SUPLEMEN PA MAMRE GBKP TGL. 10 - 16 MARET 2024

Pdt. Larena br. Sinuhadji (Nd. ReyRapha Tarigan)

Teks : Rut 4:1-12

Tema : RUNGGU MUAT SI MEHULI

Tujun : Gelah Mamre :

1) Meteh maka budaya runggu (musyawarah) enggo lit bas jaman bangsa Israel bas Padan Si Ndekah

2) Ngasup ngergaken dingen njagai budaya runggu baik bas gereja, adat ntah masyarakat

Penaruh

Budaya “runggu,” entah pe arih-arih muat si mehuli, e me salah sada budaya si penting i bas kalak Karo. Budaya “runggu” enda i bas perkembangenna, iadopsi gerejanta guna er-Berita Si Meriah man masyarakat Karo. E maka gundari adi sibegi kata “runggun” konotasinta enggo mengacu ku gereja - GBKP (konotasi ertina: kata yang memiliki makna lain di baliknya). Padahal rikutken asal katana, kata “runggun” enda bersifat umum i bas lingkup budaya Karo. PA-ta sekali enda, erlajar kita mulihi kerna budaya runggu erpalasken ogenta sendah.

Mpebagesi Teks

Perikop si jadi ogenta sendah ngerana kerna akhir kisah i bas turi-turin Rut, si banci ikataken “dukacita berakhir dengan sukacita.” Kai si itabur e ka kedungenna si ituai. Rut menabur kekelengen, kiniulin, nggit ia erkorban guna semetuana, Naomi. Itadingkenna, kutana, bangsana, orang tuana, termasuk agamana, guna tetap mpekena-kena kegeluhen Naomi. Banci siidah kedungenna, Rut ngaloken kemalemen ate i bas kegeluhenna, ipasu-pasu Tuhan tetap geluhna.

Ipepulung Boas 10 kalak Pertua Kuta raduken ras si biak senina Elimelek ndube, deher kerabangen i kuta. Hubungen kekerabaten kalak Jahudi hampir mirip ras kita kalak Karo. ‘Di kenca mate perbulangenna, maka si biak senina perbulangenna ndube ertanggung jawab nandangi keluarga si enggo itadingkenna (semal igelari "lako man" entah pe "turun ranjang"), termasuk kerna erta gono-gini si lit denga (hukum Levirat, levir ertina: biak senina perbulangen, Ul. 25:5,6; Mat. 22:24-26). I bas ay. 1 hal menarik i jenda eme ingan pulung i kerabangen kuta (terj. BIMK: tempat pertemuan dekat pintu gerang kota). Hal enda nuduhken i bas ingan runggu e lah rungguken si man runggunken (ula i kedai kopi entah jumpa tiga adi ngerunggui kerja entah pe dahin gereja). Adi si ndekah irungguken i jambur (runggu galang) entah pe bale (ingan runggu kitik). Janah i bas kalak Karo, ikimbangken amak runggu ras amak kehamaten man kalimbubu (Tua-tua Israel). Boas tuhu-tuhu kalak si mehamat ras la mekarus. Sabab pepulungna sangkep geluhna si nuduhken kehamaten ras la mekarus i bas ngerunggui. Engkai maka i jenda Boas si nenahken kerina si pulung dingen ia ka si mabai percakapen?

Situhuna enda lit kaitenna ras perikop sebelumna (bindu 3), i ja tupung medem Boas, ideheri Rut alu manjar-anjar Boas, je nari medem ia arah nahena. Tengah berngi medak Boas ras sengget, maka isungkunna ise Rut. Ituriken Rut ise ia ras kai sura-surana. Maka ikatakenna, “Kam kap kade-kade kami si banci jadi penebus kami, e maka mekuah min atendu, ibuatndulah min aku jadi ndeharandu.” Kedungenna enggo jelas man Boas, termasuk pe kerna kesetian Rut man bibina, sebab kerehen Naomi ras permenna mulihken ku kutana enggo jadi percakapen bas kuta e, sabab nina, “Kerina anak kuta enda metehsa maka kam sekalak diberu si mehuli (bindu 3:11). Nina Boas ngaloi, “Tuhu nge aku kade-kadendu si banci jadi penebusndu, tapi lit denga si terdeheren asang aku.” E me dalan-dalanna maka ibahan acara runggu ras lebe isungkun Boas kerna tanggung jawab senina Elimelek ndube si berhak nukur juma sikerajangen seninana. La sahun itukur senina Elimelek juma ndai erkiteken tukurna pe kari labo e jadi tading-tadingen man anakna. Sekali nari, teridah i je Boas la mekarus ras la ngelebei sura-surana, tapi ngendesken lebe keputusen e man senina Elimelek ras arih-arih muat si mehuli i bas muat sada keputusen.

