SUPLEMEN PJJ GBKP TGL. 1 - 7 SEPTEMBER 2024

Pdt. Larena Sinuhadji (Nd. ReyRapha Tarigan)

ERTEGUHNA KINITEKEN PERPULUNGEN

Perb. Rasul 16:1-5 [Penangkuhen & Pengukuhen Pertua Diaken]

Penaruh

Menjadi Serayan Tuhan khususna Pertua ras Diaken e me pendilo Tuhan man banta. Tuhan make perpulungenNa memilih SerayanNa. Alu bage jelas, pertanggungjawaben Serayan e labo hanya man perpulungen tapi si utamana man Tuhan si enggo mpercayaken dahin pelayanen e. Kai pe si ilakoken Serayan e guna kemulian Tuhan ras mpeteguhi kiniteken perpulungen e. Kinata si terjadi, lit Serayan Tuhan si kurang memaknai pendilo Tuhan man bana. Awal-awalna saja ia semangat melayani, tutus, la erdobahen perpulungen e ilayanina, penuh pengorbanen (waktu, tenaga, kadang perasaan, materi, rsd.-na). Tapi kenca enggo piga-piga tahun melayani (piga-piga periode) enggo mulai bergeser makna pelayanen e man bana. Kurang teridah ketutusenna, kurang jadi usihen, i ja kai si ibelaskenna berbeda ras si ilakokenna, janah pelayanen ilakoken tanpa ketulusen si erbahanca mekatep ‘di kenca la bagi ukur murah mbenceng ras nadingken pelayanen.

Tentuna labo hal si bagena iarapken terjadi. Maka Firman Tuhan bas PJJ-nta sendah menjadi refleksi man banta Serayan gelah tetap berkomitmen penuh i bas melayani, bage pe perpulungen tetap numpak-numpak ras notoken Serayanna.

Mpebagesi Ogen 

Judul perikop ogenta sendah, “Timotius nemani Paulus ras Silas.” Kenca persirangen Paulus ras Barnabas (Perb. Rasul 15:36-41), iterusken Paulus  Pemberitaan Firman Tuhan ku Listra ras Derbe. I Listra jumpa Paulus ras Timotius. Iduga maka Timotius enggo bertobat, sabab i jenda enggo ia ikataken sebage ajar-ajarna. Banci jadi asum penginjilen Paulus ras Barnabas si pemena ku Listra ras Derbe (Perb. Rasul 14:8-20), i je Timotius berkenalan dengan Firman Tuhan. Bapana kalak Junani sedangken nandena kalak Jahudi. Rikutken kesaksian Pustaka Si Badia, maka nandena Eunike ras ninina Lois mbelin pengaruhna mabai ia nandai Kitab Suci ras nggeluh erkemalangen man Tuhan (bdk. 2 Tim. 1:5, “Kuinget tutus atendu erkiniteken bali ras kiniteken nini tudungndu Lois ras nandendu Eunike. Tek aku maka i bas kam pe lit kiniteken si bage”; 2 Tim. 3:15, “Janah ingetndu pe maka kitik-kitikndu nari enggo ietehndu kerna Pustaka Si Badia, si ngasup mereken kepentaren man bandu, e me si mabai kam ku keselamaten arah kiniteken man Kristus Yesus”). Janah Paulus menunjukan maka Timotius sekalak murid  ras piga piga kali Timotius igelari “anakku” (1 Kor. 4:17; 1 Tim. 1:2,18; 2 Tim. 1:2).

Kiniteken Timotius erbuah i bas kegeluhen si icidahkenna arah perbahanen si mehuli. Labo sada dua kalak tapi kerina kalak si tek man Yesus si ringan i Listra ras Ikoni ngataken maka Timotius kalak si mehuli. Tentuna enda jadi pertimbangen man Paulus maka idilona Timotius jadi temanna guna melayani. Sope pelayanen idalanken, maka Timotius isunatken lebe. Situhuna hasil Sidang i Jerusalem, labo lit keputusen si mengharusken kalak non-Jahudi isunatken (bdk. Perb. Rasul 15:29), tapi hal enda ilakoken Paulus man Timotius gelah pemberitaan Firman Tuhan la lit si ngambatisa. Kehadiren Timotius ula jadi batu antuken, sebab kerina kalak Jahudi i daerah Listra meteh maka bapa Timotius kalak Junani. Alu la erlatih-latih berkat duana kalak enda niari kuta-kuta janah ipesehna kai si enggo itetapken Rasul-rasul ras Pertua-pertua asum persidangen i Jerusalem gelah kerina perpulungen matuhisa. Alu bage la nari menimbulkan konflik (perjengilen) i tengah perpulungen. Pelayanen Paulus ras Timotius erbuah, i ja reh teguhna kiniteken perpulungen ras tep-tep wari reh teremna anggota perpulungen e. Kai si terjadi i tengah-tengah perpulungen la terlepas i bas semangat pelayanen ras Serayan-serayan e jadi usihen.

