SUPLEMEN PA MORIA GBKP TGL. 8 - 14 SEP. 2024

Pdt. Larena Sinuhadji (Nd. ReyRapha Tarigan)

Jadi Pasu-pasu I Bas Perbeben

Si Man Ogen : 1 Raja-raja 17:8-16

Tema : NAMPATI I BAS PERBEBEN

Tujun : Gelah Moria :

- Nuriken perbahanen diberu balu-balu i Sarpat

- Erbahan program nampati kalak i sekelewetna

Metode PA : BGA (Baca Gali Alkitab)

Penaruh

Metode PA-ta sendah e me Baca Gali Alkitab (BGA), mehuli akap kami adi tuhu-tuhu silakoken gelah semakin mpebagesi pengangkanta kerna Kata Dibata. Metode enda nampati peserta ikut terlibat secara proaktif i bas radu ras membaca ras menggali makna teks si ioge kita. Kerina peserta banci saling memperkaya. Emaka mehuli akap kami adi tuhu-tuhu silaksanaken. Adi la banci silaksanaken secara tatap muka, silaksanakenlah secara online via media Zoom Meeting.

Mpebagesi Si Man Ogen 

Turi-turin kerna Elia ras diberu balu-balu i kuta Sarpat akap kami enggo semal man banta kerina. Tapi alu metode BGA, melala kari makna si banci idatken kita, sebab Firman Tuhan selalu baru amin pe enggo rusur sioge.

Sope seh ku teks si jadi ogenta sendah, i bas bindu 17:1-7 ituriken kerna Kata Dibata si isehken man Raja Ahap erkelangken nabiNa Elia nina, “I bas gelar TUHAN, Dibata si nggeluh, Dibata Israel si kusembah, kukataken man bandu maka i bas dua entah telu tahun si reh la lit embun entah udan ndabuh, pala kusuruh.” Adi rikutken bindu 16:30 ikataken maka Raja Ahap e me si erdosa man TUHAN lebih asa kerina raja-raja si leben asa ia. Janah i bas bindu 18:18 ikataken maka Ahap enggo ngguluti Israel erkiteken ilanggarna perentah TUHAN janah isembahna dibata-dibata Baal. I bas si e iteh kita maka bencana perlego si nialami bangsa Israel e erkiteken dosa si ilakoken Raja Ahap. Judul i bas perikop bindu 17:1-7 e me “Elia isampati TUHAN sanga perlego” janah judul perikop si jadi ogenta sendah e me “Elia nampati diberu balu-balu.” Perikop e duana nuriken kerna kiniseran si ialami Elia ras diberu balu-balu erkiteken bencana perlego.

I bas bindu 17:1-7 ituriken maka Dibata nampati Elia i tepi lau Kerit alu kak si maba roti ras daging guna ipan Elia. Tapi erkiteken seh kel hebatna bencana perlego ndai, kerah me lau mbelin si lit i bas sungai Kerit. Erkiteken si e isuruh Dibata Elia njumpai diberu balu-balu i Sarpat (bindu 17:8-24), sebab enggo iperentahken Dibata diberu balu-balu ndai mere Elia man. Kenca jumpa Elia ras diberu balu-balu ndai janah ipindona inemen ras sitik roti, ngaloi diberu balu-balu ndai nina, “I bas gelar TUHAN Dibata-ndu si nggeluh tuhu kukataken man bandu maka la lit roti i bas aku, seakatan sengkerauk tepung tare mangkuk ras sitik minak tare botol. Enda kupepulung sitik ranting man babanku mulih ku rumah gelah banci kutasakken pangan si sitik e man bangku ras man anakku. E me pengkeri-kerinna kami man, janah kenca e mate la man me kami”. Lit kearun ate i bas diberu balu-balu kenca enggo isuruh Dibata nampati Elia, la ia tek maka Dibata si njayam kegeluhenna.

Respon si berbeda icidahken Elia, tek ia nandangi kuasa Dibata. Kenca ipetetap ukur Elia maka tek diberu balu-balu enda ndai, janah ilakokenna kerina si isuruh nabi Elia. Seh i bas ay. 16 siakap la lit nari persoalen, sebab si jadi kearun ate diberu balu-balu ndai la terbukti janah ia ras anakna bage pe nabi Elia banci denga nggeluh erkiteken icukupken TUHAN kebutuhenna i bas bencana perlego. Kepeken lit denga ka “bencana” si deban, sakit mekelek anak diberu balu-balu ndai janah mate. Bagenda nina diberu balu-balu man Elia, “O suruh-suruhen Dibata, engkai maka bage perbahanndu man bangku? Kerehenndu ku jenda erbahanca inget Dibata ka mulihken dosa-dosangku, erkiteken si e mate anakku”. Enda respon si peduakaliken diberu balu-balu i bas ngadapi bencana, isalahkenna nabi Elia.

