SUPLEMEN PJJ GBKP TGL. 17 - 23 MARET 2024

Pdt. Larena br. Sinuhadji (Nd. ReyRapha Tarigan)

KEKEKEN YESUS MEREKEN PENGARAPEN

1 Petrus 1:3-5 - Paskah

Penaruh

Lit sekalak penulis si ngatakenca bagenda, “Seseorang dapat bertahan hidup selama 40 hari tanpa makan, 3 hari tanpa minum, 8 menit tanpa oksigen, tetapi hanya dapat bertahan hidup 1 detik tanpa harapan.” Ertina erpengarapen e me unsur si penting i bas geluh manusia. Alu erpengarapen manusia ngasup ngalaken kerina tantangen bage pe kiniseran si mberat. I bas Pustaka Si Badia pe pengarapen e me unsur si penting i bas erkiniteken man Dibata i bas Yesus Kristus. Heber 6:19a ngatakenca i bas terj. BIMK nina, “Harapan kita itu seperti jangkar yang tertanam sangat dalam dan merupakan pegangan yang kuat dan aman bagi hidup kita.”

I bas PJJ-ta sendah radu ras kita erlajar kerna nggeluh erpengarapen i bas Yesus Kristus dalam rangka menyambut Paskah tahun 2024. Rikutken bahan PJJ-ta sendah nampati kita i bas kita ersikap menyambut rangkaian kegiatan Paskah 2024 i bas runggunta masing-masing

Mpebagesi Ogen

Adi sioge bindu 1 benaken ay. 1, secara garis besar Surat Rasul Petrus enda itujuken man perpulungen kalak si tek si merap i belang-belang propinsi Pontus, Galati, Kapadokia, Asia ras Bitinia, kerinana lit i bas negara Turki bagin utara jaman gundari enda. Perpulungen kalak si tek paksa si e sangana ngenanami erbage-bage percuban (ay. 6). Rasul Petrus mereken pergegeh gelah i bas keadaan si bagenda rupana perpulungen tetap ermeriah ukur, sebab erbage-bage percuban e tujunna gelah memurniken kiniteken perpulungen e. Sebab emas si banci ceda e pe isepuh alu api, apai ka kiniteken perpulungen si ndauh ergan asangken emas.

Secara khusus perikopta i teruh judul “Pengarapen si nggeluh” (Alkitab Terj. Baru ed. 2, “Pengharapan, iman dan kasih”). Petrus mpersingeti perpulungen gelah tetap mpenangkih pengataken bujur man Dibata, i bas Yesus Kristus. Sebab arah perkuah ateNa, arah kematen ras kekekenNa enggo iberekenNa man banta kegeluhen si mbaru. Janah kekekenNa e mereken pengarapen si nggeluh man banta kalak si tek man baNa. Sabab la kita menyembah man Tuhan si mate tapi Tuhan si nggeluh, si enggo naluken kuasa dosa ras kematen (bdk. 1 Kor. 15:14-15). Kekeken Kristus mereken pengarapen si nggeluh man banta. Kai alasenna? 

Si pemena lebe, keselamaten enggo iberekenNa ras enda labo mbera-mbera. Si peduaken, adi kematen pe enggo italuken Tuhan Yesus, maka uga pe belinna pergumulen kegeluhenta enggo pasti Tuhan mereken gegeh ras dalan pulah man banta. Si penting, apakah tuhu-tuhu kita ernalem man Tuhan entah lang? Si peteluken, arah kekekenNa isikapken Dibata man anak-anakNa e me sorga ingan kesenangen e, i ja la banci ceda, macik entah pe luntur. Emaka nina Rasul Petrus, “Ermeriah ukurlah alu keriahen si mbelin ras mulia sebab keselamaten pertendin enggo ialoken perpulungen sebage ulih kinitekenna man Dibata” (ay. 8-9). Labo terjeng je saja, maka perpulungen si tetap setia erpengarapen man Tuhan tetap ipasu-pasu Tuhan ras tetap ikawali kuasa Dibata guna keselamaten si enggo sikap guna ipetangkas Dibata i bas paksa pendungi pagi.

