SUPLEMEN PJJ GBKP TGL. 3 - 9 MARET 2024

Pdt. Larena br. Sinuhadji (Nd. ReyRapha Tarigan)

MEDIATE NANDANGI SEKELEWET (Roma 15:14-21)

[Sasaren Pelayanen GBKP Tahun 2024]

Penaruh

Rasul Paulus e me sekalak tokoh Alkitab si sangat penting i bas Padan Si Mbaru. I bas kerina kitab si lit i bas Padan Si Mbaru, surat-surat Rasul Paulus si mbuena. Lit 9 surat si itujuken man perpulungen-perpulungen kalak si tek si merap marpar i Roma, Korinti, Galati, Epesus, Filipi, Kolose, Tesalonika, janah lit 4 surat si itujuken man ajar-ajarna, e me Timotius, Titus, ras Pilemon. I bas kitab Perbahanen Rasul, turi-turin kerna karya er-Berita Si Meriah Rasul Paulus man bangsa-bangsa si deban datken porsi si lebih mbue asangken rasul-rasul si deban. Banci ikataken adi la lit kalak bagi Paulus, maka banci jadi Berita Si Meriah labo pernah seh ku Taneh Karo.

I bas PJJ sendah radu ras kita erlajar i bas Paulus nari kerna kepedulianna, mediatena, nandangi bangsa-bangsa si deban si lenga itandaina Dibata i bas Yesus Kristus. Arah teladan si ibereken Paulus iarapken semakin bages pengangkanta bage pe dukungenta man sasaran pelayanan GBKP tahun 2024 e me “Berkarya dan berguna untuk orang lain.”

Mpebagesi Kata Dibata

Judul perikop i bas ogenta sendah e me, “Sura-sura Paulus si mbelinna e me meritaken Berita Si Mehuli.” I bas Alkitab BIMK ibere judul, “Sebab-sebabnya Paulus menulis dengan tegas.” I bas terjemahen TB-LAI e me “Paulus menjelaskan dasar-dasar tulisannya.” I bas judul-judul perikop enda nari akap kami terjemahen bahasa Karo si lebih spesifik menggambarken isi perikop si jadi ogenta sendah.

I bas pembukaan surat Roma 1:5 jelas je ikataken Paulus maka ialokenna i bas Dibata nari “jabatan rasul untuk menuntun semua bangsa.” Ertina bena-bena pelayanenna enggo terbeban Paulus guna er-Berita Si Mehuli man bangsa-bangsa si deban si labo bangsa Yahudi. Lit mediate i bas diri Paulus nandangi bangsa-bangsa si deban si lenga itandaina Yesus Kristus. Enda sue ras Amanat Agung si isehken Yesus man ajar-ajarNa sope ia nangkih ku surga, “Laweslah ku kerina bangsa manusia, bahanlah ia jadi ajar-ajarKu: peridiken ia i bas gelar Bapa, gelar Anak, ras gelar Kesah Si Badia, janah ajari ia ngikutken kerina si enggo Ku pedahken man bandu. Janah ingetlah! Aku tetap ras kam seh ku kedungen jaman” (Mat. 28:19-20).

I bas ogen si jadi bahan renungenta sendah, mulihi ipertegas Paulus kerna panggilen pelayanenna man bangsa-bangsa si deban entah pe mediate Paulus nandangi bangsa-bangsa si deban si lenga itehna berita keselamaten i bas Yesus Kristus. Si pemena, i bas ay. 16 mulihi isaksiken Paulus kerna tugas perutusenna guna meritaken Berita Si Mehuli guna kalak si labo Yahudi. Tek Paulus maka Dibata ngutus ia erkiteken lias ate Dibata man bana. I bas terjemahen TB-LAI bage pe BIMK hanya iterjemahken, “boleh menjadi pelayan Kristus Yesus bagi bangsa-bangsa bukan Yahudi,” entah pe, “IA sudah menjadikan saya pelayan Kristus Yesus untuk diutus kepada bangsa-bangsa yang bukan Yahudi.” Ertina amin pe lit kebeluhen i bas diri Paulus i bas er-Berita Si Mehuli, tapi alu meteruk ukur i lebe-lebe Dibata, tek ia maka si e kerina erkiteken lias ate Dibata man bana.