Respon si berbeda icidahken nabi Elia, ertoto ia man Dibata gelah ipegeluh mulihi anak si mate ndai. Kenca enggo ipegeluh Dibata mulihi anakna erkelangken nabi Elia, nina diberu balu-balu i bas ay. 24, “Genduari kueteh kam suruh-suruhen Dibata, janah tuhu-tuhu TUHAN ngerana arah kam!” Respon si petelukaliken diberu balu-balu enda ndai kenca enggo nggeluh mulihi anakna, tuhu-tuhu tek ia nandangi TUHAN.

Versi Audio silahkan klik : https://youtu.be/mUqEwXFFP00

Pengkenaina

Judul ras tujun i bas PA sendah akap kami membatasi metode Baca Gali Alkitab, sebab i bas metode enda melala hal si banci idatken kita labo terjeng si enggo ilitken i bas tema sendah ras tujunna. Ertina adi metode BGA silaksanaken, mehuli adi terbuka saja, la ibatasi alu tema ras tujun PA-ta sendah.

Lit piga-piga hal si banci sirenungken arah si man ogenta sendah. Si pemena, arah diberu mbalu Sarpat nari erlajar kita maka ise pe kita banci nampati kalak si deban. La perlu bayak lebe maka nampati. La perlu erpangkat lebe maka nampati. La perlu jadi serayan lebe maka nampati. Kerina kalak si tek enggo ibereken Dibata perentah gelah nampati ras sisampat-sampaten (bdk. Gal. 6:2). E maka situhuna i bas kita kalak si tek la nari lit alasen la nampati kalak si deban.

Si peduaken, lit kearun ate i bas diberu balu-balu kenca enggo isuruh Dibata nampati Elia, la ia tek maka Dibata si njayam kegeluhenna. Tapi kenca enggo ipetetap ukur Elia maka tek diberu balu-balu enda ndai, janah ilakokenna kerina si isuruh nabi Elia. Lit kearun ate i bas kita nampati kalak si deban e akap kami hal si wajar. Si la wajar, enggo pe ipetetap ukur alu Kata Dibata, tetap denga kita la tek nandangi kuasa Dibata si mbelin, siandalken gegeh beluhta. I bas si e marilah siusih diberu mbalu Sarpat enda, kenca enggo ipetetap ukur alu Kata Dibata mis tek ia, la nari iandalkenna logikana, tek ia nandangi kuasa Dibata janah isampatina Elia alu tetap ukur.

Si peteluken, erlajar kita arah Elia nari. Situhuna banci saja kenca enggo besur mis lawes Elia. Tapi mediate denga Elia nandangi diberu mbalu ndai si mate anakna. Isampati Elia diberu mbalu ndai alu ertoto gelah ipegeluh Dibata mulihi anakna. Rusur terjadi i bas geluhta, kenca enggo isampati kalak kita, enggo lanai siinget kiniulin kalak si enggo nampati kita. Arah Elia erlajar kita maka kita pe harus ngataken bujur ras siap nampati adi teman si enggo nampati kita datken kesusahen.

Si peempatken, kuasa Dibata la terbatas i bas nampati anak-anakNa si kesusahen. Arah kai pe Dibata ngasup nampati kita. I bas turi-turin Elia enda, ipake Dibata rubia-rubia guna nampati Elia. E maka i bas si e tetaplah erpengendes man Dibata sebab Dibata ngasup nampati kita i bas kerina perbeben geluhta.

Tema ras tujun PA-ta sendah ngajuk kita kerina Moria gelah tetap jadi pasu-pasu (berkat) amin pe keadaanta lit i bas perbeben. Sebab perbeben e lalap lit i bas geluhta silih berganti. Bahkan banci ikataken tiada hari tanpa perbeben. Diberu mbalu Sapat nari ras Nabi Elia mereken teladan man banta, amin pe kalak enda duana lit i bas perbebenna masing-masing, tapi nggit kalak enda duana ipake Dibata jadi saluran pasu-pasu man kalak si deban. Emaka marilah kita ertekad nampati kalak si deban si lit i sekelewetta, janah teklah kita maka kuasa Dibata si la terbatas pasti mpegegehi kita guna ngelakokenca.