SUPLEMEN PJJ GBKP TGL. 24 - 30 MARET 2024

Pdt. Larena Sinuhadji (Nd. ReyRapha Tarigan)

SADA ARON NDAHIKEN DAHIN DIBATA

(1 Korinti 3:5-9a - Visi GBKP)

Penaruh

Rikutken Kamus Karo Indonesia (Darwin Prinst), kata “aron” ertina, si pemena, e me ikatan kerja sama untuk mengerjakan ladang pertanian secara bergilir. Lit aron jangak, aron diberu, ras aron campuren. Si peduaken, kelompok muda-mudi dalam suatu kampung. Janah kata “eraron” ertina, ikut dalam ikatan kerja sama untuk mengerjakan ladang pertanian. Adi erpalasken erti kata “aron” enda akap kami la lit kaitenna ras kiniteken Kristen. Tapi erkiteken lit proses kontekstualisasi antara kiniteken Kristen ras budaya Karo, e maka konsep “aron Dibata” enggo semal i bas GBKP.

I bas PJJ-ta sendah radu ras mulihi kita erlajar kerna sada aron i bas ndahiken dahin Dibata ikaitken ras Visi GBKP. 

Mpebagesi Ogen

Ogenta nuriken kerna kerja sama saling mendukung i bas pelayanen antara Paulus ras Apolos rikutken pemere (karunia) si ibereken Dibata. Apolos (Apolonius) e me sekalak Yahudi i Aleksandria nari, ia sekalak guru si beluh ras mehuli ngajarken kerna Yesus Kristus i teruh bimbingen Priskila ras Akwila (Perb. Rasul 18:24-28). Pelayanenna i Korinti cukup berhasil erkiteken kebeluhenna ngajar ras erkhotbah. Tapi erkiteken lenga dewasa i bas erkiniteken (ay. 1-4), maka lit piga-piga perpulungen si erpengakap Apolos lebihen asangken Paulus, maka turah pengelompoken-pengelompoken, lit ibahan perpulungen e kelompok Paulus, kelompok Apolos, kelompok Kefas, ras golongen Kristus (1 Kor. 1:12). Padahal situhuna Paulus ras Apolos, termasuk Kefas (Simon Petrus), saling bekerja sama alu mehuli i bas dahih-dahin pelayanen (1 Kor. 3:4-6) i tengah-tengah perpulungen Korinti.

Alu litna pengelompoken enda ndai tentu mengganggu efektifitas pelayanen erkiteken dekahen sician-cianen ras rubati sada ras si debanna asangken semakin meningkatken kualitas ras kuantitas pelayanen. Paulus tegas ngatakenca, ise kin Paulus, ise kin Apolos? Maka duana kalak enda pelayan Dibata kap, si negu-negu perpulungen gelah nggeluh erkiniteken. Tuhan nge si mereken kengasupen lako banci melayani. Duana kalak enda saling melengkapi i bas pelayanenna. Paulus nuansa, Apolos niramsa ras Dibata si erbahanca turah. Si nuansa ras si niramsa labo penting, tapi Dibata nge si pentingna kel i je, sabab Dibata nge si peturahsa. Si niramsa ras si nuansa sada aron kap, kawan sekerja Allah. Ertina, sama-sama ibereken Dibata kepercayaan guna erdahin ras mpekena-kena juma Dibata.

Paulus ngingetkenca maka Dibata i bas Yesus Kristus arus jadi palas i bas pelayanen, sebab Dibata ngenca si erbahanca turah kerina si mehuli guna pembangunen kula ni Kristus. Janah Dibata si arus termulia arah kerina pelayanen si idahiken i bas perpulungen Korinti, labo Paulus entah pe Apolos. Ate Rasul Paulus tentuna gelah reh dewasana geluh erkiniteken perpulungen Korinti ras banci iusih perpulungen e kerja sama si mehuli antara Paulus, Apolos, ras si debanna i bas pelayanen i teruh kiniersadan i bas Yesus Kristus.

