SUPLEMEN PA MORIA GBKP TGL. 10 - 16 MARET 2024

Pdt. Larena br. Sinuhadji (Nd. ReyRapha Tarigan)

Lenga Jumpa Tuah

Si Man Ogen : 1 Samuel 1:9-18

Tema : PAGUH I BAS PENGARAPEN

Tujun : Gelah Moria :

1) Nuriken kinipaguhen Hana i bas ia erpengarapen man Dibata

2) Nuratken tanda-tanda nande si paguh erpengarapen man Dibata

Metode : Study Kasus

Penaruh

Anak e me anugerah Dibata man banta. Apai ka man banta pernanden, lit anak i tengah jabu e me sada keriahen si mbelin, erkiteken enggo kuh kita igelari nande. “O nande si anu,” nina kalak man banta, la nari ilebuh “nande sope.” Akap kami ketedehen ate tiap jabu e me ndatken tuah anak. Lenga iakap kuh jabu e adi lenga lit sinusur. Emaka melala ilakoken usaha guna banci lit min tuah ku tengah-tengah jabu, subuk arah pengobaten kuta, medis, bayi tabung, bahkan lit deba adopsi. Payo entah kurang payo carana, lit deba la nari iukurina, si penting datken anak. Banci jadi jabu e ersada denga nge arihna, tapi keluarga kedua belah pihak nge si kuskas ras sibuksa ngukurisa. Piah dungna lit jabu si sirang entah erkidua adi lalap lenga jumpa tuah.

I bas PA-ta sendah, radu ras kita erlajar arah Hana nari kerna tetap paguh erpengarapen i bas nimai kerehen anak ku tengah jabu. Janah adi la pe ibereken Dibata tuah, tetap denga kita erpengarapen man Dibata gelah jabuta jadi pasu-pasu amin pe la lit anak. 

Mpebagesi Si Man Ogen 

Bahan ogen nuriken kerna latar belakang ketubuhen Samuel entah pe nuriken kerna latar belakang keluarga Samuel (ertina : “Man TUHAN kupindo ia”. Alkitab Bahasa Indonesia Sehari-hari - BIS : “nama Allah”, di sini dihubungkan dengan kata kerja Ibrani “meminta”. “Aku telah memintanya dari TUHAN”). Samuel e me anak Elkana i bas ndeharana si pemena nari Hana, sebab lit ndeharana si peduaken e me Penina. I bas kebiasaan kalak Yahudi paksa si e, melala perbulangen si ndeharana dua entah pe lebih. Kebiasaan enda mbuen erkiteken alasen la lit anak entah pe keturunen. Adi la idatken pupus arah sekalak ndehara, sekalak perbulangen erjabu ka si peduakaliken guna ndatken pupus penerus gelar keluarga. Kebiasaan enda tentuna enggo la nai iikutken i bas kiniteken Kristen i bas paksa sigenduari.

Keluarga Elkana e me keluarga si tutus erbakti man Tuhan. Ituriken kerna kebiasaan keluarga enda berkat Rama nari ku Silo guna ersembah ras nehken persembahen i bas tep-tep tahunna. Amin pe dua ndeharana, ituriken maka Elkana enda keleng kel atena Hana. I bas Alkitab BIMK, ay. 5 itulisken, “Tetapi Hana diberinya bagian yang khusus sebab Elkana sangat mencintainya walaupun TUHAN tidak memberi anak kepadanya.” Siidah perjuangen Hana i bas kitab 1 Samuel enda. Getem kel pusuhna sabab lenga ibereken tuah man bana, sedangken kiduana Penina enggo lit anakna. Rusur isaling-saling kiduana ia. Hana nggejapken maka la ia erguna perban lenga ibereken Tuhan tuah man bana. Elkana enggo berusaha mpetetap ukur Hana si sangana erceda ate. La ituriken i bas kitab 1 Samuel, apakah lit teguren entah lang i bas Elkana nari man Penina, erkiteken rusur Penina nakiti ukur Hana ras naling-naling ia, sabap lalap la lit ibere Tuhan pupusna (ay. 6).

