SUPLEMEN PA MAMRE GBKP TGL. 24 - 30 MARET 2024

Pdt. Larena Sinuhadji (Nd. ReyRapha Tarigan)

Teks : Heber 6:1-6

Tema : NDALANKEN PERATEN DIBATA

Tujun : Gelah Mamre :

1) Meteh kerna peraten Dibata si jadi i bas geluh manusia

2) Tetap ndalanken peraten Dibata i bas kegeluhenna

Penaruh

Mungkin rusur sibegi istilah “long life education” si ertina, proses erlajar e labo ngadi kenca enggo kita lulus i sekolah nari, tapi harus terus idalanken seh kita nadingken doni enda. Janah proses erlajar e labo terjeng secara formal saja, tapi kerina kita banci erlajar arah pengalamen ras kai pe si terjadi i bas kegeluhenta.

I bas PA-ta sendah, erlajar kita arah perpulungen paksa si nai kerna ketutusen i bas erlajar kiniteken man Dibata i bas Yesus Kristus. Sebab adi ngadi kita erlajar maka tanggung jawabta i bas kita ndalanken peraten Dibata pe ngadi. Ertina lit kaiten antara erlajar alu la erngadi-ngadi ras ndalanken peraten Dibata. 

Mpebagesi Teks

Surat Heber itujuken man perpulungen-perpulungen kalak si tek si berlatar belakang Yahudi i bas perantauan. La nari tersinget ise gelar penulis surat enda, lit si ngatakenca Paulus, Apolos, Filipus, tapi si pasti si nuliskenca i bas kalangen per-Berita Si Meriah nari entah pe pemimpin-pemimpin Kristen paksa si e. 

Adi sioge bindu 5 nari sope si jadi ogenta sendah, teridah maka penulis surat Heber enda mpersingeti perpulungen alu keras. Engkai maka bage? Sebab pengarapen man Kristus enggo mulai bene janah lit perukuren i bas perpulungen guna nadingken kiniteken man Yesus Kristus (murtad, ay. 6). Kiniteken perpulungen paksa si e banci ikataken jalan di tempat, entah pe la bertumbuh alu mehuli (bdk. Heb. 5:13-14). Situasi si bage rupana terjadi akap kami erkiteken, si pemena lebe, tantangen arah ndarat nari. Perpulungen paksa si e ngenanami kiniseran (Heb. 10:32-34). Emaka i bas ay. 4-6 ituriken lit anggota-anggota perpulungen si murtad nadingken kinitekenna man Yesus Kristus. Si peduaken, tantangen arah bas nari alu litna ajaren-ajaren si papak (Heb. 13:9). Ajaren-ajaren si papak enda ndai banci jadi erbahanca kiniteken perpulungen la bertumbuh. Tapi si parahna akap kami, la nggit perpulungen e erlajar kerna kiniteken Kristen alu mehuli (Heb. 5:11-12).

Emaka i bas ogenta sendah, iajuk Penulis Surat Heber, gelah perpulungen e nggit erlajar alu tutus kerna kiniteken man Dibata i bas Yesus Kristus. Ikataken Penulis Surat Heber i bas ay. 1 ras 3 nina, “Majulah kita ku pelajaren-pelajaren si terbagesen kerna kegeluhen Kristen … marilah kita maju! Janah enda me sidalanken adi bagi peraten Dibata.” I bas terj. BIMK nina, “Marilah kita maju ke pelajaran-pelajaran yang lebih lanjut tentang kedewasaan kehidupan Kristen ... Marilah kita, jika Allah mengizinkan, maju ke pelajaran-pelajaran lebih lanjut!” Adi sioge ay. 4-6 bagi si enggo isingetken i datas, ajuken Penulis Surat Heber enda i bas konteks lit anggota-anggota perpulungen si nadingken kinitekenna man Yesus Kristus, nundalken Dibata, entah pe murtad. Kalak si tek si murtad memang erbage-bage penyebabna. Selain erkiteken kiniseran si mberat, banci jadi akap kami erkiteken enggo lanai nggit erlajar terbagesen kerna kegeluhen Kristen, entah pe kiniteken man Dibata  i bas Yesus Kristus.

Versi Audio silahkan klik : https://youtu.be/suOHO3_5VgI

Pengkenaina

Tema ras tujun i bas PA-ta sendah ngajuk kita kerina, khususna kam kekelengen kami Mamre, gelah ndalanken kerina si jadi peraten Dibata. Konsekuensi logis kalak si enggo ngaloken keselamaten i bas Yesus Kristus e me nggeluh i bas keselamaten. Nggeluh i bas keselamaten e tanda-tandana ndalanken kerina si jadi peraten Dibata. Akap kami kita kerina, khususna kam kekelengen kami Mamre, enggo meteh kerna si e. Adi erdahin kita i bas sada perusahaan, tentu kita harus ngikutken kerina si jadi peraturen i bas perusahaan e. Sipake seragamna, sicidahken kartu identitasna, erdahin sue ras aturen-aturen si lit, rsd.-na. Bage ka pe adi kita pengikut Kristus, kerina pengkebet geluhta harus ncidahken ajaren-ajaren Kristus. Lit istilah “surat Kristus” nina, sebab memang geluhta enda surat Kristus si banci ioge kalak i sekelewetta.

Kai saja si jadi peraten Dibata? Adi rikutken ogenta sendah, iajuk kita gelah erlajar alu la erngadi-ngadi. I bas piga-piga gereja gundari enggo enterem si erbahan kelas-kelas erlajar ngawan entah pe katekisasi lanjutan man ngawan perpulungen si enggo dewasa gelah reh mbagesna pemetehna kerna kiniteken Kristen. Enda akap kami sada metode internalisasi nilai-nilai kristiani si mehuli, sebab arah proses internalisasi si terus-menerus erbahanca Kata Dibata e mengakar i bas geluhta. Lit istilah “learning by doing,” belajar sambil melakukan. Enda akap kami point penting erpalasken ogenta sendah. Long life education, erlajar kerna erkiniteken alu la erngadi-ngadi. Tapi i bas kita erlajar pe harus nggit kita naik kelas. Ula bagi perpulungen i bas jaman Heber, kelasna lalap i kelas dasar, la ia nggit naik kelas. Emaka marilah terus sitambahi pemetehta, tapi labo terjeng tambah pemeteh saja, ngasup kita ngelakokenca janah ngasup kita jadi usihen man sekelewetta.

Kai nari si jadi peraten Dibata? Adi rikutken Galati 5:22-23, kalak si tek e me kalak si enggo lit i bas dirina ulih Kesah Si Badia: lit kekelengen, lit keriahen, lit kemalemen ate, lit kesabaren, perbahanenna mehuli, lit kesetiaan, lit kiniteruken ukur, janah ngasup engkuasai dirina. Selain si e melala denga si jadi peraten Dibata i bas Pustaka Si Badia. Emaka marilah sioge Pustaka Si Badia. Sebab Pustaka Si Badia e me sumber utama kinitekenta. Si terakhir, ula sempat kita ngadi ertoto, sebab ertoto e me caranta berkomunikasi entah pe berelasi ras Dibata. Pindolah rusur i bas totonta pergegeh i bas Dibata nari gelah ipengasupNa kita ndalanken kerina si jadi peraten Dibata i bas geluhta. Gelar Dibata termulia arah kering pengkebet geluhta. Dibata si mpengasup kita.