SUPLEMEN PJJ GBKP TGL. 23 - 29 JULI 2023

Pdt. Larena br. Sinuhadji (Nd. ReyRapha Tarigan)

MEGIKEN PEDAH (Keluaren 18:24-27)

Penaruh

Lit pepatah ngatakenca, “Di dunia ini, terlalu banyak orang berkata-kata, tetapi hanya sedikit yang mau mendengarkan.” Pepatah enda, payo, sabab senangen siakap ngerana asangken megi-megi. Emaka i bas surat Yakobus 1:19 pe tangkas ikataken, “O senina-seninangku, ingetlah! Kerina arus metinggel, tapi ola minter ngerana, dingen ola sukah merawa.”

Emaka i bas paksa enda, mulihi kita ipersingeti arah firman Tuhan, bahkan erlajar arah sekalak tokoh si mbelin eme Musa si nggit megiken nasehat entah pe cakap mamana Jetro.

Mpebagesi Kata Dibata

Teks enda ibere judul “Piga-piga kalak itentuken jadi hakim” (terj. TB-LAI, “Yitro mengunjungi Musa”) eme kerna nasehat Jetro man kelana Musa. Si enda ilakoken Jetro erkiteken idahna Musa ngerunggui perubaten-perubaten si turah i bas sapih-sapih kalak Israel, i ja terus ia sibuk pepagi nari seh berngi. Kai si ilakoken Musa man bangsa Isarel la iakap Jetro tengteng. Selain Musa ras bangsa Israel sendiri pe latihsa, terlalu mbue waktu terbuang percuma.

Jetro sendiri eme sekalak Imam i Midian (catatan: tanah Midian: area perbukitan di Arab Utara sepanjang pantai Timur Teluk Akaba. Orang Midian adalah gembala yang mengembara, keturuan Abraham dan Ketura, istirnya - Kej. 7:29. Sedangkan Imam di Midian disebut "Rehuel" - 2:18, kemungkinan besar nama Suku Yetro. Sebutan imam di sini hanya menunjukan kepada posisinya sebagai imam suku dan bukan jabatan agama). Ertina, selaku iman i Midian enggo melala pengalamenna. Emaka ibereken Jetro mamana pedah gelah Musa mampu mendelegasiken dahin-dahin si kitik man kalak Israel si ngasup mengatursa. Emaka arus ipilih Musa piga-piga kalak si ngasup jadi pemimpin bangsa enda, eme pemimpin 1.000 kalak, 100 kalak, 50 kalak ras 10 kalak. Syaratna, arus kalak si mbiar man Dibata, banci iteki ras la nggit isogok. Soal-soal si kitik kalak enda saja si mutuskenca, tapi soal-soal si sulit banci isehkenna man Musa. Enggo pasti adi bagenda si ilakoken Musa bagi si iperentahken Dibata, Musa ras bangsa Isreal pe la latih, persoalan banci selesai alu mehuli, janah enggo enterem kalak banci ilibatken, ras si e termasuk kaderisasi.

Kai si ipedahken Jetro tuhu-tuhu ibegiken ras ipakeken Musa. I jenda banci siidah, Musa sekalak pemimpin si meteruk ukur. Sabab selaku pemimpin, labo cakapna ngenca man beginken, tapi ia pe banci megiken cakap kalak, secara khusus i jenda mamana. Selain siidah i jenda Musa meteruk ukurna, maka kai si ipedahken mamana payo iakapna. Enggo reh buena kalak si banci ikut muat bagin pekena-kena kegeluhen bangsa Israel ras reh teridahna potensi-potensi i bas kalak Israel si banci jadi hakim, si sedekah enda la pernah teridah, sabab la ibere kesempaten.  Janah labo terjeng megi-megi saja, tapi minter ipakekenna kai si enggo ipedahken mamana man bana. Kembali banci siidah hal si positif i bas Musa, kalak si patuh ras mampu mengeksekusi. La banna ndekah. Sabab melala kalak, ue-uekenna cakap kalak e, tulisna ka, tapi ue-ue pagumbat gelah ula rubat. Begikenna, tapi la ipakenna, bahkan la mampu ia mengeksekusisa. Tapi Musa, ibegikena ras minter idalankenna. Janah pasti hubungen antara keduana tetap terjalin alu mehuli.

Versi Audio Silahkan Klik : https://www.youtube.com/watch?v=YZT3_-v-ocA

Pengkenaina

I bas kegeluhenta, subuk i tengah jabu, gereja, i bas ingan erdahin, masyarakat ras i japa pe, lit peran si pegancih silakoken kita. Kadang kita sebage orang tua, pemimpin i perusahaan, entah gereja mekatep kita mereken masuken, nasehat entah petunjuk-petujuk. Sada paksa waktu kita banci megiken masuken entah nasehat i bas kalak nari. Artina, asum posisinta bagi Jetro, nehken masuken, nasehat silakoken alu manjar-anjar, ras tujunna guna kiniulin. Sabab banci jadi mehuli sura-suranta tapi ilakoken alu cara si la tepat. Misalna menggurui entah merawa-rawa erbahanca la terterimana. Adi enggo pe alu cara si mehuli sikataken, motivasinta pe bersih guna kiniulin, adi la terterima, ula kita kecewa. Sebalikna, adi posisinta si ngaloken kata nasehat (pedah), alu meteruk ukur sibegiken. Adi pas siakap, sipakeken, adi la siakap bas pe, sikataken bujur man kalak si enggo mpersingeti kita ndai. Si paling penting hubungen tetap sijaga alu mehuli.