SUPLEMEN PA MAMRE GBKP TGL. 8 - 14 SEP. 2024

Pdt. Larena Sinuhadji (Nd. ReyRapha Tarigan)

Teks : Masmur 144:12-15

Tema : DESKEN BATANG KAYU SI TURAH MEGEGEH RAS MEJILE

Tujun : Gelah Mamre:

1) Meteh pengataken bujur Daud man Tuhan

2) Nehken pengarapenna kerna PERMATA GBKP

Penaruh

I bas Wikipedia alu judul “Daftar doa dalam agama Yahudi” ikataken maka berdoa dan permohonan berkat adalah bagian penting dalam budaya Yahudi. Janah i bas penjelasen Wikipedia alu judul “Doa Yahudi” ituriken maka kalak Yahudi umumna tutus ertoto telu kali i bas sada wari (Mas. 55:17; Dan. 6:11). I bas si e banci ikataken maka Daud termasuk ku bas kalak Yahudi si tutus ertoto. Ketutusen Daud i bas ertoto enda teridah arah Kitab Masmur nari, melala je itulisken Daud pertotonna man Dibata janah kerina si itulisken Daud tuhu-tuhun mpegegehi enterem kalak si ngogesa.

I bas PA-ta sekali enda pe nggit kita ipegegehi alu radu ras erlajar arah Daud nari i bas ngendesken pengarapenna man Dibata arah pertotonna. Janah PA-ta sendah ikaitken ras pengarapenta man generasi muda Gerejanta, PERMATA, si i bas Tgl. 12 September enda berulang tahun.

Mpebagesi Teks

Judul perikop i bas teks ogenta sendah e me “Raja ngataken bujur man TUHAN, erkiteken menang perang.” I bas terj. TB-LAI nari nina, “Nyanyian syukur raja.” I bas terj. BIMK nina, “Raja bersyukur kepada TUHAN atas kemenangannya.” I bas judul-judul perikop enda nari teridah secara tersirat latar belakang isehken Daud pertotonna enda man Dibata. Sekalak raja tentu harus ngadapi erbage-bage situasi i bas ia erperang. I bas situasi si kugana pe la lupa Daud ertoto mindo gegeh i bas Dibata nari. Janah kenca dung erperang pe, la lupa Daud ngataken bujur man Dibata i bas pertotonna.

I bas ringkasan si ibahan situs sabda.id BaDeNo AI, ikataken bagenda, “Mazmur 144 adalah sebuah nyanyian pujian Daud kepada TUHAN sebagai gunung batunya yang mengajari dan melindunginya dalam peperangan. Dalam nyanyiannya, Daud mengakui bahwa manusia adalah fana dan hidupnya seperti bayangan yang cepat berlalu. Ia memohon kepada TUHAN untuk turun dan menyelamatkannya dari bahaya, serta menghancurkan musuh-musuhnya. Daud berjanji untuk menyanyikan lagu baru kepada Allah dengan kecapi sepuluh tali dan memohon berkat agar anak-anak mereka tumbuh dengan baik, serta agar kota mereka aman dan sejahtera. Ia juga meminta berkat bagi suku-suku bangsa yang mengakui TUHAN sebagai Allah mereka.” Ringkasen enda akap kami banci nambahi pemetehta kerna garis besar Masmur bindu 144 sope kita bengket ku bas teks ogenta sendah.