Versi Audio silahkan klik : https://youtu.be/A0QtGjQ_txw

Pengkenaina

Arah bahan PJJ-nta sekali enda lit telu poin penting si perlu jadi renungenta. Si pemena, kerina kalak i Listra ras Ikoni ngatakenca maka Timotius kalak si mehuli. Selaku per-Berita Si Meriah (Serayan) penting kerna keteladanen. Buah kiniteken Timotius teridah arah pengkebet geluhna si mehuli. Kiniulin Timotius tentu erkiteken buah kinitekenna man Tuhan. Enterem kalak si mperdiateken ras menilai Timotius janah ikataken kalak ia kalak si mehuli. Enda sada refleksi man banta Serayan, gelah ula kiniulinta terjeng bas Gereja entah bas Pelayanen Firman tapi la teridah i bas lagu langkahta.

Si peduaken, Timotius isunatken. Walaupe hasil persidangen i Jerusalem labo lit icantumken soal sunat tapi guna kiniulin pelayanen, iukurkenna kel ndauh si banci erbahanca jadi batu antuken man perpulungen. Janah jelas alasenna labo erkiteken keselamaten tapi gelah Firman Tuhan banci teraloken kerina kalak khususna si berlatar belakang Jahudi. Selaku Serayan Tuhan, kai si banci jadi batu antuken harus siminimalisir sekaligus sibeneken. Umpamana, Serayan Tuhan ras Nora/Naras la aktif, i bas pengerana ras perbahanen bahkan sosial media terkadang kehadirenta erbahnca turah ketidaknyamanan i tengah perpulungen, rsd.

Si peteluken, dahin Paulus ras Timotius erbuahken hasil si mehuli i ja perpulungen reh teguhna erkiniteken ras tep-tep wari reh teremna anggota perpulungen e. Rikutken fungsi (tugas) Serayan Tuhan si nigelari Pelayan Khusus (Pdt./Pt./Dk.) e me mperlengkapi kerina ngawan GBKP gelah ngasup ndalanken Misi GBKP (Tata Dasar, Ps. 7). Janah salah sada Misi GBKP e me menumbuhkembangken spiritualitas berbasis Alkitab. Ertina, sedalanen ras tema PJJ-nta sendah maka reh teguhna kiniteken perpulungen. Ibenaken i bas Serayan Tuhan si paguh kinitekenna janah kehadiren ras pelayanenna pe mpeteguhi perpulungen.

Gelah tutus ras dem komitmen dahin pelayanen si idahiken Serayan e, maka la banci lang arus jelas man Serayan khususna Pertua - Diaken makna kerna penangkuhen e. Makna penangkuhen labo hanya bertanggung jawab man perpulungen tapi si utamana kepada Tuhan si enggo memilih ras ndilo Serayan e. Alu bage tugas-tugas si enggo tersurat i bas Tata Gereja (Tata Laksana Ps. 92 ras Ps. 96) harus iperdiateken. Piga-piga poin:

1. Memimpin dan melayani jemaat, bersama-sama dengan pelayan khusus lainnya.
2. Menjadi pembimbing, pendorong dan teladan bagi warga gereja dalam pertumbuhan menuju kedewasaan iman dalam kehidupan Tritugas Gereja.
3. Melakukan perkunjungan dan mendampingi warga gereja yang sedang menghadapi kesulitan.

Tentuna labo lit kita si sempurna, termasuk Serayan Tuhan. Alu bage tetap kita ernalem man Tuhan. Gegeh Tuhan jadi gegehta i bas melayani. Janah iarapken perpulungen pe setia numpak-numpak, mpersingeti i bas si la payo rikut terus mendukung dalam doa.