SUPLEMEN PA MAMRE GBKP TGL. 22 - 28 SEP. 2024

Pdt. Larena Sinuhadji (Nd. ReyRapha Tarigan)

Teks : 2 Korinti 3:1-3

Tema : JADI SURAT KRISTUS

Tujun : Gelah Mamre:

1) Meteh nggeluh jadi surat Kristus rikutken teks

2) Ngasup makeken Teknologi Informasi selaku surat Kristus

Penaruh

Jaman gundari enda enggo semakin sitik kalak si erbahan surat secara tertulis. Maksudna, nulis i bas kertas. Gundari ratana kalak enggo erbahan surat elektronik alu format Word entah pe Pdf, si ikirimken secara online, entah pe ngetik secara langsung i bas email, Whatsapp, entah pe media si debanna. Amin pe cara ras mediana enggo berubah, tapi esensi surat tetap denga seri ras si nai. Tujun surat e me guna mpeseh pesan khusus man kalak si deban. Arah pesan khusus enda ndai iarapken gelah kalak meteh kondisinta ras ngelakoken kai rikutken kondisinta. Adi surat undangen, umpamana, iarapken gelah kalak si deban reh ndahi pesta perjabun. Ertina fungsi surat labo terjeng nehken informasi, tapi iarapken gelah lit tindaken si ilakoken i bas merespon informasi si enggo ialoken.

Mpebagesi Ogen

Surat 2 Korinti itulisken Rasul Paulus i bas konteks ngelawan pengaruh guru-guru palsu si labo saja mabai perpulungen ku dalan si papak, tapi pe alu maksud gelah ula sempat guru-guru palsu ndai makeken Kata Dibata guna mujiken bage pe guna keuntungen dirina jine. E maka i bas bindu 1:12 ras 2:17 i je Rasul Paulus alu tegas ngatakenca maka pelayanen si ilakokenna e me tuhu-tuhu erpalasken kinibujuren ras ukur si bersih i adep-adepen Dibata labo guna datken puji-pujin entah pe guna keuntungenna jine.

Bahan ogenta sendah e me persinget man Perpulungen Korinti, maka perpulungen e seri bagi “surat Kristus si isuratkenNa arah pendahin kami. Surat e la itulis alu tinta, tapi alu Kesah Dibata si nggeluh; la itulis i bas papan batu, tapi i bas pusuh manusia.” Ertina, sebage kalak si enggo iselamatken i bas kiniteken man Yesus Kristus, kegeluhenna enggo idemi alu Kesah si Badia, janah pusuh perukurenna pe enggo bali ras pusuh perukuren Kristus. Secara praktis seharusna pengkebet geluh kalak si tek tuhu-tuhu encidahken kemulian Kristus sebage tanda kalak si enggo ngaloken keselamaten. Alu istilah si deban Rasul Paulus ngatakenca i bas ay. 18, “Kita kerina natap dingen pembincarken sinalsal kemulian Tuhan.” Kehadiren perpulungen e seharusna mabai pengaruh si mehuli sue ras peraten Dibata. E maka situhuna adi enggo paguh identitas Kristen perpulungen e enggo lanai banci ipengaruhi ajaren-ajaren si la sue ras peraten Dibata.

Istilah “surat Kristus” itulisken rasul Paulus alu maksud gelah kegeluhen perpulungen e banci ioge kalak si enterem si lenga itandaina Yesus Kristus, gelah ise pe si ngidah kegeluhen kalak Kristen tek man Dibata i bas Yesus Kristus. Bage pe istilah “pembincarken sinalsal kemulian Tuhan” semakin negasken identitas kalak Kristen si tuhu-tuhu enggo itandaina Yesus Kristus. Si e kerina arus iwujudnyataken erpalasken kinibujuren ras ukur si bersih i adep-adepen Dibata ras manusia.

Versi Audio silahkan klik : https://youtu.be/TdUQfNDNVyE

Pengkenaina

Tema i bas PA Mamre-nta sendah e me “Jadi surat Kristus” alu tujun, gelah kami kerina Mamre GBKP meteh nggeluh jadi surat Kristus rikutken teks janah ngasup makeken Teknologi Informasi selaku surat Kristus. Arah tema bage pe tujun PA-nta sendah, iajuk kam kerina Mamre gelah, si pemena lebe, tuhu-tuhu menyadari identitasndu selaku kalak si tek man Yesus Kristus. Adi enggo tuhu-tuhu isedarindu ise kam i adep-adepen Dibata maka geluhndu pe terkondisi guna ncidahken kemulian Dibata arah kerina pengkebet geluhndu.

Si peduaken, PA-nta sendah banci jadi bahan evaluasi man kam kerina Mamre, uga kegeluhenndu sedekah enda, apakah enggo tuhu-tuhu jadi surat Kristus entah lenga? Adi enggo, kai saja si perlu sitingkatken? Adi lenga, kai tekadta sebage Mamre si enggo iselamatken i bas Yesus Kristus gelah tuhu-tuhu jadi surat Kristus?

Si peteluken, iajuk kam kerina Mamre gelah makeken teknologi informasi, medsos, gadget, guna kemulian gelar Dibata. Enda hal si penting akap kami, sebab enggo melala kalak si jadi korban judi online, korban pinjaman online, kecanduan game online, keri sen melala hutang erkiteken belanja online, investasi bodong, korban seks online, pornografi, rsd.-na. E maka marilah sipergunaken media sosial si lit i bas Hp-ndu guna kemulian gelar Dibata. Ertotolah pindo gegeh i bas Dibata nari gelah ipengasuNa kam jadi surat Kristus arah media sosial si lit i bas kam.