SUPLEMEN PA MAMRE GBKP TGL. 30 JULI - 5 AGT. 2023

Pdt. Larena br. Sinuhadji (Nd. ReyRapha Tarigan)

Ogen : 1 Petrus 1:14-15

Tema : NGGELUH BADIA

Tujun : Gelah Mamre :

- Meteh kepatuhen man Dibata maba geluh badia

- Nggeluh badia arah pemaken alat Teknologi Informasi

Penaruh

I bas kegeluhen si tep-tep wari identitas eme hal si penting. Sebage contoh, adi ateta bengket ku bank guna erbahan rekening, tentu si pemenana isungkun eme kartu identitas. Bengket kita ku ingan si mbaru, i bas pos security ipindo kartu identitasta. I bas pergaulen ras kalak si deban pe, identitasta penting gelah banci itandai kalak. Adi la siteh alu payo identitasta tentu jadi persoalen, umpamana kalak si amnesia, enggo lupa ia gelarna, lupa inganna tading, lupa pendahinna, rsd.

Rasul Petrus i bas ogenta sekali enda ngajuk perpulungen kalak si tek paksa si e gelah tuhu-tuhu nandai identitasna selaku kalak si tek man Dibata i bas Yesus Kristus. I bas PA Mamre-ta sendah, erlajar kita mulihi kerna identitasta selaku kalak si tek i bas konteks kemajun Teknologi Informasi. 

Mpebagesi Kata Dibata

Adi sioge bindu 1 benaken ay. 1, secara garis besar Surat Rasul Petrus enda itujuken man perpulungen kalak si tek si merap i belang-belang propinsi Pontus, Galati, Kapadokia, Asia ras Bitinia, kerinana lit i bas negara Turki bagin utara jaman gundari enda. Perpulungen kalak si tek paksa si e sangana ngenanami erbage-bage percuban (ay. 6). Rasul Petrus mereken pergegeh gelah i bas keadaan si bagenda rupana perpulungen tetap ermeriah ukur, sebab erbage-bage percuban e tujunna gelah ermurnina kiniteken janah i bas paksana pagi ialoken perpulungen e, pasu-pasu si la banci ceda, macik, entah pe luntur (ay. 4-5), puji-pujin, kemulian, ras kehamaten i bas Dibata nari (ay. 7). Tapi i bas si e kerina, patut perpulungen e ngataken bujur man Dibata erkiteken enggo ialokenna kegeluhen si mbaru ras pengarapen si nggeluh erdandanken perkuah ate Dibata si mbelin alu mpekeke Yesus Kristus i bas si mate nari (ay. 3). Emaka nina rasul Petrus, ermeriah ukurlah alu keriahen si mbelin ras mulia sebab keselamaten pertendin enggo ialoken perpulungen e sebage ulih kinitekenna man Dibata (ay. 8-9).

Janah i bas si e, amin pe lit i bas kiniseran si mberat, perpulungen arus ngasup ncidahken identitasna selaku kalak si enggo itehna ras inanamina perkuah ate Dibata i bas Yesus Kristus man sekelewetna. E maka i bas ay. 14-16, si jadi ogenta sendah, ikataken Rasul Petrus nina, “Patuhlah man Dibata, janah ula pelepas geluhndu ibabai sura-sura si ndekah, eme sura-sura paksa kam lenga erpemeteh kerna Dibata. Tapi badia min kam i bas kerina perbahanenndu, bagi Dibata si ndilo kam pe badia kap.”

Kata-kata kunci i bas ay. 14-15 enda eme, “patuhlah man Dibata”; “erpemeteh kerna Dibata” ras “badia i bas kerina perbahanenndu.” Lit hubungen antara nggeluh badia ras erpemeteh kerna Dibata bage pe kepatuhen man Dibata. Romo Magnis i bas salah sada tulisenna ngatakenca, “Fides quaerens intellectum, artinya iman harus mencari pengertian. Dan pengertian dalam iman hanya dapat diperoleh dari umat yang terbuka dan ingin mempelajari inti imannya. Manusia tidak hanya ingin taat kepada Allah, ia juga ingin mengerti apa yang diimani” (Magnis Soseno, 2006:11). Arah erpemeteh kerna Dibata radu ras siteh maka kerina kalak si tek man Dibata i bas Yesus Kristus enggo ipebadiaken Dibata. I bas si e maka, si pemena, ula ngadi kita erlajar kerna Kata Dibata sebab arah erlajar Kata Dibata secara kontinyu reh tangkasna kai si jadi peraten Dibata i bas geluhta. Si peduaken, kenca enggo tangkas ras siangkai si jadi peraten Dibata i bas geluhta, patuhlah man Dibata. Si peteluken, sebage kalak si enggo ipebadiaken Dibata, iajuk kita gelah nggeluh badia i bas kegeluhenta si tep-tep wari. Nggeluh badia eme wujud nyata kepatuhenta man Dibata.

Nggeluh badia labo berarti memisahken diri i bas kalak si enterem nari. Justru kita iutus nggeluh badia i tengah-tengah masyarakat si lenga nandai ras nggejapken keleng ate Dibata i bas Yesus Kristus, alu ngelakoken kerina si jadi peraten Dibata. I bas si e tentuna identitasta harus jelas teridah.

Pengkenaina

I bas PA-ta minggu si lepas, enggo radu ras kita sepakat maka kemajun i bas bidang Teknologi Informasi eme sada hal si netral si patut isyukuri sebab secara positif ras konstruktif enggo tuhu-tuhu nampati kita i bas melala hal, termasuk i bas pelayanen i gereja. Sebage bagin i bas budaya manusia, Teknologi Informasi arus ikendalikan guna si mehuli. Amin bage gia, melala dampak negatif Teknologi Informasi si wajib iantisipasi gelah ula sempat ncedai kinitekenta.

PA-ta sendah pe i bas rangka tanggapenta kerna kemajun i bas Teknologi Informasi. Khususna i bas tujun si peduaken, gelah Mamre nggeluh badia arah pemaken alat Teknologi Informasi. Enda ertina akap kami, i bas sada sisi, memang Mamre harus nggit erlajar kerna Teknologi Informasi, tapi i bas sisi si deban, arus iimbangi alu erlajar kerna Dibata secara kontinyu. Arah erlajar kerna Dibata secara kontinya maka kesadaren kerna identitasta selaku kalak si enggo iselamatken bage pe si enggo ipebadiaken Dibata tetap terjaga. I bas si e tentuna kai pe si itawarken Teknologi Informasi man banta Mamre, ngasup kita memilah ras memilih apai si sue ras peraten Dibata, apai si berpotensi ncedai kinitekenta. E nge si imaksudken nggeluh badia i bas konteks kemajun Teknologi Informasi. Dibata si mpengasup kita patuh man Dibata janah badia i bas kerina perbahanenta.