SUPLEMEN PJJ GBKP TGL. 31 MARET - 6 APRIL 2024

Pdt. Larena Sinuhadji (Nd. ReyRapha Tarigan)

KEKELENGEN NANDANGI UNDANG-UNDANG TUHAN

(Masmur 119:97-104)

Penaruh

Ngikutken aturen-aturen si lit i sekelewetta akap kami seh kel pentingna. Sebab tek kami maka aturen-aturen e ibahan guna kiniulin, kiniraturen, entah pe guna keselamatenta bage pe kalak si deban. Bayangken saja adi umpamana kerina pengendara mobil entah pe motor la nggit ngikutken aturen lalu lintas, enggo pasti melala terjadi kecelakaan lalu lintas si memakan korban jiwa. Kerina barang-barang si itukur kita adi sipergunaken asal-asalen la sue ras petunjuk pemakenna, enggo pasti pedas ceda. Tambar entah pe suplemen vitamin adi sikonsumsi la sue ras aturen, banci erbahanca kita sakit. Melala denga contoh-contoh si deban.

I bas PJJ sendah radu ras kita erlajar kerna engkelengi ras makeken undang-undang Tuhan arah Pemasmur nari.

Mpebagesi Ogen   

Masmur 119 e me bindu si gedangna i bas Putaka Si Badia, lit 176 ayat. Rikutken AlkiPEDIA, Mas. 119 masuk ku bas kelompok Mazmur kepercayaan dan pengabdian si mengungkapkan: 1) Kepercayaan seseorang akan integritas Allah dan pertolongan kehadiranNya. 2) Pengabdian hati kepada Allah. Rikutken Wikipedia, lit tradisi si ngatakenca maka Mas. 119 enda ipake Daud guna ngajari Salomo kitik-kitik nari seh ngayak dewasa. Alkitab TB-LAI mereken judul perikop ay. 1-176 e me “Bahagianya orang yang hidup menurut Taurat TUHAN.” Sedangken i bas Terj. BIMK bage pe i bas bhs. Karo perikop enda ibagi ku bas piga-piga judul perikop. Si jadi ogenta sendah lit i bas sada perikop ay. 97-104 alu judul “Kekelengen nandangi undang-undang TUHAN,” i bas Alkitab BIMK nina, “Cinta kepada hukum TUHAN.”

Perikop si jadi ogenta sendah ibenaken alu ungkapen perasaan Pemasmur nina, “Lanai tanggung keleng ateku man undang-undangNdu,” i bas terj. TB-LAI nina, “Betapa ku cintai TauratMu!” Keleng ate entah pe cinta kasih si lit i bas diri Pemasmur e erbahanca ikusur-kusurna i bas ukurna gedang-gedang nu wari. I bas terj. BIMK nina, “aku merenungkannya sepanjang hari.” Kata-kata “keleng ate si lanai tanggung” (“betapa ku cintai”) rikutken tafsiren Utley ertina:

1. Rela menghabiskan waktu bersama sesuatu hal atau sosok yang dicintainya.
2. Bersukacita apabila bersama sesuatu hal atau sosok yang dicintainya.
3. Mematuhi sesuatu hal atau sosok yang dicintainya.
4. Mau menceritakan tentang kebaikan atau keistimewaan sesuatu hal atau sosok yang dicintainya.

Janah kata-kata “merenungkannya sepanjang hari” seri ertina ras “selama-lamanya.”

Selanjutna, rikutken Alkitab terj. TB-LAI, “Undang-undang Tuhan” e me “TauratMu.” Taurat i jenda seri ras 5 Kitab Musa, Kejadin seh Ulangan. Tapi rikutken terj. BIMK iterjemahken “HukumMu,” enda akap kami mengindikasikan si ipelajari Pemasmur labo terjeng Kitab Taurat, banci ka lit kitab-kitab si deban. I bas Undang-undang Tuhan si ipelajari Pemasmur, lit piga-piga bentuk konkrit undang-undang e, rikutken Alkitab terj. TB-LAI) lit je ikataken: “perintahMu” (ay. 98); “peringatan-peringatanMu” (ay. 99); “titah-titahMu” (ay. 100 ras 104); firmanMu (ay. 101); hukum-hukumMu (ay. 102); janjiMu (ay. 103). Ertina Undang-undang Tuhan labo terjeng daftar aturen entah pe daftar ukumen, tapi lit persinget (peringatan) bage pe janji i bas Dibata nari.

