SUPLEMEN PA MORIA GBKP TGL. 6 - 12 OKT. 2024

Pdt. Larena Sinuhadji (Nd. ReyRapha Tarigan)

16 Oktober HUT Moria GBKP

Ogen : Perbahanen Rasul-Rasul 16:11-15

Tema : GELUHKU JADI PASU-PASU

Tujun : Gelah Moria :

- Nggargari ulih perbahanen ras kiniteken Lidia nandangi jabuna

- Nambahi perbahanen si jadi pasu-pasu ku sekelewetna

Penaruh

Kehadirenta, sekecil apapun, harus berdampak positif ras tetap jadi pasu-pasu (berkat) man kalak si deban. Uga pe situasi geluhta, entah i bas posisi si penting sebage pemimpin, entah kalangan biasa, tiap kesempaten, ras katawari paksa pe, Tuhan banci make kita jadi saluren pasu-pasuNa. Bagi lagu rohani populer si rusur siendeken, “Hidup ini adalah kesempaten” i bas bagin refrain-na, “O Tuhan pakailah hidupku selagi aku masih kuat. Bila saatnya nanti ku tak berdaya lagi, hidup ini sudah jadi berkat.” Ertina, geluh enda erpaksa-paksa ras terbatas. Banci jadi la nari kita megegeh, terganggu kesehatenta rsd., maka tupung lit kesempaten arus kita jadi pasu-pasu (berkat) man kalak si deban.

I bas bahan PA Morianta sekali enda, dalam rangka HUT Moria GBKP pe-67-ken (16 Okt 2024), mulihi Moria iajuk guna jadi pasu-pasu i bas jabu, ingan pendahin, gereja ras masyarakat. Pasu-pasu Tuhan si enggo seh man banta ula ngadi banta arus sipepaler man kalak si deban.

Mpebagesi Pengangkan Kerna Ogen

Judul perikopta “Lidia si ringan i Pilipi tek man Yesus.” Ituriken maka i bas pemberitaan Berita Si Meriah si idalanken Paulus ras Silas seh kalak enda i Pilipi kuta si pemena i Makedoni. Sope si e memang Paulus enggo ndatken pengenehenen i ja idahna sekalak Makedoni tedis janah erdilo man bana, “Marilah ku Makedoni, sampati kami!” E me dalanna Paulus ras Silas nerusken pelayanenna ku daerah Makedoni. Pendudukna campuren, lit kalak Yunani ras Yahudi, janah daerah e merupaken jajahen Romawi. I bas kuta e me Paulus ras Silas piga-piga wari dekahna.

I bas wari Sabat kalak Yahudi, idarami Paulus ingan ertoto kalak Yahudi. Sebab lenga lit Sinagoge iangun i Pilipi. Lawes kalak enda ku darat kuta, ku tepi lau, ras i je me kalak enda jumpa ras piga-piga kalak diberu. Ipakeken Paulus guna ngerana-ngerana ras diberu-diberu si pulung i je. Janah sekalak i bas diberu e gelarna Lidia. Ia Tiatira nari janah dahinna erbinaga uis si meherga, ungu rupana. Rikutken Kamus Alkitab, maka Tiatira e me kota i negara Turki genduari. Tiatira merupaken pusat industri penting: ingan mencelup kain, ingan erbahan paken, ingan erbahan kerajinan tanah liat, kerajinan kuningan, rsd. Kamus Alkitab nuliskenca maka Lidia banci jadi agen tenunen kain ungu. Produk bulu domba si idayakenna terkenal celupanna. Sabab bahan celupanna e me akar pohon ‘mder ras igelari “mesah Turki,” dingen tetap denga iproduksi seh ku bas abad 20. Ia kalak Junani si ersembah man Dibata (proselit: kalak Yunani si enggo i-Yahudiken). Ia sekalak diberu si banci ikataken tokoh si mbelin pengaruhna i bas masyarakat (17:4). Kemungkinen Lidia mbalu, sebab Pustaka Si Badia la lit nuratken kerna perbulangenna (bdk. ay.15a). Italangi Tuhan ukurna, emaka tutus kel atena megiken kai si ikataken Paulus (bhs. Ind.: Tuhan membuka hatinya, sehingga ia memperhatikan apa yang dikatakan Paulus). Labo terjeng je saja, kenca ia bertobat pindokenna gelah ia iperidiken ras kerina isi jabuna. Ras alu meseksek ipindokenna Paulus ras Silas ku rumahna. Kai si ilakokenna labo terjeng basa-basi, sabab ipindokenna kel gelah banci Paulus ras Silas kesilang ku rumahna, tandana maka enggo ia tek man Tuhan.

Piga-piga hal si penting si banci siteladangi arah Lidia nari :

• Aminna pe ia pengusaha ras secara finasial sikap, tapi lit denga waktuna guna ersembah man Tuhan.
• Tuhan erdahin arah KesahNa Si Badia, maka asum ia megiken Kata Dibata tuhu-tuhu fokus kel ukurna. Ertina, Lidia kalak si fokus ras tekun. Asum ia erdahin sungguh-sungguh ia erdahin. Asum ia ersembah man Tuhan, pusuh ukurna fokus man Tuhan. Arah ulih pemberitaan Firman Tuhan, maka ia iperidiken ras seisi jabuna. Ertina, i jenda Lidia mabai keluargana tek man Tuhan Yesus. Lidia enggo pang erberita ras la hanya ngukurken dirina sendiri.
• Buah kinitekenna teridah arah ia metemue ras nggit menjamu hamba Tuhan. Bukan hanya sekedar basa-basi tapi betul-betul kalak si mehuli (“ipindokenna kel gelah kami kesilang ku rumahna” - bhs. Ind., “Ia mendesak sampai kami menerimanya”).
• Teridah kiniterukur ukur Lidia arah ia menjamu hamba Tuhan. Bahkan rikutken Perb. Rasul 16:40, asum Paulus ras Silas ndarat penjara nari, lawes ia ku rumah Lidia. Rumah si ipakenna guna ingan pulung perpulungen. Sabab i je nari nge ipetetap Paulus ukur perpulungen ras berkat ia nandingken kuta e.

Pengkenaina

Tema PA Moria-nta “Geluh jadi pasu-pasu” njemba kita maka arah kehadirenta berdampak positif man kalak si deban, benaken jabunta, jiran tetangga, teman sada perpulungen, rsd. Arah pengerana, perbahanen si mehuli, talenta si lit i bas kita ras erbage kiniulin si banci sibereken kita man kalak si deban (semangat, motivasi, senyum, bantuan tenaga, dana, rsd.).

Moria GBKP enggo 67 tahun. Biasana momen ulang tahun ipake guna mengevaluasi, kai si enggo silakoken ras kai si lenga, ras kai nari si perlu ipekena ku lebe wari enda. Momen si ipake guna ngataken bujur man Tuhan, ras terus mindo kepentarenNa gelah banci ku lebe wari enda lebih maksimal geluh si igeluhken kita. Gejapkenlah maka Tuhan enggo masu-masu kita alu erbage si mehuli, pemeteh, gegeh, kesehaten, talenta, rsd. Adi sedekah enda, kita hanya ngukurken diri sendiri, kurang kita ernanam man kalak si deban, e me si perlu ikikis (ipedauh) i bas dirinta. Tanamkan bas dirinta, geluh enda singkat ras kita arus jadi pasu-pasu (berkat) man kalak si deban.