Versi Audio silahkan klik : https://youtu.be/M4v0mcDQGKA

Aplikasi

Rikutken tema “Sada aron ndahiken dahin Dibata,” si jadi stressing point i bas PJJ-ta sendah akap kami ay. 9a, “Sabab kami sada aron kap ndahiken dahin Dibata, janah kam me jumaNa.” I bas terj. TB-LAI edisi II, “Sebab, kami adalah kawan sekerja untuk Allah. Kamu adalah ladang Allah, bangunan Allah.”

Si banci jadi renungen man banta akap kami si pemena lebe, adi sada aron ningen, berarti lit i je kerja sama ras sama-sama kerja. Tidak ada yang merasa lebih hebat, lebih pintar, lebih berkuasa, sebab kerina kita suruh-suruhen Dibata janah si idahiken kita e me dahin Dibata. I bas paksa si nai lit terjadi, kerja sama ningen, tapi sekalak ngenca si latihna kel, sementara si debanna santai-santai saja, la lit pengorbanenna. Tapi kenca dung dahin e, lit kari ngaloken penghargaan, tampil ku lebe nehken kata-kata sambuten, si santai-santai ndai ia atena si tampil. Adi si bage-bage lit denga i bas kita maka banci ikataken lenga dewasa kinitekenta. Ula siusih perpulungen Korinti si medanak denga kinitekenna. I bas si e arus sirobah orientasi pelayanenta, Dibata arus jadi palas, Dibata arus jadi si utamana, janah Dibata si kedungenna arus imuliaken arah kerina dahin pelayanen si idahiken kita. 

Si peduaken akap kami e me kap kualitas relasinta ras Dibata menentuken kualitas pelayanenta. Relasi si mehuli ras Dibata erbahanca lit i bas dirinta kiniteruken ukur, nggit kita menghargai kalak si deban, nggit kita bekerja sama ras kalak si deban, amin pe mungkin secara doni ganjangen status sosialta bage pe tingkat pendidikenta asangken temanta ndai. Relasi si mehuli ras Dibata enda akap kami lit i bas diri Paulus bage pe Apolos. Emaka lit pe persoalen i tengah-tengah perpulungen Korinti, kalak enda duana la terpancing, tapi tetap fokus ndahiken dahin Dibata alu mehuli. Usihlah Paulus ras Apolos i bas kerembakenna ras Dibata.

Si peteluken, PJJ-ta sendah ikaitken ras Visi GBKP tahun pelayanen 2021-2025 e me, “GBKP menjadi kawan sekerja Allah untuk menyatakan rahmat Allah kepada dunia” (1 Kor. 3:9; 1 Pet. 2:9-10). Visi enda ikonkritken ku bas 4 Misi GBKP :

• Menumbuhkembangkan spiritualitas jemaat berbasis Alkitab.
• Menegakkan keadilan, perdamaian dan keutuhan ciptaan.
• Memperkuat semangat gotong royong antar sesama jemaat dan masyarakat.
• Menggali dan menumbuhkembangkan potensi jemaat untuk bersekutu dan bersinergi

Visi ras misi enda itopang alu 5 tata nilai kristiani si ianggap paling relevan pada masa kini untuk menjadi fokus bagi seluruh warga GBKP agar dihayati, digumuli, disosialisasikan, dan dipraktekkan terus-menerus sehingga menjadi perilaku dan kebiasaan, yaitu: kasih, kejujuran, keugaharian, kekerabatan, dan kesetiaan.

Kerina visi, misi, bage pe tata nilai kristiani ndai tujunna gelah kerina ngawan perpulungen GBKP reh dewasana i bas erkiniteken man Dibata i bas Yesus Kristus. Adi rikutken tema PJJ-ta sendah indikatorna umpamana, enggo lanai lit istilah “single fighter,” enggo lanai lit sidalih-dalihen i bas ndahiken dahin pelayanen. Enggo lanai lit si man endik-endiken i bas ndahiken dahin pelayanen. Enggo turah kesadaren i bas jemaat guna nggit bekerja sama, saling mendukung, saling menopang. Enggo lanai lit ego-ego pribadi, kerina dahin pelayanen idahiken alu palas guna kemulian gelar Dibata. I bas si e kerina, mari radu ras sibaba i bas totonta gelah reh dewasana GBKP si bulan si reh enggo berusia 134 tahun. Dibata si mpengasup kita ndahiken dahinNa guna kemulian gelarNa.