SUPLEMEN PA MORIA GBKP TGL. 3 - 9 MARET 2024

Pdt. Larena br. Sinuhadji (Nd. ReyRapha Tarigan)

Dinamika Perjabun

Si Man Ogen : Heber 13:4-5

Tema : TETAP NGERGAKEN PERJABUN

Tujun : Gelah Moria :

1) Nuriken kecibal jabu i lebe-lebe Dibata

2) Nggejapken uga ergana jabuna i lebe-lebe Dibata

Metode : Meditasi & Aksi

Penaruh

I bas kinitekenta, perjabun e me inisiatif Dibata, Matius 19:6 ngatakenca, “Emaka lanai bo ia dua, tapi sada. Dage si enggo ipersadaken Dibata la banci isirangken manusia.” I bas kesempaten enda mulihi kita erlajar kerna ngergaken perjabun sebage anugerah Dibata man banta. I bas Konfesi GBKP Bab XI si ngerana kerna perkawinan poin si pemena ikataken, “Perkawinan merupakan anugerah Allah yang harus dipelihara dalam kekudusan.”

Mpebagesi Si Man Ogen

Heber 13, bagin terakhir i bas kitab enda, ngerana kerna hal-hal praktis si iarapken penulis si la tersinget gelarna, banci ilakoken kalak Kristen paksa si e. Secara khusus i bas ay. 4 ngerana kerna hubungen i bas jabu, i ja perbulangen ras ndehara tetap arus ngergai perjabun. “Kerinalah kam ngergaken perjabun,” ertina ibenai i bas perbulangen ras ndehara arus ngehamati rumah tanggana, bage pe rumah tangga kalak si deban. Perbulangen entah pe ndehara la banci ngerontangi jabuna bage pe jabu kalak si deban. Sebalikna pihak-pihak si deban i darat jabuta pe ula sempat erbahan rontang perjabunta, umpamana wanita idaman lain (wil), pria idaman lain (pil), termasuk orang tua, entah pe mertua. Sebab enterem jabu iatur orang tua entah pe mertuana.

Hal si deban si ilumbaken i bas ay. 4 enda, kegeluhen perbulangen ras ndehara i bas perjabun la banci melket. Kegeluhen i bas jabu arus ijaga kebadianna. Adi bas nats-ta jelas ikatakenna, erlagu la mehuli entah pe si erlua-lua (mencemarkan tempat tidur, karena orang-orang sundal dan pezinah akan dihakimi oleh Allah). Hal enda tegas ilumbaken man kalak Kristen paksa si e, erkiteken enggo lit bas perpulungen si ndabuh ku bas perzinahen (perselingkuhen), si la arusna ilakoken kalak Kristen. Janah konsekuensi man kalak si la erlagu la mehuli (erlua-lua) iukum Dibata pepagin.

I bas ay. 5 ilumbaken penulis kitab Heber pemahamen kiniteken si mehuli kerna duit nina, “I bas geluhndu ola kam merangap nandangi duit. Ermengkahlah atendu asa si lit i bas kam. Sabab nina Dibata, “Asa ndigan pe la kam Ku tadingken, asa ndigan pe la kam Ku pulahi.” I bas terj. TB-LAI nina, “Janganlah kamu menjadi hamba uang dan cukupkanlah dirimu dengan apa yang ada padamu. Karena Allah telah berfirman: “Aku sekali-kali tidak akan membiarkan engkau dan Aku sekali-kali tidak akan meninggalkan engkau.” “Ola kam merangap nandangi duit” i bas  bhs. Yunani nina aphilagyros ertina: tidak mencintai uang atau tidak serakah. Kerna pedah enda akap kami enggo jelas nilai kinitekenna nandangi duit entah pe erta kebayaken doni enda, sebab si jadi pusat i bas kiniteken Kristen labo duit entah pe erta kebayaken doni tapi kiniteken man Yesus Kristus. Hal enda penting isingetken sebab salah sada hal si banci ngerontangi perjabun kalak si tek e me merangap nandangi duit.

Si jadi latar belakang ay. 5 enda, i bas kebiasaan geluh kalak Yunani paksa si e lit budaya hedonisme, akar katana e me hedone ertina kenikmatan ras kesenangan doni enda. Hedonisme e me gaya hidup si njadiken kenikmatan fisik ras kesenangan psikis sebage tujun si utamana geluh i doni enda. I bas si e duit entah pe erta kebayaken doni tuhu-tuhu jadi perayaken sebab arah e nge kenikmatan fisik ras kesenangan psikis banci situkur. Tapi enggo radu ras siteh maka kenikmaten ras kesenangen doni enda sementara saja sifatna, la banci mereken kebahagiaan si tuhu-tuhu. I bas konteks geluh si bagenda penulis surat Heber nehken pedah si tujunna gelah perpulungen ula terbaba arus, ula fokus ku bas kenikmatan ras kesenangan doni si sifatna sementara, tapi arus fokus i bas erkiniteken man Dibata, sebab Dibata si erkuasa ncukupken kerina kebutuhen geluh janah i bas Dibata lit kesenangan si tuhu-tuhu. Erdahin guna ndatken duit entah pe erta kebayaken doni enda labo ilarang, saja ula sempat duit entah pe erta kebayaken doni enda ngkuasai geluh jabu-jabu kalak si tek.

Versi Audio silahkan klik : https://youtu.be/u4s4quP-FBE

Pengkenaina

Tema ras tujun PA-ta sendah ngajuk kita kerina Moria gelah tetap ngergaken perjabun. Kerna kecibal jabu i lebe-lebe Dibata rikutken tujun si pemena i bas PA-ta sendah, jelas i bas Konfesi GBKP Bab XI si ngerana kerna perkawinan, poin pe-3-ken ikataken, “Perkawinan merupakan ikatan yang kudus dan anugerah Allah kepada manusia, maka perkawinan itu harus dijalani dengan ucapan syukur dan penuh tanggung jawab.” Perjabun kalak si tek e me iketen badia anugerah Dibata nari man banta. Emaka rikutken tujun si peduaken i bas PA-ta sendah, dalanilah perjabunta alu dem pengataken bujur ras tanggung jawab. Enda akap kami bentuk konkrit nggejapken uga ergana jabuta i lebe-lebe Dibata.

I bas PA-ta sendah, mulihi kita isingetken kerna ngergaken ras njagai kebadian perjabun sebab perjabun e anugerah i bas Dibata nari. I bas ngergaken ras njagai kebadian perjabunta, kita pe harus metenget nandangi potensi-potensi si banci encedaken perjabunta, salah sadana e me merangap nandangi duit. Erta kebayaken e pe anugerah i bas Dibata nari si harus sikelola alu mehuli guna kebahagiaan perjabunta bage pe sebage sarana pembarken Berita Si Meriah. I bas Konfesi GBKP Bab XI kerna perkawinan poin si pe-5-ken ikataken nina, “Makna perkawinan adalah sebagai media (wadah) karya keselamatan Allah. Allah senantiasa campur tangan di dalam kehidupan keluarga dan melalui kehidupan tersebut Allah mewujudkan karya keselamatanNya. Dengan demikian, perkawinan yang berkenan kepada Allah adalah perkawinan yang dilaksanakan untuk kemuliaan Allah.”

Mari radu ras kita tetap ngergaken perjabun, pindolah gegeh i bas Dibata nari gelah ipengasupNa kita tuhu-tuhu ngergaken perjabun si enggo ianugerahken man banta. Megegehlah kita ertoto kerna perjabunta gelah tetap paguh ras jadi pasu-pasu man sekelewetta.