Si peduaken, megah iakap Paulus erkiteken persadanna ras Kritsus erbahanca kerina dahin-dahin pelayanen guna er-Berita Si Mehuli banci ilaksanakenna alu  mehuli. Erkiteken persadanna ras Kristus, Kesah Si Badia erdahin seh makana kalak si labo Yahudi patuh man Dibata (ay. 18). Kesah Si Badia si mpengasup ia erbahan tanda-tanda sengget si mbelin, janah Kesah Si Badia pe si mereken gegeh si luar biasa i bas ia niari daerah-daerah si lenga tersiari guna er-Berita Si Mehuli (ay. 19-21). Ertina i bas si e ersaksi Paulus maka i bas ia er-Berita Si Mehuli la lit gegeh si deban selain gegeh i bas Kesah Si Badia nari erkiteken persadanna ras Kristus. Kiniersadan ras Kristus penting i bas er-Berita Si Mehuli.

Si peteluken, i bas ogenta sendah teridah kerna metode er-Berita Si Mehuli si ilakoken Paulus. Si pemena lebe arah kerehenna ku tengah-tengah bangsa-bangsa si deban. Alu reh, mpetandaken diri, bage pe nggeluh berbaur ras kalak si lenga itandaina, enda akap kami metode si ilakoken Paulus. Si peduaken arah tutur kata bage pe perbahanen, nina Paulus i bas ay. 18, “arah kata si kubelasken ras arah perbahanen si kubahan.” Ertina lit erbage-bage cara si banci ilakoken i bas er-Berita Si Mehuli, janah Paulus enggo makeken kerina si banci ilakokenna guna er-Berita Si Mehuli.

Versi Audio silahkan klik : https://youtu.be/pxtE4zXfAFY

Pengkenaina

PJJ-ta sendah i bas rangka semakin mpebagesi pengangkanta kerna sasaran pelayanan GBKP tahun 2024, “Berkarya dan berguna untuk orang lain.” Berkarya dan berguna untuk orang lain tentuna i bas rangka ersaksi kerna keleng ate Kristus man sekelewetta. I bas si e, si pemena lebe, erlajar kita arah Paulus nari kerna mediate nandangi bangsa-bangsa si deban si lenga itandaina Yesus Kristus. Adi la lit mediate nandangi sekelewetta enggo pasti la kita banci berkarya dan berguna untuk orang lain.

Si peduaken, i bas kita berkarya dan berguna untuk orang lain, harus lit pemahamen i bas dirinta maka kerina kalak si tek man Yesus Kristus iutus guna er-Berita Si Mehuli man sekelewetna. Ertina berkarya dan berguna untuk orang lain banci ikataken e me dahin Dibata. I bas si e pindolah gegeh i bas Dibata nari gelah Kesah Si Badia erdahin i bas kita berkarya dan berguna untuk orang lain. Kesah Si Badia si mpengasup kita i bas kita berkarya dan berguna untuk orang lain.

Si peteluken, erbage-bage cara banci silakoken kita i bas kita berkarya dan berguna untuk orang lain. Rasul Paulus mereken teladan man banta i bas ia er-Berita Si Mehuli. Nggit kita berbaur ras lingkungenta, nggit kita mpetandaken dirinta selaku kalak Kristen, arah pengerana ras perbahanenta jadi pasu-pasu man sekelewetta, arah kebeluhen ras kiniliten si lit i bas kita jadi pasu-pasu kita man sekelewetta, ras melala denga erbage cara si banci silakoken i bas kita berkarya dan berguna untuk orang lain.