SUPLEMEN PA MORIA GBKP TGL. 29 SEP. - 5 OKT. 2024

Pdt. Larena Sinuhadji (Nd. ReyRapha Tarigan)

Jadi Pasu-pasu Man Alam

Si Man Ogen : Masmur 104:1-15

Tema : NJAGAI SUMBUL KEGELUHEN

Tujun : Gelah Moria :

- Nuriken kai-kai saja pemere Dibata arah kerina tinepaNa

- Njagai tinepa si ibereken Dibata

Metode PA : Aksi

Penaruh

Salah sada kelebihen Kitab Masmur e me lit je piga-piga bagin si khusus nuriken kerna puji-pujin mpehagaken kiniulin alam semesta tinepa Dibata, bagi Masmur bindu 8, 19, 65, 104, ras 148. Kelebihen si deban si lit i bas kitab Masmur enda, bahasa si ipergunaken pe dem alu bahasa puitis guna mengekspresiken perasaan kagum entah pe takjub i bas hal-hal tertentu si la banci iantusi secara logis.

I bas kesempaten enda radu ras mulihi kita erlajar arah Pemasmur nari kerna mpehagaken kiniulin alam semesta tinepa Dibata.

Mpebagesi Si Man Ogen

Ogenta sendah Masmur 104 ibere judul “Pujin man Si Mada Tinepa,” e me ekspresi kekaguman entah pe ketakjuban Pemasmur nandangi Dibata si enggo nepa doni enda ras kerina isina, bage pe kiniulin kerina tinepaNa si arus iergai, sikelola ras sijaga alu mehuli. Masmur 104 enda banci iringkas ku bas 4 bagin e me : 1) ay. 1-9, e me gambaren keagungen ras kuasa Dibata si mbelin si ngasup njadiken langit, daraten ras lawit. 2) ay. 10-18 gambaren pengkawali (pemeliharaan) Dibata nandangi kerina mahluk si lit i bas doni enda seh makana kerina mahluk e banci ndatken kebutuhen geluhna. 3) ay. 19-30 gambaren Dibata erkuasa nentuken waktu (paksa-paksa) i bas doni enda bage pe Dibata si tuhu-tuhu erdolat jadi penentu kegeluhen kerina mahluk (Dibata si mereken kesah kegeluhen) seh makana kerinana tuhu-tuhu bergantung man Dibata ngenca. 4) ay. 31-35 merupaken pengakun Pemasmur kerna Dibata si mahakuasa si mada kerina tinepa sekaligus resolusi entah pe tekad Pemasmur guna terus muji gelar Dibata.

Lit 2 poin penting, akap kami, si banci jadi renungenta arah si man ogenta sendah, si pemena, Dibata tuhu-tuhu erkuasa ras erdolat nandangi kerina tinepaNa. Kuasa ras kedolaten Dibata enda teridah arah :

• ijadikenNa doni enda ras kerina isina; 
• pengkawali (pemeliharaan) Dibata nandangi kerina mahluk seh makana kerinana banci erdalan ratur i bas sada ekosistem si saling erkaiten sada ras si debanna; 
• Dibata sebage satu-satunya penentu kegeluhen i doni enda, i ja arah KesahNa si maba kegeluhen ipelimbaruiNa doni enda.

Si peduaken, Pemasmur tuhu-tuhu ngakuken kuasa ras kedolaten Dibata i bas kegeluhenna si mpeturah kekaguman (ketakjuban), penghargaan nandangi kiniulin kerina tinepa Dibata, bage pe tekad guna terus muji Dibata kidekah kegeluhenna. Penghargaan nandangi kiniulin alam semesta tinepa Dibata enda teridah arah bahasa si ngergaken kerina tinepa e sebage subjek si ngaloken perkuah ate Dibata, seri bagi kita manusia, labo sebage objek layak ieksploitasi guna keuntungen manusia. I bas si e Pemasmur tuhu-tuhu menyadari maka kerina tinepa si enggo ijadiken Dibata e mehuli, masing-masing lit fungsina, janah saling erkaiten (bergantung) sada ras si debanna. Kerina bagin i bas tinepa e arus tetap lit ras terjaga kiniulinna (kelestarianna) gelah dame sejahtera (syalom) Dibata tetap lit ras banci denga inanami kerina mahluk i doni enda.