Versi Audio silahkan klik : https://youtu.be/N48xmILMFr8

Pengkenaina

PJJ-ta sendah i bas rangka persiapenta merayakan rangkaian Paskah tahun 2024. Minggu-minggu enda enggo bengket kita ku bas Minggu-minggu Pra-Paskah. Ngujungi Minggu-minggu Pra-Paskah (Passion), maka lit istilah Triduum Paskah si ertina, tiga hari mengakhiri Pra-Paskah  (Triduum bahasa Latin yang berarti “tiga hari”), ketiga hari itu adalah Kamis Putih (Suci), Jumat Agung, dan Sabtu Sunyi (Pengharapan). Tentuna, arah kerina kegiaten enda iarapken mabai perpulungen ngasup nggejapken kiniseran si ialami Yesus, kematenNa, janah puncakna e me Paskah, kekeken Yesus i bas kematen nari. I bas telu wari suci enda lit penekanen si berbeda-beda dalam rangka mengenang kiniseran ras kemenangen Kristus.

Kamis Putih (Kamis Badia) menitikberatken i bas kiniteruken ukur, ras pengutusen guna ndalanken perentah baru (Mandatum Novum) guna saling ngkelengi ras melayani. Kegiaten burihi nahe sope Perjamuan Makan Malam biasa ilakoken paksa si e, tapi Yesus mereken usihen alu mburihi nahe ajar-ajarNa. Umumna si iburihi nahena kalak si ganjangen kedudukenna, umapamana ndehara ku perbulangen, anak ku orang tua, hamba ku tuan, entah murid ku guru. Tapi Yesus mereken usihen si sebalikna, Sang Guru mencuci kaki murid-muridNya. Hal enda iteladani Gereja sebagai simbol pengampunan ras saling melayani, dengan mencuci beberapa orang terpilih yang kesehariannya kadang diabaikan. Harus siperdiateken, momen murihi nahe labo sekedar ritual romantisme emosional belaka tapi ngusih kiniteruken ukur Yesus Kristus. Sebab murihi nahe kalak si deban lebih murah asangken mbersihken pusuh ras ukurta sendiri. Situhuna teladan Kamis Putih merupaken pola kegeluhenta tep-tep wari kalak si tek.

Jumat Agung (Jumat Si Mbelin) encidahken pengorbanen Yesus, nggit IA mate guna keselamaten manusia. Jumat Si Mbelin mpresingeti kita kerna keleng ate Tuhan si mbelin. Nggit Dibata i bas Yesus Kristus mate guna kita, janah ialemi Dibata dosa-dosanta. Arah si e mempersingeti kita maka geluhta pe ula hanya guna dirinta, ula kita egois, mediatelah kita janah nggit kita berkorban guna kalak si deban.

Sabtu Sunyi (Sabtu Pengarapen) e me moment ceda ate (berkabung) antara Jumat Si Mbelin ras sukacita erkiteken kemenangen Paskah. Dalam bahasa Latin Sabbatum Sanctum bertujuan memperingati saat raga Tuhan kita Yesus Kristus dibaringkan di kubur. Sabtu Sunyi adalah masa pengharapan (masa hening). Pengharapan itu bukan pengharapan kosong tetapi pengharapan yang pasti. Bali ras ajar-ajarNa si  tuhu-tuhu mengalami kelungunen ras kebiaren (Bdk. Johanes 20:19).

Paskah ngingetken kita maka Tuhan Yesus labo Tuhan si mate tapi Tuhan si nggeluh. KegeluhenNa la berakhir i bas kuburen, tapi keke i bas si mate nari. KekekenNa merupaken kekekenta, maka kita pe enggo menang naluken dosa ras kamaten. Maut enggo italuken. Walaupe maut enggo italuken, labo berarti kita anggap sepele nandangi pengaruh dosa doni enda. Kristos Victor merupaken salam yang diungkapkan bahwa “Kristus menang” dalam momen Paskah. Kekeken Tuhan Yesus mpengasup kita pe guna mateken sura-sura daging, gelah kinitekenta tetap paguh.

Sue ras tema PJJ-ta sendah, tetaplah paguh i bas erpengarapen. Sebab pengarapenta i bas Yesus Kristus labo PHP (pemberi harapan palsu) bagi rusur ilakoken doni enda. Pengarapenta e me pengarapen si tuhu-tuhu, sesuatu yang pasti akan Allah genapi. Pengarapen i bas Yesus Kristus enggo terbukti mpegegehi kalak si tek i bas jaman Rasul Petrus nari seh asa gundari, janah enggo terbukti mpengasup kalak si tek i bas kerina jaman menjadi manusia-manusia tangguh, berintegritas, dan menjadi berkat untuk banyak orang. Selamat mperingeti rangkaian Paskah tahun 2024. Dibata si masu-masu kita kerina.