SUPLEMEN PJJ GBKP TGL. 10 - 16 MARET 2024

Pdt. Larena br. Sinuhadji (Nd. ReyRapha Tarigan)

MUAT BAGIN PEMBARKEN BERITA SI MERIAH (3 Johanes 1:5-8)

(Musyawarah Warga Sidi Runggun)

Penaruh

Rikutken Ef. 4:11 lit pemere Kesah (karunia Roh) per-Berita Si Mehuli (pemberita Injil) bagi Paulus ras Timotius (2 Tim. 4:5). Ertina kalak si ngaloken pemere Kesah sebage per-Berita Si Meriah tuhu-tuhu mendedikasikan geluhna guna pembarken Berita Si Meriah. Tapi amin bage gia, kerina kita iutus guna pembarken Berita Si Meriah alu kai pe si banci silakoken kita. I bas PJJ-ta sendah erlajar kita kerna keterlibatenta secara proaktif i bas pembarken Berita Si Meriah rikutken ogenta sendah. Sekaligus i bas kesempaten enda isingetken kita mulihi kerna pelaksanaan Musyarawah Warga Sidi Runggun i bas tahun 2024 enda.

Mpebagesi Ogen

Surat Yohanes si pe-3-ken enda itulis sekalak Pertua si la tersinget gelarna (3 Yoh. 1:1), melala si ngatakenca surat enda itulisken sekalak rasul si tergelar Yohanes. Rikutken tafsiren LAI nari, Pertua entah pe Penatua i jenda e me sekalak pemimpin jemaat si ihamati janah lit kuasa i bas ia guna ngaturken perpulungen-perpulungen kalak si tek. Rikutken 3 Yoh. 1:1, surat enda itujuken man sekalak si tergelar Gayus. I ja Gayus enda tading ras tergabung ku bas perpulungen kai, la lit ituriken. Gelar “Gayus” paksa si e termasuk gelar si umum. Lit piga-piga gelar Gayus si tertulis i bas Pustaka Si Badia, Perb. Rasul 19:29; Perb. Rasul 20:4-5; 1 Kor. 1:14; Roma 16:23. Gayus i bas ogenta sendah e me sekalak teman si ikelengi Pertua si nulisken surat enda, anggota perpulungen si mehuli, si alu tutus nampati dahin-dahin pembarken Berita Si Meriah.

Piga-piga karakter si ipujiken Pertua si nulisken surat enda nandangi Gayus. Si pemena Gayus enda sekalak si bujur (3 Yoh. 1:3-4). Si peduaken, Gayus sekalak si tutus dahiken dahin pelayanen man sesama kalak Kristen amin pe la itandaina (ay. 5). Si peteluken, Gayus dem alu kekelengen man perpulungen (ay. 6). Si peempatken, Gayus nggit nampati ncukupken kerina kebutuhen per-Berita Si Meriah (misionaris-misionaris) si singgah kentisik entah pe si reh ku perpulungenna guna er-Berita Si Meriah. Nina Yohanes kai si ilakoken Gayus enda termasuk ikut muat bagin i bas pembarken Berita Si Meriah (ay. 6-8). Konteks paksa si e, enterem per-Berita Si Meriah (misionaris-misionaris) si berkeliling ku ingan-ingan tertentu guna er-Berita Si Meriah. Gayus termasuk perpulungen si mediate nandangi per-Berita Si Meriah si berkeliling enda.

Kai si ilakoken Gayus enda bertolak belakang ras si ilakoken Diotrepes. Amin pe labo termasuk ku bas bahan ogenta sendah, mehuli ka akap kami adi sitik membahas kerna Diotrepes enda sebage perbandingan. I bas ay. 9 ituriken maka Diotrepes enda sekalak perpulungen si la nggit ngikutken kai si ikataken Pertua, sangat berambisi jadi pemimpin i tengah-tengah perpulungen, janah jahat perbahanenna. I bas ay. 10 ituriken perbahanen jahat si enggo ilakokenna, “Kai si enggo ibahanna e me penghinaan ras cakap si la tuhu si ikatakenna kerna kami. Labo terjeng je saja; lebih asa si e la ia nggit ngalokenca senina-seninanta kalak Kristen e adi ia reh, janah iambatina pe kalak gelah ula ngaloken senina-seninana e, dingen iusahakenna pedaratsa i bas perpulungen nari!” I bas si e Pertua si nulisken surat enda ngajuk man Gayus gelah ula siusih kai si jahat si enggo ilakoken Diotrepes.

