SUPLEMEN PA MORIA GBKP TGL. 17 - 23 MARET 2024

Pdt. Larena br. Sinuhadji (Nd. ReyRapha Tarigan)

Single Parent

Si Man Ogen : Rut 1:1-6

Tema : I BAS TUHAN AKU MEGEGEH

Tujun : Gelah Moria :

- Nuriken perjuangen Naomi i bas ndalani kegeluhenna

- Ngangkai kegeluhen Single Parent

Metode : Sharing & Aksi

Penaruh

Rikutken Wikipedia, single parent entah pe orang tua tunggal, adalah orang yang tidak memiliki suami, istri, atau pasangan, dan hidup dengan satu atau beberapa anak. Terdapat berbagai alasan mengapa seseorang menjadi orang tua tunggal, seperti cerai, ditinggal pasangan, kematian pasangan, atau adopsi oleh satu orang tua. Janah single parent enda rusur diasosiasikan dengan wanita-wanita tangguh yang mengasuh, membesarkan, dan mencukupi kebutuhan anak-anaknya seorang diri saja.

I bas kesempaten enda radu ras kita erlajar arah Naomi nari kerna menjadi seorang single parent entah pe orang tua tunggal. Kenca enggo kita erlajar arah Naomi nari iarapken radu ras kita banci nggejapken perjuangen sekalak pernanden single parent, i bas si e banci ka kita mereken motivasi, pergegeh, entah pe pertotonta man teman-temanta si single parent. I bas sisi si deban, tentu man banta si enggo jadi single parent erkiteken erbage-bage hal, banci ipegegehi arah PA-ta sendah. 

Mpebagesi Si Man Ogen

Ogen i bas PA-nta sendah nuriken kerna keluarga Elimelek si melala menghadapi perbeben i bas geluhna :

1. Terjadi kelihen si mesangat i Betlehem, itadingkenna Betlehem ngongsi keluarga enda ku Moab si jarakna kurang lebih 80 Km i Betlehem nari.
2. La ndekahsa mate Elimelek. Tulang punggung jabu. Tading me Naomi ras dua anakna. Banci sibayangken Naomi si enggo mbalu, berjuang ngepkep keluargana i negeri kalak. Seh erjabu dua anakna ras si nguda-nguda kalak Moab. Orpa ras Rut. Kenca 10 tahun tading i ja, mate ka dua anakna ndai. Banci sibayangken keadaan Naomi. Merasa sebatang kara, aminna lit dua permainna. “Aku me si liahna, entah madin mate saja aku Tuhan, la lit nari gunana aku nggeluh.” Adi la ndai ia erkiniteken. Sura-surana ku Moab, gelah sikap jabuna, malah sebalikna.
3. Sieteh, akhirna lit sekalak permainna si luar biasa kelengna man bana, e me kap Rut. Aminna pe meseksek Naomi mindo gelah mulih saja permainna enda duana ku orang tuana. Orpa mulih ku jabu orang tuana, sedangken Rut tetap ras bibina. “Ola suruhndu aku nadingken kam, bangsandu jadi bangsaku, Dibatandu jadi Dibatangku, esumpah aku maka Tuhan si ngukum aku alu kiniseran si mberatna kel adi kusirangken kam.” Banci si Rut muat keputusen si bagenda beratna erkiteken kiniteken, keleng ate Naomi si enggo icidahkenna sedekah enda.
4. Tapi akhirna happy ending. Mulih ku Betlehem duana kalak enda. Rut erdahin i juma Boas sembuyak Elimelek si bujur ras bayak, guna banci ncukupki keperlun dirina ras bibina. Berjuang, la ia putus asa, optimis, bekerja keras. Akhirna ibere Dibata dalan pulah, erjabu Rut ras Boas. Arah kesusurenna reh me pagi Juruselamat e me kap Yesus Kristus.

Si jadi fokus i bas PA-nta sendah e me Naomi, sekalak pernanden single parent si luar biasa. Kai kira-kira rahasia Naomi i bas ia jadi sekalak pernanden si luar biasa?

1. Erpengendes man Tuhan. Yakin Naomi maka beliden kuasa Tuhan nampati asa perbeben si lit. Bergantung sepenuhnya kepada Allah (bdk. Pilipi 4:13). Doa i bas Richard Niebuhr nari akap kami banci nggambarken kiniteken si paguh i bas Naomi, “Tuhan berilah aku kedamaian batin untuk bisa menerima hal-hal yang tidak dapat ku ubah lagi, beri aku keberanian dan kekuatan untuk mengubah hal-hal yang masih bisa ku ubah dan kebijaksanaan untuk dapat membedakan keduanya.” I bas kita ernalem man Tuhan, lit porsi Tuhan, lit ka tanggung jawab si arus sidalanken kita. Tugas Naomi enggo idalankenna, erpengendes man Tuhan.
2. Nggeluh ersada arih. Jabu kalak Kristen e me kap jabu si kompak, ersada arihna, sikeleng-kelengen, saling menopang, saling mendukung, saling mperdiateken sada ras si debanna. Mberat pe perbeben e, menahang jadina adi banci ersada ukur. Tapi sebalikna, sitik si man ukurenken, banci jadi mbelin erkiteken la ersada arih. I bas ogenta teridah kiniersadan arih si paguh antara Naomi ras Rut.
3. Berpikir positif. Si ebahanca la ngasup kita ngalaken perbeben e erkiteken negatif caranta rukur. Amin pe bagi si putus asa Naomi i bas ia ngalaken perbeben si nialamina, tapi pertotonna man Dibata erbahanca ia ipengasup Dibata guna berpikir secara positif.

Versi Audio silahkan klik : https://youtu.be/F_CsbzN_lPs

Pengkenaina

PA-ta sendah ngajuk kita kerina Senina Moria gelah berempati nandangi senina-seninanta si mbalu, single parent, entah pe orang tua tunggal. Sebab melala contoh i bas Pustaka Si Badia uga Dibata engkelengi diberu-diberu si enggo mbalu. Salah sadana turi-turin kerna Naomi enda. I bas Pustaka Si Badia si rusur iajuk gelah iperdiateken e me anak melumang ras diberu mbalu-mbalu. Secara konkrit perentah Dibata guna mediate nandangi diberu-diberu si enggo mbalu enda banci radu ras sicakapken i bas PA-ta sendah janah silaksanaken sebage bentuk nyata aksi Moria nandangi senina-seninana si single parent. Dibata si mereken gegeh secara khususna man single parent entah pe orang tua tunggal.