Kedungenna i bas runggu e, enggo putus maka Boas nge si nukursa. Itangtangi senina Elimelek ndai sepatuna, jenari iberekenna man Boas tanda maka barang ndai enggo sah idayaken entah itukarken. E maka nina Boas, “Kam kap kerina sendah jadi saksina maka enggo kutukur i bas Naomi nari kerina sikerajangen Elimelek, Kilyon ras Mahlon. Tambah si e Rut, beru Moab, ndehara si Mahlon ndube, jadi ndeharangku. Alu bagenda maka erta kalak si enggo mate ndube, bage pe gelarna ola masap i tengah-tengah bangsa ras kutana nari. Kam me kerina saksina sendah.” Kenca si e kerina pertua-pertua nehken pasu-pasu man Elimelek maka keluarga Boas tetap ipasu-pasu Tuhan, secara khusus kesusurenna arah Rut jadi kalak si terberita. Kai si ikataken pertua-pertua e ijujuri Tuhan, maka anak Rut arah Boas e me kap Obed jadi nini raja Daud si termasyur. Hal enda ncidahken perjabun Boas ras Rut enggo sah ras isaksiken sangkep geluh pekepar ras ijalapi Anak Beru jumpa 11 i bas kalak Karo. Dingen seri ras toto kalimbubu dibata ni idah, sangap encari, ertuah bayak jumpa bulan ras matawari.

Versi Audio silahkan klik : https://youtu.be/NyNcUigloGM

Pengkenaina

Budaya runggu enggo semal i bas kita kalak Karo. Sope kita ngelakoken kai-kai, subuk acara meriah ukur entah erceda ate,  biasana i-runggu-ken lebe gelah kerina acara banci erdalan alu mehuli. I bas runggu e, la banci lang arus pulung kuh sangkep, subuk arah biak sukut (si mada kerja), kalimbubu ras anak beru. Termasuk i bas kegeluhen jabunta, tentu melala hal si man rungguken, ‘di kenca lit persoalen si ilakoken anakta, sura-suranna kuliah, lit pergumulen keluarga, rsd. Ogenta sendah ncidahkenca maka budaya runggu enda pe lit i bas budaya Yahudi janah masuk ku bas Pustaka Si Badia. Ertina secara teologis, budaya runggu enda sangat alkitabiah. Enda menjawab tujun si pemena i bas PA-ta sendah.

Bagi si enggo isingetken i bas bagin penaruh i datas, gerejanta enggo makeken budaya runggu sebage bagin i bas nehken pelayanen erkiteken lit nilai-nilai si mehuli si sue ras kiniteken Kristen. Umpamana, Sidang Runggun, Musyawarah Warga Sidi Runggun, rapat-rapat gereja, rsd. Tujuna enggo jelas dalam rangka mpersiapken, ncakepken, mengevaluasi kerina dahin-dahin pelayanen gelah banci reh ulina idalanken. Aminna pe lit persoalen banci idungi i bas runggu, maka la berlarut-larut tapi banci idarami solusi si mehuli.

Bagi runggu si enggo ilakoken Boas, maka la lit persoalen si la selesai alu mehuli, adi kin si pulung e reh alu materuk ukur, radu mereken masuken guna kiniulin, la memaksaken kehendak,  maka perdalinen runggu pe la ndekah ras hasilna mehuli. Sabab lit ka siidah, runggu si ndekah perdalanenna, seh enggo ka turah perjengilen, la ka lit si mengalah, radu ngerana atena kerina, bahkan lenga pe dung runggu lit ka deba enggo ndarat (walk out). Bahkan si bage terjadi ka bas runggu Gereja, si kin enggo seharusna perdalanenna mejile, sikap, sabab si pulung kerina Serayan Tuhan ras perpulungen si enggo idemi Kesah Si Badia. Tapi banci la dung alu mehuli, erkiteken masing-masing pihak la lit si mengalah. Seharusna, i ja pe silakoken runggu, termasuk runggu bas dahin Gereja, prosesna erdalan alu mehuli, asilna pe mehuli guna peningkaten pelayanen. Sekali pe banci jadi bas proses, agak alot, tapi tetap asilna mehuli, ras si ikut bas runggu e mulih alu dame, dingen tetap terjalin hubungen si meriah ras dame.

Akap kami uraian i datas enggo sue ras tujun si peduaken i bas PA-ta sendah, si akap kami lebih tepat adi ikataken sebage tekadta i bas ngergaken dingen njagai budaya runggu baik bas gereja, adat entah masyarakat. Dibata si mpengasup kam kerina Mamre guna mewujudkenca.