Versi Audio silahkan klik : https://youtu.be/AKG-hsfPl1s

Pengkenaina

Tema si seh man banta i bas kesempaten enda ngajuk kita gelah ikut muat bagin i bas pembarken Berita Si Meriah bagi si enggo ilakoken Gayus. Melala si banci silakoken i bas rangka mendukung dahin-dahin pembarken Berita Si Meriah. Ogenta sendah ncidahkenca teladan si enggo ilakoken Gayus i bas mendukung dahin-dahin pembarken Berita Si Meriah. Arah pertotonta, arah erta kebayaken si lit i bas kita, arah kai pe si banci isehken kita sebage bentuk nyata ikut muat bagin i bas pembarken Berita Si Meriah.

I bas kinata geluh ber-Gereja seh paksa sendah, lit denga ka pihak-pihak si justru menghambat dahin-dahin pembarken Berita Si Meriah bagi Diotrepes. Reh ku Gereja labo guna diubahkan oleh firman Tuhan, semakin bertumbuh dalam iman dan berbuah sue ras Kata Dibata, tapi guna kepentingen dirina sendiri. Reh ku Gereja labo guna kemulian gelar Dibata tapi guna kemulian gelar dirina sendiri. I bas si e harus kita metenget, sebab Iblis la senang adi Berita Si Meriah e ipembarken ku tengah-tengah doni enda. Sura-sura Iblis e me gelah Gereja hancur lebur alu erbage-bage cara. Ula sempat kita nggit ipake Iblis guna encedaken Gereja Tuhanta Yesus Kristus. Ertina enda banci jadi sada evaluasi man banta, apakah lit i bas dirinta sura-sura guna ngambati hal-hal si positif ras mehuli guna kemajun Gerejanta erpalasken kepentingan diri sendiri, atau sebaliknya?

I bas PJJ-ta sendah pe isingetken kita mulihi kerna Musyawarah Warga Sidi Runggun. Secara khusus i bas bulan Maret setiap tahun maka i je silakoken Musyawarah Warga Sidi Runggun. I bas Tata Laksana Bab XXXIX Ps. 164 Ay. 1-5 enggo iaturken kerna Musyawarah Warga Sidi Runggun:

1. Musyawarah Warga Sidi Runggun adalah sarana bagi warga dan Majelis Runggun untuk saling memberi masukan mengenai perkembangan kehidupan bergereja di Runggun dalam bersekutu, bersaksi, dan melayani.
2. Musyawarah Warga Sidi Runggun bukan merupakan sarana pengambilan keputusan.
3. Musyawarah Warga Sidi Runggun dilaksanakan satu (1) kali dalam setiap tahun selambatlam-batnya pada bulan Maret dan dipimpin oleh Majelis Runggun.
4. Musyawarah Warga Sidi Runggun dilaksanakan untuk mendengar laporan perkembangan jemaat dari Badan Pekerja Majelis Runggun beserta seksi-seksinya, pengurus unit-unit pelayanan, dan pengurus PJJ serta pengajuan usul-usul tentang kehidupan bersekutu, bersaksi, dan melayani serta pembinaan guna pertumbuhan jemaat.
5. Usul/masukan tentang kehidupan bersekutu, bersaksi, melayani, dan pembinaan harus ditam-pung dan ditanggapi oleh Majelis Runggun dalam bentuk keputusan pada Sidang Majelis Runggun yang terdekat.

Emaka marilah kita ngusih Gayus i bas pelaksanaan Musyawarah Warga Sidi Runggun i bas tahun enda i Runggunta masing-masing. Kai-kai saja si banci silakoken kita i bas rangka mendukung kelancaren musyawarah enda lakokenlah alu bujur guna kemulian gelar Dibata. Rikutken Buku PJJ-ta, iajuk kita kerina ngawan perpulungen gelah mereken usulen-usulen program entah kegiatan bidang Marturi guna pembarken Berita Si Meriah i bas Musyawarah Warga Sidi Runggun. Melala akap kami contoh-contohna, umpamana, bekerjasama ras RRI - TVRI setempat gelah banci iberekenna kesempaten nehken puji-pujin, renungan, rsd.-na. Erbahan konten-konten positif membangun erpalasken Kata Dibata i bas kanal-kanal YouTube runggun, TikTok runggun, Instagram runggun, rsd.-na. Erbahan aksi-aksi sosial i bas bidang kesehaten bage pe pendidiken man masyarakat sekelewet gereja. Membangun jejaring ras gereja-gereja si deban i bas er-PI. Melala denga contoh-contoh si deban si banci iusulken. Dibata si mpegegehi kita i bas ngelakokenca.