SUPLEMEN PJJ GBKP TGL. 9 - 15 JULI 2023

Pdt. Larena br. Sinuhadji (Nd. ReyRapha Tarigan)

MELUMBAR NAMBAHI KESANGAPEN (Nehemia 5:14-19)

(Diakonia Orat Nggeluh)

Penaruh

Sekalak penulis ras dosen i negara Canada nari Bob Proctor ngatakenca, “Hukum kemakmuran adalah kemurahan hati. Jika kamu menginginkan lebih, berikan lebih banyak.” Banci iertiken, kuantitas ras kualitas sifat (karakter) murah hati sangat menentukan tingkat kemakmuran sesuatu. Umpamana, adi lit sada kuta si bersih, aman, nyaman, sejahtera dem alu kedamen, pasti pemimpin ras rata-rata penduduk si ngiani kuta e kalak si murah hati. Murah hati ertina, suka (mudah) memberi, tidak pelit, penyayang dan pengasih (berbelas kasih), suka menolong, baik hati. Adi sikaitken ras tema PJJ-ta sendah, melumbar mere seri ertina ras murah hati, janah kemakmuran seri ertina ras kesangapen.

Mpebagesi Kata Dibata

Judul perikop si jadi ogenta sendah e me “Kebujuren Nehemia”, i bas Alkitab terj. BIMK nina, “Nehemia murah hati”, janah judul i bas Alkitab TB-LAI, “Sikap Nehamia yang tidak mencari keuntungan.” Judul-judul enda akap kami saling melengkapi kerna karakter Nehemia.

I bas ay. 14-15, ituriken maka enggo 12 tahun Nehemia jadi pemimpin daerah Yehuda si paksa si e jadi daerah jajahan kerajan Babilon. Ertina sope Nehemia enggo lit pemimpin-pemimpin daerah Yehuda tapi la mperdiateken keamanan, kenyamanan, kesejahteraan bage pe kemakmuran daerah Yehuda, bahkan justru jadi baban ras nindih jelma si enterem. Arah pasal-pasal sebelumna i bas Kitab Nehemia enda radu ras siteh maka Nehemia e me sekalak pemimpin si erkemalangen (mbiar) man Dibata janah mediate nandangi keamanan, kenyamanan, kesejahteraan bage pe kemakmuran kutana. Kamus Alkitab Browning mereken gelar man Nehemia e me sekalak patriot, pahlawan Israel.

I bas perikop sebelumna alu judul “Kalak musil itindih” (terj. TB-LAI, “Nehemia memperhatikan keluhan-keluhan sesama orang Yahudi.” Terj. BIMK, “Nehemia menolong orang miskin”), teridah maka Nehemia enda labo terjeng sekalak pemimpin si malang man Dibata ras mediate nandangi rakyat Yehuda, ia pe sekalak pemimpin si murah hati entah pe melumbar mere, ay. 10, “Aku ras teman-temanku bage pe kalak si erdahin ras aku enggo minjamken duit ras gandum man bangsata. Genduari lanai pada sipindo galarna,” alias gratis. Arah ayat 10 enda pe banci siidah maka sebage sekalak pemimpin (bupati entah pe gubernur), Nehemia tuhu-tuhu jadi usihen man tim-na (adi gundari seri ras TGUPP - Tim Gubernur Untuk Percepatan Pembangunan) i bas erkemalangen man Dibata, ermediate ras erpemere.

I bas ay. 16 - 18 isaksiken Nehemia maka kerina gegeh si lit i bas ia iberekenna guna pekena tembok Yerusalem. Labo terjeng je saja, setiap wari isikapkenna pangan ras inemen si mejile kualitasna guna menjamu kerina temue si reh ndahi ia. I bas kerina dahin pemimpin si idahikenna, la ibuat Nehemia si jadi hakna selaku pemimpin daerah paksa si e. Banci sibayangken asa kai buena kinibayaken si lit i bas Nehemia si ipakekenna guna mereken pelayanen si terbaik guna rakyat Yehuda. I bas si e, ay. 19 jadi jawabenna. Ertoto Nehemia nina, “O Dibatangku, erkiteken kasa kai si enggo kubahan man bangsa enda, ingetlah min aku, gelah tambah kesangapenku” (terj. TB-LAI, “Ya Allahku, demi kesejahteraanku, ingatlah segala yang kubuat untuk bangsa ini.” Terj. BIMK, “Aku mohon ya Allah, ingatlah segala yang telah kubuat untuk bangsa ini dan berkatilah aku”). Ertina, la mungkin Nehemia ngasup ngelakoken kerina si mehuli si ilakokenna arah kinibayakenna adi la lit kiniteken i bas ia maka Dibata pasti ncukupken kerina si jadi kebutuhenna.

Pengkenaina

Tema i bas PJJ-ta sendah mulihi ngingetken kita gelah melumbar mere, sebab arah kita melumbar mere tambah kesangapenta. Salah sada ulih  Kesah Si Badia (buah Roh Kudus) e me “kemurahan”, seri ertina ras murah hati bagi si enggo ijelasken i bas bagin penaruh i datas. Murah hati entah pe melumbar mere la banci ipisahken ras kualitas kinitekenta man Dibata. Ogenta sendah mereken teladan man banta, semakin mbages kinitekenta man Dibata maka semakin la kita mbiar guna melumbar, sebab tek kita pasu-pasu Dibata maler man kalak si erkemalangen man baNa.

Lit si ngatakenca nina “Kamu tidak harus kaya untuk menjadi dermawan, sebab kemurahan hati bukanlah soal uang, tapi soal hati.” Ertina kerina kita situhuna ngasup guna melumbar i bas kerina si enggo ipercayaken Dibata man banta, baik i bas kinibayaken, gegeh, talenta, rsd. Pdt. Dr. Andar Ismail mereken penjelasen maka akar kata “melayani” salah sadana e me “diakoneo”. Erti “diakoneo” labo terjeng erkaiten ras sen saja (bdk. 2 Kor. 8:1-20), tapi melayani orang yang lebih rendah kedudukannya disebut “diakoneo”, menggunakan karisma yang ada pada kita untuk kepentingan dan kebaikan orang lain e pe isebut “diakoneo”. Ertina kerina kalak si tek ibereken kengasupen i bas Dibata nari guna melumbar.

Mari radu ras sirenungken. Ngataken bujur kita man Dibata maka i bas bulan enda, tepatna tgl. 23 Juli, enggo 82 tahun GBKP Njayo. Gundari enggo melala kemajun i bas GBKP si malem enda. GBKP enggo jadi pasu-pasu (berkat) labo saja man anggota jemaatna tapi pe man masyarakat sekitarna arah karya diakoniana. Si e kerina labo banci tercapai adi la lit anggota jemaat si nggit ipake Dibata melumbar guna kemajun GBKP. Emaka i bas kesempaten enda, mari radu ras ertekad, nggit kita ipake Dibata melumbar guna kemulian gelarNa, sebab tek kita maka melumbar nambahi kesangapen. Dibata si mpegegehi kita.