken kegeluhen si rasa lalap?” Motivasina nungkun enggo la benar, e me mencobai Tuhan Yesus. Nina Yesus, “Kai kin si tersurat i bas Pustaka Si Badia, kai si iogendu i je?” Guru Undang-undang menjawab kerna Hukum Kasih, keleng ate man Dibata; kelengilah Tuhan Dibatandu asa ukurndu, asa tendindu dingen asa gegeh ras kepentarenndu lit (Ul. 6:5) ras kekelengen man manusia; kelengilah temanndu manusia bagi kam ngkelengi badanndu (Im. 19:18). “Payo jababndu e. Bahanlah bage gelah ialokenndu kegeluhen si rasa lalap.” Ertina, Guru Agama Yahudi ietehna kai pe kerna isi Undang-undang tapi la idalankenna.

Mulihi guna pebujur-bujur bana (terj. Alkitab TB 2: “membenarkan dirinya”) maka nungkun ia man Yesus, “Ise kin temanku manusia?” Sebab man kalak Yahudi, sesamana e me si seri agamana, ras seri suku bangsana. Tapi situhuna i bas teman-teman sebangsana pe ibeda-bedakenna keleng atena, pemungut cukai, kalak perdosa ras kalak musil si kurang itehna soal er-Agama Yahudi ianggap najis (tafsiren Dr. Martin Harun, 2005, hlm. 126). Enda tentuna sangat berbeda ras pandangen bage pe perbahanen Yesus. Yesus peduli man kalak musil - tidak berdaya (Luk. 4:18, “IsuruhNa Aku guna meritaken Berita Si Meriah man kalak musil, kalak si tertaban ipulahi, kalak pentang erpengidah”), bahkan i bas Luk. 6:27-28 Tuhan Yesus ngelumbakenca, engkelengi imbang, mehulilah perbahanenndu man kalak si ernembeh ate nandangi kam, pasu-pasu kalak si numpahi kam janah totokenlah kalak si la mehuli man bandu.

Penungkunen Guru Agama Yahudi e ijawab Yesus alu sada perumpamaan kerna kalak Samaria si erkuah ate. Ija lit sekalak si ngincuah i Jerusalem nari ku Jeriho (turun dari Yerusalem ke Yeriko). Rikutken piga-piga literatur maka ia kalak Yahudi. I tengah dalan jumpa ia ras perampok, i ja la saja barang-barang irampukna tapi igudamina ia menam mate ras itadingkenna i je. I bas perumpaan e, Yesus nempatken kalak si irampok e sebage kalak si arus isampati. Kalak si pemena mentas e me Imam. Kenca idahna kalak si enggo ampar e, isilahkenna je nari iteruskenna perdalanenna. Bage pe mentas kalak Lewi, kenca idahna ia pe nilah jenari iteruskenna perdalanenna. Duana kalak e Pejabat Rumah Pertoton (Bait Allah) si arus tetap menjaga kekudusenna. Sabab adi enggo kena dareh la nari badia, enggo najis. Tapi mentas kalak si peteluken e me kalak Samaria si mekuah atena, idahna kalak si ampar e. Ibenaken alu mekuah ate (terj. Alkitab TB 2: “Tergeraklah hatinya oleh belas kasihan”) ras iumputi alu erbage tindaken kekelengen. Ideherina, itamakenna minak ras anggur ku luka-lukana dingen ibalutina pe. Kenca bage iangkatna ku datas keldena, ibabana ku ingan penginapen guna itambari. Pepagina i berekenna ka dua duit pirak (dua wari upah kalak erdahin) man si empu penginapen. Janah nina, “Tambari ia janah adi la bias enda kutambahi pagi asum aku reh mulihken.”

Versi Audio silahkan klik : https://youtu.be/IFlG1eW3SLw

Engkai icidahken Tuhan Yesus, kalak Samaria sebage kalak si mentas si peteluken? Sabab enggo seh kel dekahna kalak Yahudi ras kalak Samaria ermusuhen erkiteken etnis ras agama. Kalak Samaria muncul sekitar th. 400 SM erkiteken perkawinen campur kalak Yahudi ras bangsa-bangsa si deban. Arah si enda me, kalak Yahudi erpengakap maka kalak Samaria kedudukenna lebih rendah asangken bangsa Yahudi. Kalak kafir. Bahkan melala aturen si ngatakenca adi bersentuhen, bergaul, bahkan make barang bekas kalak Samaria e ianggap najis. Emaka guna ngujungi percakapen ras Guru Agama Yahudi e Yesus nungkun, “Si apai nge iakapndu i bas si telu e jadi teman manusia kalak si irampok e?” Ras ijawab Guru Undang-undang e nina, “Kalak si enggo nampati ia.” I bas jawaben enda pe teridah uga kelekna antipati kalak Yahudi nandangi kalak Samaria, guna ngatakenca “kalak Samaria” pe la ia ngasup. Emaka itutup Yesus alu perintah, “Kam pe laweslah, janah bahanlah bage.”

Pengkenaina

Arah si man ogenta sendah radu ras kita erlajar kerna nilai-nilai kemanusiaan. Tuhu-tuhu la ibedaken kalak Samaria ndai keleng ate ras kepedulianna nandangi sesama manusia. Ise pe ia adi membutuhken penampat, mis isampatina. Janah keleng ate bage pe penampatna pe la tanggung-tanggung, la setengah-setengah. Enda tuhu-tuhu encidahken keleng ate Kristus. Adi sipake nilai-nilai Sila Pe-2-ken bagi si enggo isingetken i bas bagin penaruh i datas, guna menilai perilaku kalak Samaria ndai, maka kerina si enggo ilakokenna ndai enggo memenuhi kerina kriteria perwujudan nilai-nilai kemanusiaan si mehuli.

Tema bage pe tujun i bas PA-ta sendah, ngajuk kita kerina senina Moria gelah menanamkan nilai-nilai kemanusiaan i bas dirinta. Pustaka Si Badia, baik Padan Si Ndekah bage pe Padan Si Mbaru, mereken pengajaren kerna erkeleng ate man Dibata bage pe erkeleng ate man Manusia. Keleng ate enda palasna e me keleng ate Dibata si la ersibar, si puncakna icidahken Yesus Kristus, i bas ketubuhenNa, karya-karya pelayanenNa, kematenNa, kekekenNa, ras kenangkihenNa ku surga. Ertina, marilah kita erlajar kerna nilai-nilai kemanusiaan i bas Pustaka Si Badia nari. Keleng ate Dibata i bas Yesus Kristus mpengasup kita memahami perbedaan si lit i sekelewetta, mpengasup kita ngaloken perbedaan, janah mpengasup kita mengubah perbedaan si lit jadi energi positif guna saling melengkapi, saling mpegegehi, sisampat-sampaten guna kiniulin kegeluhen i sekelewetta.

Marilah sisehken kekelengen secara proaktif man sekelewetta arah kai pe si banci isehken, arah kai pe si banci ilakoken. I bas si e, enggo ilakoken kita perentah Yesus guna engkelengi sesama manusia, janah arah si e kerina radu ras kita erlajar semakin dewasa menerima perbedaan. Pindolah gegeh i bas Dibata nari arah pertotonta, gelah ipengasup Dibata kita erkelangken Kesah Si Badia guna ngelakoken kerina si jadi peraten Dibata i bas kegeluhenta si tep-tep wari, i japa pe kita ringan, guna kemuliaan gelar Dibata.