Versi Audio silahkan klik : https://youtu.be/Blrxqtbn6C8

Pengkenaina

Masmur 104 banci nampati kita er-ekoteologi. Ekoteologi e me refleksi entah pe perenungen si mbages kerna Dibata si mada kerina tinepa si jadi palas kinitekenta i bas kita menatakelola kiniulin entah pe kelestarian lingkungen alam tinepa Dibata si akhir-akhir enda nandangi ceda total (krisis ekologi). Kinata si bagenda terjadi erkiteken jumlah populasi manusia si semakin meningkat alu gaya hidup konsumtif si la mperdiateken kelestarian lingkungen alam, bage pe eksploitasi besar-besaran nandangi alam semesta enda guna keuntungen materi pihak-pihak tertentu. Hal enda tentuna arus jadi keprihatinenta sekaligus mendorong kita guna ngelakoken tindaken-tindaken si nyata guna mengantisipasi bencana ekologis enda alu palas kinitekenta si mbages man Dibata.

GBKP termasuk gereja si peduli nandangi kelestarian lingkungen. I bas tahun 2022 kita enggo ngelakoken tema “Kreatif Merawat Lingkungan.” Janah setiap tahun enggo pasti lit tema-tema kerna kepedulianta nandangi alam tinepa Dibata, baik i bas PJJ bage pe i bas PA-PA Kategorial. Tentu wajar adi sisungkun alu penungkunen evaluatif, apakah si e kerina erbahanca kita kerina peduli nandangi kelestarian alam tinepa Dibata, alu aksi-aksi si nyata? Entah sebalikna, berlalu begitu saja tanpa jejak i bas pusuh perukurenta.

I bas PA sendah, mulihi kita isingetken kerna tugas tanggung jawabta melestarikan alam sekitar ciptaan Tuhan. Mari siusih Pemasmur si memperlakuken kerina tinepa sebage subjek si seri nilaina ras manusia i lebe-lebe Dibata. Alu bage turah i bas diri Moria rasa hormat ras penghargaan nandangi kerina tinepa Dibata. Emaka mari radu ras kita ertoto bage pe ertekad ngelakoken tindakan-tindakan si konkrit guna ngergai ras njagai kiniulin tinepa Dibata. Kita sebage kalak si tek e me wakil Dibata i bas doni enda si iutus guna mpelimbarui tinepaNa, sebab keselamaten i bas Kristus labo hanya itujuken man kita manusia tapi pe man kerina tinepaNa (bdk. Kol. 1:15-23).

I bas kesempaten enda, mulihi isingetken kami kerna program “Gereja Sahabat Alam” si enggo idalanken gereja-gereja secara ekumenis. Program enda memperlengkapi gereja-gereja i bas ber-ekoteologi, alu bage labo terjeng melalui doa ras pujian ngenca kita encidahken keleng ateta nandangi alam tinepa Dibata, tapi pe melalui tindaken si nyata ras konkrit.

Program Gereja Sahabat Alam ilakoken alu prinsip 4R:

• Reuse : menggunakan berulang-ulang bahan yang ada disekitar kita.
• Reduce : mengurangi pemakaian dan memaksimalkan sumber daya yang ada.
• Replace : menggantikan barang atau bahan yang  merusak dengan bahan yang ramah lingkungan
• Recycle : mendaur ulang bahan atau barang-barang bekas pakai.

Bage pe 4R sebage prinsip-prinsip kristiani dalam rangka kepedulian lingkungen si harus terus-menerus ilumbaken:

• Repent : bertobat dan mengaku atas perlakuan buruk terhadap alam.
• Restraint : Mengendaliken diri/tidak rakus.
• Respect : Menghargai ciptaan Tuhan yang lain.
• Responsible : bertanggung jawab dalam memelihara kelestarian lingkungan.

Dibata si mpengasup kita kerina Moria GBKP guna njagai sumbul kegeluhen janah njagai tinepa si ibereken Dibata.