Tapi Hana selaku kalak si tek, tetap ku Tuhan saja pengarapenna. I bas ingan ersembah entah pe Rumah Pertoton i Silo, tangis ras ertoto Hana, mindo man Tuhan gelah iberekenNa anak. Erkiteken tutussa ia ertoto perban ceda kel atena, Eli si paksa si e jadi imam i bas Rumah Pertoton i Silo erpengakap sangana mabuk Hana enda. Tapi kenca ituriken Hana perbebenna, Eli pe mereken pasu-pasuna man Hana. Janah Tuhan pe ndengkehken pemindon Hana seh kedungenna Hana melahirken si tergelar Samuel si iendesken man Tuhan sue ras padanna.

Versi Audio silahkan klik : https://youtu.be/nXk2wMNOkkI

Pengkenaina

Melala pasangen si enggo erjabu tapi lenga ipelemiken Dibata anak ku tengah jabuna. I bas sada sisi keadaan enda labo jadi beban, sebab jaman gundari enda enterem pasangen si membangun rumah tangga labo kel erpengayak datken anak, tapi karir si utamana. Perbulangen ras ndehara radu ras sibuk berkarir i bas bidangna masing-masing. Tapi enterem denga ka si jadi beban, sebab memang kerehen anak i tengah jabu tuhu-tuhu iarapkenna. I bas si e tentu perlu penguatan secara rohani gelah megegeh i bas ndalani kerina proses nimai kerehen anak i tengah jabu. Sebab si mberat memang proses i bas nimai kerehen anak i tengah jabu.

Arah ogenta sendah teridah maka ndalani sada proses e labo murah. Hana getem kel pusuhna erkiteken rusur irendahken kiduana Penina, merasa diri terhina ras la erguna erkiteken lenga lit pupus. Enda akap kami sada situasi si mberat kel ialami Hana. Tapi i bas ndalani keadaan si bagenda rupana, Hana tetap sabar erpengarapen man Dibata, sekali-sekali emosional, alu tangis ia ertoto. Enda hal si wajar, asal ula emosionalsa, sitik-sitik tangis, stress, melala dahin si terbengkalai, mbue waktu terbuang hanya untuk menyesali keadaan. Enda teladan si pemena man banta si sangana nimai kerehen tuah i bas jabuna, tetap sabar ras erpengarapen man Dibata saja. Janah hal berikutna simehuli eme, Elkana pe mereken pergegeh man Hana. Ertina i bas ndalani keadaan si mberat, supporting system si mejile sangat menentukan sesekalak ndalani masa-masa sulit i bas kegeluhenna. Walau pe, kinatana Elkana erjabu denga ka. Si mehulina, subuk perbulangen, keluarga arah pihak dilaki ras diberu, bahkan Gereja bagi si ilakoken Eli, tetap mereken dukungen si mehuli. Genduari i bas Liturgi Kasuistik lit enggo isikapken "Orat Kebaktin Mindo Tuah.”

Hana mereken teladan man banta i bas ketutusen (ketekunan) ertoto. Bagi nina syair lagu-lagu rohani, “Doa orang benar bila didoakan dengan yakin besar kuasanya.” “Bagi Tuhan tak ada yang mustahil, bagi Tuhan tak ada yang tak mungkin.” Emaka hal peduaken si banci iteladani arah Hana nari e me ketutusenna i bas ertoto, mindo man Dibata. Ertoto secara komunal pe penting ilakoken i bas Tim-tim Doa, gelah pasangen si sangana nimai pe datken gegeh. Tapi di samping ertoto, perlu kang nge pertimbangan secara medis. Emaka pemeriksaan medis akap kami harus ka ilakoken gelah siteh kai si jadi masalah i bas alat-alat reproduksina, janah i bas si e banci mis itambari. Sebage masuken man Gereja si ngelakoken “Konseling Pra-Nikah” perlu kang nge isungkun kerna pemeriksaan medis enda, gelah calon-calon pengantin dipersiapkan menerima resiko kemungkinan sulit mendapatkan anak, bahkan resiko tidak mendapatkan anak. Ula ka sempat selingkuh, bahkan cerai, sebab kalak si erkiniteken man Dibata, tek maka rencana Tuhan adalah rancangan penuh damai sejahtera, labo rancangan kecelakaan (bdk. Yer. 29:11).

Si peteluken, man banta si kedungenna la datken tuah arah proses si alami, ula sempat berputus asa, sebab lit alternatif si deban, e me adopsi. Adopsi pe la gampang, lit proses si harus idalani guna datken anak adopsi. Janah i bas si e pe arus kita tek, walau pe alu cara adopsi, arus siimani kerina anugerah, perkuah ate bas Tuhan nari, pemere i bas Dibata nari.