SUPLEMEN PJJ GBKP TGL. 8 - 14 SEPTEMBER 2024

Pdt. Larena Sinuhadji (Nd. ReyRapha Tarigan)

PEMIMPIN SI NGELAI - Markus 10:35-45

(Pemilihen BPMR)

Penaruh

Tema kerna pemimpin si ngelai akap kami enggo rusur sibahas. Servant leadership e me si iajarken ras ilakoken Tuhan-ta Yesus Kristus. I bas kesempaten enda radu ras kita mulihi erlajar kerna pemimpin si ngelai erpalasken ogenta sendah. Pengarapenta tentu gelah reh enteremna kita si tutus ngelai i bas peken anggur Dibata.

Mpebagesi Ogen

Bahan PJJ-nta si ibere judul “Pemindon Jakub ras Johanes” (terj. Bhs. Ind., : “Permintaan Yakobus dan Yohanes bukan memerintah tapi melayani”), e me kerna pemindon anak-anak Sebedeus man Tuhan Yesus, nina, “O Guru lit pemindon kami man baNdu, ngarap kami gelah iberekenNdu. Minter irespon Yesus, “Kai kin atendu si Kubahan man bandu?” I jenda banci siidah Yesus ngajarken kita asum reh kalak nungkun harus minter sirespon alu mehuli ras positif. “Ate kami, kundul min arah kawes ras kemuhenNdu kune pagi Kam erkuasa i bas kinirajanNdu”. Duana ajar-ajar Yesus e mindo keduduken (akap kami enda manusiawi, kita pun umumnya seperti itu, menginginkan kedudukan, kekuasaan). Duana ajar-ajar Yesus e i bas keluarga nelayan si cukup berada. Sebedus bapana lit kapal (perahuna) sendiri ras banci ka iupahina kalak. Ras kalak enda pe termasuk kelompook inti ajar-ajar Yesus (Mrk. 1:29-31, ikut menyaksikan mertua Petrus isembuhken pinakitna. Mpekeke Putri Yeirus, Mrk. 5:37. Yesus imuliaken i datas gunung, Mrk 9:2. Ikut ras Yesus ertoto i uruk Getsemani, Mrk. 14:33, rsd.). 

Ras sope si e, i bas Mrk. 9:33-37 murid-murid ersoal ise si mbelinna i bas ia. Ertina, pemindon Jakub ras Johanes mpelebei ajar-ajar si deban. Ras adi sibandingken ras Mat. 20:20-28, si reh ku Tuhan Yesus labo saja Jakub ras Johanes tapi pe ikut nandena, e me bibi Yesus (Maria ras ndehara Sebedeus entah pe nande Jakub ras Johanes ersenina). Ertina, lit jalur nepotisme si nilakoken keluarga Sebedeus. Padahal jelas kel, enggo telu kali ituriken Yesus kerna kiniseran si bakal ialamiNa. Alu pemindon, dua ajar-ajarna enda banci ikataken la lit empatina, tapi lebih ia ngukurken dirina ras kepentingenna jine.

Emaka nina Yesus seterusna, “La kap ietehndu kai sipindondu e. Ngasup kin kam minen tare calung kiniseran si arus Ku inem? Ngasup kin kam iperidiken alu peridin si arus Kualoken?” I jenda Yesus ngerena kerna kiniseran (bdk. Mrk. 14:36, “Ya Abba, ya Bapa, tidak ada yang mustahil bagiMu, ambillah cawan ini dari padaKu.” Luk. 12:50, “Aku harus menerima baptisan, dan betapakah susahnya hatiKu”). “Ngasup,” alu pedas irespon kalak enda. Walaupe la angkana kai si ikataken Yesus, si penting keduduken. Ya memang jelas i jenda mulihi Yesus menegasken kerna kiniseran si arus ialami ajar-ajarNa, ialami pengikutNa sebab IA pe ngenanami kiniseran. Ras i jenda Yesus nubuatken kiniseran ras kematen ajar-ajarNa ras diriNa sendiri. Jakub mati syahid pada tahun 44 di Yerusalem (Perb. Rasul 12:2), dan menurut tradisi kuno, Johanes hidup sampai berumur lanjut di Asia Kecil dan dibuang ke Pulau Patmos. Artinya, menjadi pengikut Yesus harus siap menderita. “Tapi soal ise kundul arah kawes ras arah kemuhenKu labo Aku metehsa. E pagi ibereken Dibata man kalak si enggo itentukenNa.” Walaupe Jakub ras Johanes ndatken kiniseran labo sada jaminen banci langsung kundul i bas ingan terhormat i surga. Kerina otoritas Dibata Bapanta.

Merawa 10 ajar-ajar si deban man Jakub ras Johanes. Sebab kalak enda pe seri sura-surana. Merawa kalak enda labo erkiteken peduli man Yesus tapi perban enggo ilebei Jakub ras Johanes ras ipake kalak enda duana jalur belakang. Kerina ersura-sura ndatken keduduken. Idilo Yesus kerina ajar-ajarNa ras iberekenNa pemahamen si mbaru. Pemimpin sekuler memerintah rayaktna alu tan besi ras pembesar-pembesar ndalanken alu kekerasen. Rikutken aturen doni, kerina cara banci ilakoken guna ndalanken pemerentahen, umpamana, alu tan besi, semena-mena, melanggengkan jabaten alu menggunaken kekerasen. Tapi pengajaren Yesus, “Ise atena i bas kam jadi mehaga, ia arus jadi si ngelai nandangi kam  (diakonos). Ise atena jadi si arah lebe, arus maka ia jadi suruh-suruhen temanna kerina (doulos). Pemerentah doni enda mekatep peganjangken bana, ate-ate ras mpekitik kalak si deban, maunya dilayani. Tapi sebage anak-anak Tuhan, jabaten, keduduken si ibereken Dibata man banta lebih sipakeken guna nampati, ngelai kalak si deban.

Versi Audio silahkan klik : https://youtu.be/CQFpJn8Xe3M

Pengkenaina

Bahanta sekali enda dalam rangka pemilihen BPMR. Agenda Gerejanta kenca enggo dung pemilihen, penangkuhen Pt./Dk. Periode 2024-2029, ilakoken pemilihen BPMR (Badan Pekerja Majelis Runggun). Rikutken Tata Gerejanta, Tata Laksana Ps. 143 - Tugas BPMR:

1. Mengkoordinir Majelis Runggun untuk melaksanakan tugas-tugas pelayanan Majelis Runggun.
2. Merencanakan, melaksanakan dan memimpin Sidang Majelis Runggun (SMR) dan Musyawarah Sidi Runggun.
3. Menyusun rencana program tahunan, program lima tahunan, rencana anggaran belanja untuk dibicarakan dan disyahkan dalam SRM.
4. Mengambil keputusan mengenai masalah yang sangat mendesak dan mempertanganggungjawabkannya pada SMR berikutnya.
5. Menyelenggarakan tertib administrasi baik secara manual dan digital.
6. Membuat Laporan Keuangan setiap bulan dan menyampaikan ke SMR.
7. Menyampikan setoran jemaat ke BPMK setiap bulannya.
8. Mengkoordinir pelaksanaan pembinaan PJJ dan perpulungen.

Arah tugas-tugas si tertera i bas Tata Gereja-nta maka siidah enda kerina tugas pelayanen si labo perlu alu arogan, bertangan besi, rate-ate silakoken. Alu bage, subuk i bas pemilihen BPMR ras i bas pelaksanaan tugas tetap ilakoken alu erkemalangen man Tuhan, si penting dahin pelayanen i bas Runggun banci reh ulina idalanken.