SUPLEMEN PA MAMRE GBKP TGL. 15 - 21 SEP. 2024

Pdt. Larena Sinuhadji (Nd. ReyRapha Tarigan)

Teks : Markus 12:10-12

Tema : TUTUS I BAS SI KITIK

Tujun : Gelah Mamre :

1) Meteh erti tutus i bas dahin si kitik rikutken teks

2) Nggeluh terteki (berintegritas) i bas kai pe

Penaruh

Piga-piga waktu si lepas lit sada video viral pidato sekalak Perwira Angkatan Laut Amerika Serikat. Sada bagin i bas pidatona bagenda ikatakenna, “Jika anda merapikan tempat tidur setiap pagi, anda akan menyelesaikan tugas pertama hari itu. Hal itu akan memberi anda sedikit rasa bangga, dan akan mendorong anda untuk mengerjakan tugas lain, dan tugas lain, dan tugas lain lagi. Di penghujung hari, satu tugas yang diselesaikan akan berubah menjadi banyak tugas yang diselesaikan. Merapikan tempat tidur juga akan memperkuat fakta bahwa hal-hal kecil dalam hidup itu penting. Jika anda tidak dapat mengerjakan hal-hal kecil dengan benar, anda tidak akan pernah mengerjakan hal-hal besar dengan benar.”

I bas PA-ta sekali enda, radu ras kita erlajar kerna ketutusen i bas hal-hal si kitik sue ras ogenta sendah.

Mpebagesi Teks

Ogenta lit i teruh judul perikop “Perumpaman kerna si newa kebun anggur.” Perumpaman e me metode pengajaren si semal ipake Yesus si tujunna gelah Kata Dibata iangkai kerina kalak si megiken pengajaren-pengajarenNa. Selain guna tujun pengajaren, perumpaman pe rusur ipake Yesus guna mengkritisi pemimpin-pemimpin agama Yahudi si biakna pekulah-kulah. Rikutken turi-turin i bas perikop sebelumna, perumpamaan i bas ogenta sendah itujuken man imam-imam si mbelin, guru-guru agama ras pemimpin-pemimpin Yahudi.

Lit piga-piga tokoh i bas perumpaman e. Si pemena si empu kebun, e me Dibata. Si peduaken, si newa kebun, e me imam-imam si mbelin, guru-guru agama ras pemimpin-pemimpin Yahudi. Si peteluken, juak-juak si empu kebun, e me nabi-nabi si meritaken Kata Dibata. Si peempatken, anak si empu kebun, e me Yesus Kristus. Kebun anggur e me Israel rikutken Jes. 5:7. Arah padanan tokoh-tokoh i bas perumpaman enda banci siantusi maka pemimpin-pemimpin agama Yahudi labo ndalanken tugas tanggung jawabna alu mehuli. Kerina si ilakoken pemimpin-pemimpin agama ndai la encidahken Israel sebage bangsa pilihen Dibata si harus ngelakoken kerina si jadi peraten Dibata. Itulak pemimpin-pemimpin agama Yahudi nubuaten nabi-nabi kerna kerehen sekalak Mesias, bahkan ibunuhna utusen-utusen Dibata ndai. Si terakhir iutus Dibata AnakNa guna nehken Berita Si Mehuli kerna Kinirajan Dibata, e pe itulakna janah ibunuhna Anak Dibata ndai. Erkiteken si e, enggo pasti pemimpin-pemimpin Yahudi datken ukumen i bas Dibata nari janah keselamaten si tuhu-tuhu ibereken bangsa-bangsa si deban.

Lit kutipen i bas Mas. 118:22-23 nari. Antusenna, rencana Dibata si mehuli la banci igagalken manusia. Batu si ambekken bangsa Israel si labo tek, ijadiken Dibata batu palas keselamaten man bangsa-bangsa si deban si tek man Dibata i bas Yesus Kristus.  

Kenca enggo ibegiken perumpaman enda ndai, i bas ay. 12 ituriken, pemimpin-pemimpin Yahudi ndarami dalan guna nangkap Yesus, sebab itehna maka ia kap si imaksudken i bas perumpaman ndai. Tapi perbahan mbiar ia ngenehen jelma si enterem, emaka lawes ia nadingken Yesus. Ay. 12 enda encidahken maka memang tuhu perumpaman si ikataken Yesus. 

Versi Audio silahkan klik : https://youtu.be/2j-SUrSVet0

Pengkenaina

Teks si jadi ogenta sendah adi sikaitken ras tema bage pe tujun PA-ta, akap kami bagi si la lit korelasina. Melala ayat-ayat si deban si situhuna lebih relevan adi sikaitken ras tema bage pe tujun PA-ta sendah. Tapi amin bage gia, sicubaken siorati gelah lit korelasina.

Si pemena, tutus i bas si kitik banci ikaitken ras kepercayaan si enggo ibereken Dibata man banta. Amin pe kepercayaan si ibereken Dibata man bangsa Israel bage pe man pemimpin-pemimpin Israel labo hal si kitik. Pemimpin-pemimpin Yahudi labo makeken kepercayaan si enggo ipercayaken man bana alu mehuli. Justru kepercayaan si lit i bas ia ipakekenna guna ngelawan Dibata. Si enda tentu la man usihen. Kerina si lit i bas kita e me anugerah si ipercayaken Dibata man banta si harus sipakeken guna kemulian gelar Dibata. Sitik pe mungkin si ipercayaken Dibata man banta, katakenlah bujur man Dibata janah sipakeken alu mehuli. Mungkin dahinta entah profesinta kitik siakap, katakenlah bujur man Dibata, janah dahikenlah dahinta alu tutus, terteki, beritegritas. Teklah maka i bas paksana pagi, ipercayaken Dibata si mbelin man banta.

Si peduaken, usihlah juak-juak si empu kebun, amin pe dahin si iperentahken Dibata man bana mbelin resikona, tapi tetap idahikenna alu mehuli. I bas teks ogenta sendah ituriken lit juak-juak si mate ibunuh erkiteken ndahiken dahin si iperentahken Dibata man bana. Memang labo murah ngelakoken si benar sue ras peraten Dibata. Ndahiken dahin alu tutus, jujur, beritegritas, tentu melala tantangenna. Tapi amin bage gia, teklah kita maka Dibata si mpegegehi kita i bas kita ngelakoken si benar. 

Si peteluken, kai si ilakoken anak si empu kebun encidahken pengorbanen guna kiniulin entah pe keselamaten kerina kita si kitik enda i lebe-lebe Dibata. Pustaka Si Badia encidahken man banta uga Dibata mediate nandangi kita si kitik enda, ikorbankenNa AnakNa si tonggal guna keselamaten kerina kalak si tek man baNa. I bas si e pe iajuk kita gelah mediate ras nggit berkorban nandangi kalak si deban si man sampaten. Gelah kalak si deban pe banci igejapekenna keleng ate Dibata i bas kehadirenta i japa pe.

Si peempatken, kai pe si idahiken kita, dahikenlah alu tutus guna kemulian gelar Dibata. Rasul Paulus i bas Kol. 3:23 ngatakenca, “Kai pe si ibahanndu, dahikenlah e alu tutus, tempa-tempa kam erdahin guna Tuhan, labo guna manusia.” Dibata si mpengasup kam kerina Mamre guna ngelakoken kerina si jadi peraten Dibata sue ras PA-ta sendah.