Teks ogenta sendah termasuk ku bas bagin doa permohonan berkat i bas Dibata nari nandangi bangsana. I jenda teridah maka i bas pertotonna, Daud labo terjeng ngukurken dirina saja, tapi ia pe mediate nandangi sekelewetna. Sebage sekalak pemimpin tuhu-tuhu iperdiatekenna kesejahteraan rakyatna, emaka ipindokenna pengarapenna e i bas pertotonna.
Ay. 12, “Anak-anak kami tupung anak perana, balilah min desken batang kayu si turah alu megegeh. Janah anak-anak kami si diberu tupung singuda-nguda, jadilah desken tiang si ihias i bas suki-suki istana.” I bas terj. BIMK nina, “Semoga anak-anak lelaki kita di masa mudanya seperti tanaman yang menjadi besar. Semoga anak-anak perempuan kita seperti tiang jelita, yang menghias penjuru-penjuru istana.” I bas terj. TB-LAI Ed. II nina, “Kiranya anak-anak lelaki kita seperti tanaman yang tumbuh subur pada masa mudanya, dan anak-anak perempuan kita seperti tiang-tiang penjuru, yang dipahat untuk bangunan istana!” Pengarapen Daud nandangi generasi muda bangsana tuhu-tuhu mehuli. Iarapkenna maka kerina anak dilaki ras diberu banci tumbuh berkembang alu mehuli baik secara fisik, psikis, mental, rohanina. Jadi generasi muda si tuhu-tuhu makeken waktu ras kesempaten si lit guna kiniulin dirina bage pe kiniulin bangsana. Jadi generasi muda si banci iandalken, mandiri, berintegritas, erpemeteh ras paguh erkiniteken.

Ay. 13-15 e me pertoton pengarapen Daud gelah bangsana makmur sejahtera, tercukupi kerina kebutuhen pokok: sandang, papan, pangan. La lit si kekurangen. La lit kalak si musil. La lit kalak si mesera. Kerinana nggeluh alu bahagia, dem alu dame ras keriahen si tuhu-tuhu. Kerina usaha pendahin ipasu-pasu Tuhan seh makana banci berhasil. Janah ulih pendahin e pe banci igunaken alu mehuli guna kesejahteraan masing-masing jabu.

Versi Audio silahkan klik : https://youtu.be/IZYiRmYa9dY

Pengkenaina

I bas PA-ta sekali enda iajuk kam kerina Mamre gelah ngusih Daud sebage sekalak perbapan si tutus ertoto. Kai pe si ihadapi i bas kegeluhen, labo lupa man Dibata. I bas paksa lit perbeben, ertoto erpengendes man Dibata. I bas paksa senang, la lupa ngataken bujur man Dibata i bas pertoton. Janah i bas pertotonndu pe labo dirindu saja si iukurkenndu, tapi kerina isi jabu bage pe kalak si deban. Ertoto guna kesehaten, kiniulin, kesejahteraan diri sendiri, jabundu bage pe kalak si deban.

Secara khusus i bas PA-ta sendah radu ras kita mperingeti HUT PERMATA GBKP si pe-76 tahun-ken. I bas usia si enggo lanai nguda enda tentu enggo melala Mamre si merupaken “produk” entah pe bentukan PERMATA ndube. Ertina secara kelembagaan kategorial, PERMATA GBKP enggo melala menghasilken Mamre-mamre si labo saja beluh berorganisasi tapi pe erkemalangen man Dibata, jadi usihen i bas kai-kai pe. I bas si e tentuna patut kita ngataken bujur man Dibata. Adi enggo melala Mamre si erkemalangen man Dibata tentuna cara rukurna pe nandangi anak-anakna enggo ipelimbarui Dibata.

Cara rukur si enggo ipelimbarui Dibata e me mediate nandangi generasi muda GBKP. Wujud konkrit mediate e me mendukung pelayanen man PERMATA baik sebagai pribadi bage pe sebagai lembaga kategorial. Rikutken ogenta sendah, wujud konkrit si harus ilakoken e me ertoto guna kiniulin PERMATA. Siendesken pengarapenta man generasi muda GBKP i bas pertotonta, bagi si enggo ilakoken Daud. Sitotoken gelah kerina anak-anakta bais si dilaki bage pe diberu, gelah tumbuh berkembang alu mehuli baik secara fisik, psikis, mental, rohanina. Jadi generasi muda si tuhu-tuhu makeken waktu ras kesempaten si lit guna kiniulin dirina, bangsana, khususna gerejana. Jadi generasi muda si banci iandalken, mandiri, berintegritas, erpemeteh ras paguh erkiniteken. Dibata si mpengasup kam kerina Mamre kami.