Kai saja ulih Pemasmur kenca enggo ipelajarina bage pe irenungkenna Undang-undang Tuhan ndai? Si pemena i bas ay. 98, 100 ras 104 ikataken maka Pemasmur datken kepentaren i bas Dibata nari si kualitasna lebih unggul asangken kepentaren-kepentaren si lit i doni enda. Janah kepentaren i bas Dibata nari erbahanca ciga kal ate Pemasmur nandangi kata la tuhu (segala jalan dusta). Si peduaken, i bas ay. 99 ikataken maka Pemasmur datken pengertin (akal budi) si lebih unggul asangken pemeteh (ilmu pengetahuan) doni enda. Si peteluken i bas ay. 101 ras 102 ikataken maka Pemasmur datken gegeh si erbahanca ngasup ia nilahken perbahanen-perbahanen si la ngena ate Dibata, janah ipengasup Dibata ia ngikutken kerina si jadi peraten Dibata. Si peempatken i bas ay. 103 isaksiken maka janji-janji Dibata erbahanca Pemasmur idemi alu kemalemen ate, keriahen ukur, bage pe dame i bas kegeluhenna.

Versi Audio silahkan klik : https://youtu.be/tGWvhgfz0G0

Pengkenaina

I bas PJJ-ta sendah radu ras kita iajuk gelah semakin engkelengi Undang-undang TUHAN. I bas jamanta gundari enda, Undang-undang Tuhan seri ras Kata Dibata, entah pe Firman Tuhan si lit i bas Pustaka Si Badia. Ertina cakupenna enggo lebih luas asangken Kitab Taurat. Keleng ate memang banci muncul dengan sendirina, tapi keleng ate banci ka ilitken ras itumbuhkembangken i bas dirinta. Lit kuan-kuan kalak Jawa nina, “Witing tresno jalaran soko kulino” ertina cinta itu akan tumbuh karena terbiasa. Makana i bas budaya Jawa nai lit perjodohen si awalna la lit rasa cinta, tapi erkiteken enggo terbiasa bersama setiap saat i bas perjabun, erbahanca muncul benih-benih cinta. Emaka rikutken tema PJJ-ta sendah mari radu ras situmbuhkembangken rasa cinta nandangi Pustaka Si Badia i bas kegeluhenta si tep-tep wari.

I bas Konfesi GBKP si ngakuken kerna Alkitab i bas Bab I ayat 6 ikataken nina, “Alkitab adalah dasar kehidupan orang Kristen (Mzm. 119:105) yang merupakan dasar pengajaran, nasehat dan penuntun tingkah laku (2 Tim. 3:16). Tegas je ikataken maka la lit palas si deban selain Pustaka Si Badia si jadi palas kegeluhen kalak si tek. Adi palasta paguh maka la lit kai pe si ngasup menghancurkan kegeluhenta. Selanjutna i bas ayat 7  ikataken, “Pemahaman dan penghayatan yang benar akan Alkitab hanya oleh pertolongan Roh Kudus” (1 Kor. 2:10; Yoh. 16:8-11). Ertina alu gegehta la kita ngasup ngantusi bage pe ngelakoken Kata Dibata i bas geluhta si tep-tep wari. E maka i bas kita erlajar Kata Dibata harus sipindo penampat i bas Kesah Si Badia nari gelah ipengasupNa kita ngantusi bage pe ngelakoken kerina si jadi peraten Dibata i bas kegeluhenta si tep-tep wari. Selanjutna i bas ayat 8 konfesinta ikataken nina, “Penghayatan isi Alkitab menjadikan hidup berbuah dalam kehidupan sehari-hari” (Gal. 5:22-23; Yak. 2:14-26; Yoh. 15:5). Bagi Pemasmur i datas, harus lit ulih i bas kita erlajar Kata Dibata, harus lit bukti ras dampakna i bas geluhta si tep-tep wari. Buktina geluhta semakin diperbaharui janah kehadirenta ernanam mehuli man sekelewetta.

Puji Tuhan maka arah Konfesi bage pe Misina, GBKP enggo ngakuken maka erlajar Kata Dibata e me hal si seh kel penting i bas kegeluhen kalak si tek. Salah sada misi si ate icapai i bas GBKP e me “Menumbuhkembangkan spiritualitas jemaat berbasis Alkitab.” Tahun si lepas enggo sibentuk tim-tim pelayanen salah sadana e me kelompok membaca Alkitab. Kerina kegiaten si berkaiten ras Alkitab harus tetap sidukung. Mari radu ras kita menumbuhkembangkan rasa cinta kepada Alkitab. Sebab melala kel manfaat si idatken kita arah ngoge Pustaka bagi si enggo isaksiken Pemasmur i bas ogenta sendah. Tek kita adi ibereken Dibata man Pemasmur erbage-bage ulih si mehuli arah kekelengenna nandangi Undang-undang Tuhan, ibereken Dibata pe man banta kepentaren, pengertin (akal budi), gegeh, janji-janji Dibata si erbahanca kita idemi alu kemalemen ate, keriahen ukur, bage pe dame i bas kegeluhenta. Dibata si mpengasup kita.